Habakuk 1 - O Debleskro Lab 2024 (Sinte-Manouche)

O menshengro čilačepen oun o Debleskro čačepen

¹ Kava hi kova, hoy moukas o Devel peskro rakepaskres, o Habakuk, te dikell.

² Baro Devel, har rah hounte dap gole, oun tou kameh man gar te shounell? Har rah hounte dap gole glan toute: “Dik, havo čilačepen hi kate!” Oun tou kameh menge gar ap i rig te vell?

³ Hoske moukeh tou man savo čilačepen te dikell? Hoske dikeh tou, har i menshe doukedo venna, oun kreh či? Kay dikau, dikau čorepen oun djoungelo koova, kourepen oun čingepen.

⁴ O čačepen nashrell peskri zoor, oun vell bouder gar vin rakedo. Kova hoy i čačepangre morsha penenn, dell i čilačenge čačo oun gar i lačenge. Yaake vell dran o čačepen rhorhepen.

⁵ [O Devel penell:] Dikenn t'men trouyel pash i menshende an vavar themma! T'mer krenn bare yaka, hoy dikenna! Me krau čomone an t'mare tsirya, hoy t'mer gar patsenna, te vals t'menge kova penlo.

⁶ Me krau te venn i Babilonarya zoreles, kol čilače oun sik kourepangre. Pral i tseli phoub venn le, de lenn le penge vavar themma dren hoy gar lengro his.

⁷ Daar oun traash krenn le. Yon krenn penge pengro čačepen, oun krenn yaake har yon kamenn.

⁸ Lengre graya hi sikeder har i bare divye margodje. Oun yon dandrenn sikeder har i divye djoukle an i rati. Lengre boud lourde venna dran i dour them, oun klissenna yaake sik har i adlari tele djal, te taprell lo i firhes.

⁹ Yon venna halauter, te kourenn le pen bari oun čilači zoryah. Kek lendar dikell pale. Yon lenn yaake boud pandle, te nay penell kek, kitse yon hi.

¹⁰ Yon sanenn pral i bare rayende oun pralstunende an vavar themma. Kol tsele forya, kay zorele massurya troul lende tardo hi, hi lenge har čičeske; yon čivenn čik pre glan i massurya, oun djan pral vergel, oun lenn kol forya dren.

¹¹ Palle djan le doureder yaake sik har i zorelo phourdepen, oun nashrenn kek tsiro; dran pengri zoor krenn yon pengro devel.

¹² [Me penom:] Tou, miro baro Devel, hal kokres o čačo Devel, oun hal hako tsireske koy! Mouk men gar te merell! Baro Devel, pash toute khatrah men, tou dal len gole, te denn le menge i phagi, ava, tou bičral len, te denn le men dava.

¹³ Tire yaka hi yaake djoudjo, te nay dikeh kek čilačepen. Tou nay dikeh gar har i menshe doukedo venna. Hoske kreh tou či, te dikeh kol rhorhene phoukepangren, oun peneh kek lab, te rhal o čilačo koles pre, kay hi lačeder oun čačeder har yob?

¹⁴ Tou kral, te djan le i menshentsa trouyel, har te vans le mače an o baro pani, oun kirme, kolen kek ray hi,

¹⁵ kolen yon vin tserdenn pengre ranyentsa oun pengre mačengre gonentsa, oun khetne čivenn an pengre netse. Palle sal lengro dji, oun yon denn gole i barhtyatar.

¹⁶ Lengre mačengre gone oun lengre netse hi lenge har debla. Lenge rhačrenn le firhen oun soungepaskro koova, te parkrenn len pen, kay yon lenge yaake boud bravlepen oun lačo rhapen anan.

¹⁷ Moukeh tou len pale te pale vavar themma dren te lell? Kameh tou, te marenn le kol tsele menshen koy, oun sikrenn lenge kek kamlepen?