Gosewe laba 4 - O Debleskro Lab 2024 (Sinte-Manouche)O čačo gosvepen hi o feteder koova 1 Mire čave, shounenn ap kova, hoy me, t'maro dad, t'menge pashel anau. Denn yak ap mire laba, te venn gosevo! 2 Mire laba hi lačo. Doleske ma bistrenn len! 3 Har me gomme i tikno čavo homs pash miro dad, kek vavar čavo his miri dat har man, 4 kote sikras lo man, har te djivap, oun penas: An tiro dji le mire laba pre oun biste len gar! Rike ap mire laba, palle djiveh. 5 Kre lauter, te vess gosevo oun hayvess, hoy mishto hi. Ma biste mire laba! Kre yaake, har touke penom! 6 Ma mouk o gosvepen! Te hal gosevo, veh tou vin lino dran o čilačepen. Te kameh o gosvepen, hi lo har i zorelo kheer troul toute. 7 O feteder koova, hoy nay leh, hi o gosvepen. Doleske kre lauter, te less les! 8 Hidje o gosvepen pral an tiro djipen, palle krell lo tout bares. Rike o gosvepen zoreles, palle dikenn i vavar pre ap toute. 9 Har i rayeskri stadi ap tiro shero hi o gosvepen touke. Ava, har i rayeskri stadi krell lo tout shoukar. 10 Shoun miro čavo, oun de yak ap miro rakepen, yaake te djivess i lengsto djipen. 11 Me anau tout ap o drom, kay dikeh, har te djivess goseves. Me sikrau tout o čačo drom. 12 Ap kava drom hi touke kek barra čiddo, hoy tire herya nay pale rikrenn. Ninna te nasheh sik, hi či koy, pral koleste tou nay pereh. 13 Ač pash kova, hoy touke siklo vas, mouk kova gar! Rike tout ap kol goseve laba! Dran lende vell tout i lačo djipen. 14 Ma dja ap o drom, kay i čilače djan! Ma kre har yon! 15 Mouk lengro drom ap i rig čiddo, ma dja ap leste! Risse tout lestar krik, oun dja doureder! 16 Kol menshe nay sovenn gar yaake rah bis te kran le čomone čilačo. Lenge vell o sopen randedo, te anan le gar yekes an i bibarht. 17 Lengro čilačo koova hi lengro rhapen, hoy krell len čalo. Yon djan i zoryah ap i vavarende pre. Oun kova hi lenge shoukar har te piyenn le mool. 18 O drom kolendar, kay o čačepen krenn, hi har o kham, hoy taysarlakro pre djal, oun o dives anell oun zorleder vell bis te hi lo pralstounes tardo. 19 O drom kolendar, kay o čilačepen krenn, hi har i kali rat; yon nay dikenn gar, pral hoy yon perenn. 20 Miro čavo, de yak ap kova, hoy rakrau! Shoun mishto ap mire laba! 21 Ma biste len! Rike len an tiro dji! 22 Kol laba anenn o djipen oun o sastepen kolenge, kay len pre lenn. 23 De yak ap kova, hoy patseh dour an tiro dji! Kolestar vell o djipen. 24 Mouk kek rhorhene laba dran tiro mouy te vell! Tiro rakepen te vell mishto oun čačo! 25 Mouk touke či an i yaka te vell! Dik glan toute oun gar čačes oun serves! 26 De yak te djas i čačo drom! Oun rake tiro djiyeha pral lauter hoy kreh! 27 Dja gar tele kava dromestar, gar čačes oun gar serves. Rike tire herya pale o čilačo dromestar! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.