Gosewe laba 7 - O Debleskro Lab 2024 (Sinte-Manouche)1 Miro čavo, rike mire laba, oun hoy touke penom, khate an tiro dji! 2 Rike mire laba oun tou djiveh, de yak ap lende har ap tiro yak! 3 Pande len troul tiro goushto, čin len an tiro dji! 4 Dik ap o gosvepen, har te vals lo tiri pheen, oun ap gosevo rakepen, har te vals lo tiro feteder maal. 5 Te hal gosevo, rikreh tout pale i vavareskri romyatar, ava, i vavar djouvyatar, kay shoukar laba rakrell. 6 His i dives, kay homs tardo pash i vali miro kherestar oun dikom vin. 7 Ap o drom dikom boud terne morshen, oun mank lende yek, koles či an o shero hi. 8 Yob djas ap o drom kote, kay i dromma khetne venna pash i kheer, kay i djouvel djivell. 9 His tamlo oun i rati vas. 10 Koy dikom lat, koy djouvel, rido an i ripen har i loubni. Yoy djal pash leste oun djinell mishto, hoy lat glan hi. 11 Divyo his li oun bipandlo, te rikrell lat nay či an lakro kheer. 12 Ap i dromma, ap i platse oun kote, kay i dromma khetne venna vas li diklo, har rodell li pal yekeste. 13 Oun yoy taprell ko terno morshes, čoumrell les, dikell leske an i yaka oun penell ap leste: 14 Kava dives anom o Debleske i firho, yaake har leske sovel dom. Ko mass hi khere pash mande. 15 Doleske djom vin, te rodap tout, oun kate hatsom tout! 16 Me čivom shoukar plarhte ap miro čiben, save plarhte, hoy van kerdo dran kouč than, hoy dran Egiptia vella. 17 Lom kouč panya, hoy lačes soungenna pal myrrhe, Aloe oun Cinnamome, oun čorom len ap o čiben. 18 Ab, te kamas men i tseli rat, te vas mer douy barhtelo hakeno an i moussya o vavarestar. 19 Miro rom hi gar khere; yob djas krik ap i dour drom. 20 Leskri ladetsa boud loventsa las lo peha, oun vell gar khere bis te o čon pale pherdo hi. 21 Fothe yoy ap leste dren rakras, kran kol boud laba les har mato, oun lakro shoukar rakepah tserdas li les peha. 22 Oun yob nashas lake palla, har i groumni, hoy gar djinell, te vell li maredo, oun yaake har i vesheskri bouzni, hoy stakrell an i dorya, hoy lat taprenn, 23 kay i faylo lake an o dji čourye dell. Ko terno morsheske djal yaake har i čirklo, hoy an i netsa djal, oun gar djinell, te hounte merell lo. 24 Doleske, mire čave, shounenn ap mire laba! Denn yak ap miro rakepen! 25 Ma nashe tiro dji ap savi djouvyate! Ma dja lake palla! 26 Boud morsha kras li paash. Boud nashran dran late pengro djipen. 27 Lakro kheer hi o voudar an o moulengro them. Koon pash late djal, hi ap o drom an o merepen. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.