Gosewe laba 6 - O Debleskro Lab 2024 (Sinte-Manouche)

Kova, hoy te kress gar

¹ Miro čavo, dal tou tiro dadeskro vast i vavareske oun penal, te playsreh koleskri siyaan?

² Pandal tout tiro labeha? Hal tou pandlo an tiro rakepen, hoy dran tiro mouy vas?

³ Palle hal tou an o vavareskro vast, miro čavo. Kanna kre lauter, te vess pale vin! Dja pash leste, rake ap leste dren! Mouk gar tele, te mangess lestar, te moukell lo tout vin.

⁴ Rode kek sopen! Mouk tire yaka gar dren te sovell!

⁵ Tserde tout vin dran leskre vasta har i vesheskri bouzni dran i pandle dorya, oun har i čirklo dran o vast kolestar, kay tapras les.

⁶ Tou či-moldo, kay kameh gar te boudrell, touke penau: Dja pash i kiri, dik havi boudi yoy krell! Oun ab gosevo!

⁷ Kolat hi kek pralstouno, kek ray, kek, kay lake penell, hoy te krell li.

⁸ An i niyal anell li peskro rhapen khetne. Oun an ko tsiro, kay o djob dren anlo vell, lell li peskro rhapen khetne o tsireske, kay či dell.

⁹ Tou či-moldo, kay kameh gar te boudrell, har rah kameh gomme čiddo te ačell? Kaana kameh tou pre te stell?

¹⁰ Tou peneh: “Mouk man gomme i tikno tsiro te sovell, i douyto kopo i yaka te pandell, oun i vasta an i gali te čivell.”

¹¹ Oun yaake vell o čorvlepen pral toute har i čorepaskro, kay lell touke lauter krik, hoy tout hi.

¹² I čilačo mensho oun i či-moldo hi kova, kay rhorhepen rakrell,

¹³ kay i yakentsa dell, peskre heryentsa i sikepen krell, oun i goustyentsa khatemen sikrell.

¹⁴ An peskro dji hidjrell lo čilačepen, oun hako tsiro anell lo čingepen.

¹⁵ Doleske vell leskri bibarht sik pral leste. Sik hi lo doukedes ap i phoub čiddo, oun kek sastepen hi leske koy.

¹⁶ Shob koova hi, ap kolende dikell o baro Devel rhoyedes; oun i eftato koova hi leske o djoungleder:

¹⁷ yaka, kay dikenn tele ap i vavarende; i mouy, hoy rakrell rhorhepen; vasta, hoy marenn saven, kay kek čilačepen kran;

¹⁸ i dji, hoy čilačo koova peske glan lell; herya, hoy sik čilačo koova palla nashenn;

¹⁹ yek, kay čomone ap i vavareste pre anell, hoy gar čačo hi; yek, kay anell čingepen mank phralende.

Ma dja i vavar djouvyah!

²⁰ Miro čavo, rike tout ap i laba tiro dadestar! Ma biste ko drom, hoy tiri day toute sikras.

²¹ Čip lengre laba an tiro dji, pande len touke troul tiri meen har i verkli.

²² Te djah, sikrenn le touke o drom, te čiveh tout, denn le ap toute yak. Oun te steh pale pre, venn le touke an o shero.

²³ Kova, hoy tiro dad oun tiri day touke pashel anan, hi har i momeli ap tiro drom. Te denn le tout trad, rikrenn le tout ap o drom, hoy o djipen anell.

²⁴ Lengre laba rikrenn tout pale, te djas gar pash i romyate i vavarestar, te shouness gar ap i shoukar laba i vavar djouvyatar.

²⁵ Mouk tiro dji gar lakro shoukapen palla te nashell! Mouk tout gar lakre shoukar yakentsa te taprell!

²⁶ Tou djineh, i loubyake hounte dess gar boudeder har yek maro. I romyake i vavar morshestar hounte dess tiro djipen.

²⁷ Nay hidjrell yek i yag tel peskre koola yaake te rhačenn le gar?

²⁸ Nay nashell yek ap kasht, hoy rhačell, oun rhačrell peskre pire gar?

²⁹ Yaake djal koleske, kay pash i romyate i vavarestar djal. Hakeno, kay lat an-taprell, lell peskri phagi.

³⁰ I ladj koleske, kay bokas oun doleske čoras

^31-32 oun palle tapedo vas, hi gar yaake baro har koy ladj koleske, kay las pes i vavareskri romni. Ko čorepaskro hounte dell efta kope yaake boud pale, har čoras lo, ninna te hi kova lauter, hoy les hi. Kova, kay las peske i vavareskri romni, kova hi narvelo. Savo koova krell kokres yek, kay kamell bouder gar te djivell.

³³ Dava oun ladj perenn ap leste, oun ko praasepen ap leste djal gar bouder krik.

³⁴ I rom, kay zilverell, leskri rholi vell baro. Oun te vell ko dives, kay nay dell lo leske pale, hoy yob leske kras, palle krell lo kova oun rikrell pes gar pale.

³⁵ Yob lell kek love, har boud les ninna kameh te dell, či nay deh, hoy les nay pale rikrell.