Gosewe laba 30 - O Debleskro Lab 2024 (Sinte-Manouche)

Laba, hoy o Agour rakras

¹ Kolla hi laba, hoy rakras o Agour, koleskro dad o Yake his, dran Massa. Kava morsh penas: Me marom man tele, mo Devel, me marom man tele, mo Devel, oun djinau gar bouder doureder.

² Har i firho hom, oun menshengro gosvepen hi man kek.

³ Kek sikras man har te vap gosevo, oun djinau či o Deblestar.

⁴ Koon djas pre an o bolepen oun pale tele? Koon las o phourdepen an peskre vasta? Koon pandas i tsele panya an i baya? Koon penas, har dour i phoub te djal? Har kharell lo? Har kharell leskro čavo? Djineh tou kova?

⁵ O Devel rikrell hako lab, hoy das lo. Yob rikrell peskre vasta pral kolende, kay venn pash leste, te dell lo yak ap lende.

⁶ Čip kek lab pash kova pashel, hoy yob penas, te dell lo tout gar trad, oun hakeno dikell, kay hal i rhorheno.

⁷ Mo Devel, douy koova mangau me toutar. De len mande yaake rah har djivau:

⁸ Rike man pale, te rhorhap! Oun ma kre, te vap čorvelo oun vitar gar, te vap bravelo. De man kokres, hoy man hounte vell o djipaske.

⁹ Te vals man boudeder har man hounte vell, nay penaus: “Koon hi o baro Devel?” Oun te vals man gar doha, nay čoraus oun anaus ladj ap miro Debleste.

¹⁰ Ma an rhorhepen pre ap i boudepaskro pash leskro rayeste, te rakrell yob kek bibarht pral toute vin, oun tou hounte playsress koleske.

¹¹ Hi menshe koy, kay rakrenn pral pengro dad bibarht vin, oun penenn kek lačo lab pral pengri date.

¹² Hi menshe koy, kay an pengre yaka djoudjo hi, oun lengro djoungelo koova vas gar tele thodo.

¹³ Hi menshe koy, kay patsenn pendar, har lačo yon hi, oun dikenn tele ap hako vavareste.

¹⁴ Hi menshe koy, kolengre danda doukrenn har rhare oun činenn har čourya. Oun yon rhan i čorvelen an o them, oun kolen, kay lenge kek ap i rig vell.

¹⁵ Hi menshe koy, kay hi har ko kirmo, hoy o rat piyell. Koles hi douy ča. Kolla kharenna: “De kay! De kay!” Triin hi koy, kay gar čalo venn, oun star penenn an kek tsiro: “Kanna hi man doha”:

¹⁶ o moulengro them; o per i djouvyatar, kay lell kek čave; i phoub, kay gar boud brishin dell; oun i yag, hoy gar gole dell Kanna hi doha!.

¹⁷ Kova, kay praasell peskro dades, oun kamell gar ap peskri date te shounell, koleske hounte dens i korake i yaka vin, oun i bare čirkle hounte rhans len.

¹⁸ Triin koova hi mange yaake baro, te hayvau len gar. Oun o startestar djinau me či:

¹⁹ O drom o baro čirklestar, har hadell lo pes an o bolepen; o drom o sapestar ap i bare barra; o drom foun i shiffo ap o baro pani; oun o drom o morshestar pash i terni djouvyate.

²⁰ I djouvel, kay rhorhell peskro romes oun sovell i vavareha, thovell pes pal kova oun penell: “Me krom kek čilačepen”, yaake har te rhals li oun thovals peske o mouy tele.

²¹ Tel triin koova trissell i phoub, oun tel o starto rikrell li les gar vin:

²² Tel i boudepaskro, kay i baro ray vas; oun tel i narvelo, kay bravelo vas;

²³ tel i čilači djouvel, kay vell romedino. Oun tel i boudepaskretsa, kay las koy platsa peskri rayetsa dren.

²⁴ Star firhe hi i tikneder ap kay phoub, oun hi gosveder har i goseve menshe:

²⁵ I kirya: Ninna te hi len kek zoor, anenn le pengro rhapen khetne an i niyal.

²⁶ I bergetikre shoshoya: Len hi vitar gar boud zoor oun krenn pengre khera an i bare barra.

²⁷ I stepangre: Len hi kek ray oun djan vin har kourepangre, kolenge penlo vas, har le hounte djan.

²⁸ I aideksa: Tou nay taprell lat i vastentsa, oun hatseh lat ninna an i zorele shoukar khera i bare rayendar.

²⁹ Triin hi, kay rayles pre stakrenn, oun o starto hi o rayleder:

³⁰ O levo, ko zorleder mank i firhende: Glan kekeste djal lo pale;

³¹ o bashno, har djal lo pre-phourdemen trouyel; o morsh bouzni; oun o baro ray, har djal lo glan peskre lourdende.

³² Te hals yaake dinelo, te hadal tout pre, oun lal tout čilačo koova glan, ač oun čip o vast ap tiro mouy!

³³ Te deh thoud, vell kolatar khil. Te deh yekes ap o nak, ratell kova. oun te moukeh i rholi vin, vell čingepen.