Gosewe laba 8 - O Debleskro Lab 2024 (Sinte-Manouche)

O gosvepen sikrell, koon lo hi

¹ O gosvepen hi har i day, kay dell tout gole, har i pheen, kay moukell pes te shounell.

² Pral pash o drom, hi li tardo, kote, kay i dromma khetne venna.

³ Pash i foreskre voudya dell li gole, kote kay yek dran o foro vin djal, oun kote, kay yek an o foro dren djal:

⁴ Ap t'mende lauterende dau gole, miro rakepen hi hakeneske ap kay phoub.

⁵ Hayvenn t'mer či? Palle denn yak ap goseve laba! Han t'mer dinelo? Palle dikenn dren, hoy t'menge mishto hi!

⁶ Shounenn, hoy rakrau! Me penau t'menge kouč laba. Oun miro mouy rakrell, hoy čačo hi.

⁷ Ava, miro rakepen hi o čačepen. Kamau te rakrap kek čilačepen. Kova vals djoungeles an mire yaka.

⁸ Lauter, hoy rakrau, hi čačo. An miro rakepen hi kek rhorhepen, či hoy gar čačo hi.

⁹ Koon hayvell, hoy mishto oun gar mishto hi, kova hayvell, te hi mire laba čačo. Oun koon boud djinell, kova dikell, te hi le o čačepen.

¹⁰ Moukenn t'men mandar te penell, har te djivenn! Kova hi t'menge feteder har te nashenn o roup palla! Rodenn, har te djinenn boudeder. Kova hi t'menge feteder har kouč sonakay.

¹¹ O gosvepen hi boudeder moldo har kouč mirklia. Oun či, koleske tiro dji nay palla nashell, hi yaake boud moldo har o gosvepen.

¹² Me hom o gosvepen, oun djinau, hoy čačo hi. oun nay penau vavarenge, hoy lenge mishto hi.

¹³ Kova, kay kamell o baro Debleha te djivell, kova kamell o čilačepen gar glan peskre yaka te dikell, kova dikell gar tele ap o vavareste oun phourdell pes gar pre, kova djal gar i čilačo drom, oun rakrell kek rhorhepen.

¹⁴ Mire labentsa sikrau yekeste o drom, oun krau leskre yaka pre. Djinau, hoy mishto oun gar mishto hi, oun man hi i zoor.

¹⁵ Mandar vell i zoor, hoy dau i bare rayenge. Mandar vell, te nay rakrenn i čačepangre raya o čačepen vin.

¹⁶ Mandar lenn i pralstoune pengri zoor, te penenn le i menshenge, hoy te krenn le. Mandar lenn i čačepangre raya pengri zoor, te rakrenn le o čačepen vin pral i menshende.

¹⁷ Me kamau kolen, kay man kamenn. Oun kolla, kay rodenn man o djiyestar, kolla hatsenn man ninna.

¹⁸ Bravlepen oun barepen dau me, bravlepen, hoy ačella, oun o čačepen vell mandar.

¹⁹ Hoy t'mer mandar lenn, hi feteder har o lačeder sonakay, koučeder har o lačeder roup.

²⁰ Kote, kay i menshe ap o čačo drom djan, oun an o čačepen tardo hi, kote hom me ninna,

²¹ te dap kolen, kay man o djiyestar kamenn, yaake boud, te nay djivenn le mishto, te krap lengre khera pherdo bravlepen.

²² O baro Devel kras man glan i rah tsiro. Glan hako vavar koova kras lo man.

²³ Me homs koy glan hako tsiro, har i phoub gomme gar kerdo vas.

²⁴ Har i bare panya gomme gar koy his, vom boldo. Har i tikne panya gomme gar nashan, homs me.

²⁵ Har i bare berge gomme gar tardo his, oun i tikne berge gar kerdo his, vom me boldo.

²⁶ O baro Devel kras gomme gar i phoub oun o them, vitar gar i čik koy pre.

²⁷ Me homs pashel, har kras lo o bolepen oun koy platsa, kay dikell vin, har te vans o bolepen oun o baro pani kote khetne.

²⁸ Har čivas lo i volke ap o bolepen, oun kras o pani an o telstunepen zoreles,

²⁹ har lo i panyenge penas bis kate oun gar doureder, har lo i phoub tardo kras,

³⁰ kote homs leskro čavo an leskri gali. Oun yob his barhtelo pral mande hako dives. Oun me khelom mange glan leste hako tsireske.

³¹ Ap i phoub, hoy yob kras, khelom, oun miro dji sanas, har homs mashkral i menshende.

³² Doleske, mire čave, shounenn ap mande! Barhtele hi kolla, kay ap miro drom djana!

³³ Shounenn, te dau t'men trad! Lenn kova ap o dji oun krenn, hoy penom!

³⁴ Barhtelo hi ko mensho, kay shounell ap mande, kay hi tardo pash miro voudar hako dives, oun dell yak ap miro kheer.

³⁵ Ko mensho, kay man hatsas, kova hatsas o djipen, oun o baro Devel dikell lačes ap leste.

³⁶ Kova, kay gar pash mande vell, krell peskro djipen paash. Hakeno, kay kamell či mandar te djinell, hi ap o drom, hoy anell an o merepen.