Gosewe laba 31 - O Debleskro Lab 2024 (Sinte-Manouche)

Laba ap i baro rayeste

¹ Kolla hi i laba, hoy rakras i day o baro rayestar Lemouel ap leste. O Lemouel his o baro ray pral Massa.

² Miro čavo, koles me ap i phoub anom, tou, ko čavo, koles o Deblestar mangom, hoy penap touke?

³ Ma de tiri zoor i djouvyenge! Ma dja ko drom, ap koleste i bare raya nashedo djan.

⁴ Ma pi tout mates! Mool oun rhačedo pipen hi či bare rayenge oun pralstunenge.

⁵ Te piyenn le, nay bistrans le, hoy o Devel lendar kamell, oun dikenn bouder gar koy pre, te lenn i čorvele pengro čačepen.

⁶ Denn zorelo pipen kolenge, kay ap o merepen čiddo hi, oun mool kolenge, kay lenge ropaske hi.

⁷ Save nay piyenna, te nay bistrenn le pengri bibarht oun kova, hoy lengre djia doukrell.

⁸ Kre tou tiro mouy pre kolenge, kay gar nay rakrenna, hakeneske, koles gar i zoor hi, te anell lo peske kokres peskro čačepen dren.

⁹ Kre tiro mouy pre, kre o čačepen yaake vin, te lell hakeno peskro čačepen, ninna i čorvele oun bibarhtele.

I lači romni

¹⁰ I lači romni, koon hatsell lat? Yoy hi boudeder moldo har kouč barra.

¹¹ Lakro rom nay patsell lat oun djinell, te rikrell li pash leste. Oun dran kova hoy les hi, krell li gomme boudeder.

¹² Yoy krell leske lačepen oun kek čilačepen, yaake rah har djivell li.

¹³ Yoy lell bakrengro bal oun layntikre thaba, oun boudrell barhteles peskre vastentsa.

¹⁴ Yoy anell rhapen khetne foun doural har i shiffo, hoy paredo koova anell.

¹⁵ Yoy stell pre, kote hi gomme rati, oun krell o rhapen peskro khereske, oun penell i djouvyenge, kay lake boudrenn, hoy te krenn le.

¹⁶ Yoy rodell i harhetikri phoub oun ginell lat, oun kol loventsa, hoy lakre vasta dren anan, čivell li terne drakengre rouka an i phoub.

¹⁷ Yoy boudrell phares oun krell peskre moussya zoreles.

¹⁸ Yoy hayvell, te anell lakri boudi čomone dren. Ninna rati djal pash late i momeli gar vin.

¹⁹ Yoy lell koy thabeskri spindla an o vast, oun krell peskre thaba.

²⁰ Yoy krell peskro vast pre i čorvelenge, oun dell kolende, kolen gar doha hi.

²¹ Yoy darell gar peskro khereske, te vell o vend. Hakenes an lakro kheer hi tate koola.

²² Plarhte krell li peske, rido hi li an lačo layntikro than oun lolo bakrengro bal.

²³ Lakro rom hi an-diklo an o foro, te rakrell lo pes tele i phourentsa.

²⁴ Kouč gada krell li oun bikrell len, oun i parepangre lenn latar kol pereskre dorya, hoy yon bikrenn.

²⁵ Yoy hi zorelo oun an-diklo, oun yoy darell gar o tsirestar, hoy vella.

²⁶ Lakro rakepen hi pherdo gosvepen, oun lače labentsa sikrell li, har čomone djal.

²⁷ Yoy dikell pal lauter, hoy an o kheer kerdo vell. Oun ko mareske, hoy li rhal, boudras li.

²⁸ Lakre morsh čave stakrenn glan oun sharenn lat. Oun lakro rom sharell lat kal labentsa:

²⁹ “Boud romya hi boud moldo, tou hal i lačeder lendar lauterendar!”

³⁰ O shoukapen ačell gar, oun i shoukar djouvel vell ninna phouro. I romni, kay djivell o baro Debleha, kolat sharenn le.

³¹ Parkrenn t'men pash late lautereske, hoy yoy kras! Givenn kolestar ap i platse an o foro!