Habakuk 3 - O Debleskro Lab 2024 (Sinte-Manouche)

I gili, hoy o Habakuk givell

¹ Kava hi ko mangepen, hoy o Debleskro rakepaskro, o Habakuk, o Deblestar mangas.

² Baro Devel, me shounom, hoy tou lauter kral, Har baro hal tou, baro Devel! Kre savo koova pale an maro tsiro, savo baro koova, mouk les men ninna te dikell an maro tsiro! An tiri rholi biste gar tiro kamlepen!

³ O Devel vell dran o them Teman, dran kol berge, hoy kharenn Paran. O bolepen hi pherdo leskro raylepen. Oun ap i tseli phoub sharenn les i menshe.

⁴ Leskro shoukapen hi har o kham, hoy pre djal. Har khameskri momeli djal dran leskre vasta vin. Kote dren hi leskri zoor khatedo.

⁵ I djoungelo nasslepen djal glan leste. Oun pal leste vell vavar i nasslepen, hoy rhal i menshen pre.

⁶ Čivell yob peskro piro ap i phoub, palle trissell li. Lell yob i vavar themma an o yak, trashenn i tsele menshe. Kol bare phoure berge phagenn an kotya, oun kol tikne phoure berge perenn khetne, te nashell yob – har an o phouro tsiro – pral i phoub.

⁷ Me dikom, har daran kol menshe, kay djivenn an plarhtene khera an o them Koushan, oun har trissan i menshe an o them Midian.

⁸ Baro Devel, his tout i rholi ap i zorele panya? Val tou rhoyedo pral o baro pani, har klissal tou vin tire grayentsa, oun tire kourepangre vourdya zorleder his har hake vavar?

⁹ Tou lal tiro bogo vin, oun lal tire fayle dran lengri possita. Tou phagal i phoub pre, oun lengste panya nashan vin.

¹⁰ I berge dikan tout oun trissan. Zorelo brishin peras tele dran o bolepen. O baro pani das bari gole. O kham bistras te djal lo pre.

¹¹ Oun o čon ačas tardo, har dal tire fayle karye. Tiri sasterno vitsepaskro čouri vas diklo har i yag.

¹² I rholyah stakral tou ap i phoub, an tiri rholi dal tou i menshen an vavar themma.

¹³ Tou djal vin, te vess ap i rig tire menshenge, oun o rayeske, koles tou vin rodal. I dacha ap o kheer o čilačestar dal tou khetne. Oun leskro kheer rissral trouyel bis ap i telstoune barra.

¹⁴ Tou dal leskre fayle an leskro shero. Leskre tsele lourde nashan penge kate te kote. An pengro pre-phourdepen kaman le men krik te tradell. Kolen kay kek zoor hi, kaman le pre te rhal an pengro khatepen.

¹⁵ Tou stakral ap o baro pani tire grayentsa, oun o pani hadas pes zoryah.

¹⁶ Har sikras man o Devel kova lauter, trissom me. Har shounom leskro rakepen, trissas miro mouy. I traash djas mange an i kokale, oun nashte homs bouder gar ap mire herya tardo. Me kamau ap ko dives te dikell, kay vell koy bibarht pral kol menshende, kay djan ap mende pre.

¹⁷ O faygetikro rouk hi gomme gar zenelo, oun ap i drakengre rouka hi kek drake. O djeteskro rouk hidjrell kek djeteskre drake. oun ap i harhetikri phoub vell kek djob baro. Kek bakre hi vin, oun kek groumya hi tarde an i stanya.

¹⁸ Miro dji hi barhtelo pral o baro Debleste, Miro dji givell oun djinell: Miro Devel lell man vin dran o merepen.

¹⁹ O baro Devel krell man zoreles. Yob krell mire pire har i pire o tserfestar, te nay stap pral i berge oun perau gar. Pash kay gili vell bashedo ap doryengre bashepangre.