Gosewe laba 3 - O Debleskro Lab 2024 (Sinte-Manouche)Čip tiro dji ap o Debleste! 1 Miro čavo, ma biste kova, hoy touke sikrom, rike mire laba an tiro dji! 2 Yaake vell tout i lengsto djipen, oun tire djipaskre bersha venn pherdo lačepen. 3 Djib hako tsiro an o lačepen oun an o čačepen! Pande mire laba har i verkli troul tiri meen, oun čin len an tiro dji! 4 Palle hal lačo oun gosevo glan i yaka o Deblestar oun i menshendar. 5 Čip tiro tselo dji ap o baro Debleste! Ma pats, kay djineh kokres, hoy mishto oun čačo hi! 6 Rike tout ap o baro Debleste, hoy tou ninna kreh! Oun yob krell tiro drom čačo glan toute. 7 Ma ab gosevo an tire yaka! Mouk o baro Devel tiro ray te vell, oun rike tout krik i čilače dromma! 8 Kova dell tout sastepen oun nevi zoor. 9 De o baro Debleste tiro bravlepastar oun ko feteder kolestar, hoy touke khetne anal, yaake hadeh leskro lab. 10 Palle venn tire djobengre khera pherdo djob, oun tiri bari molyakri piri yaake pherdo, te nashell i mool pral. 11 Miro čavo, ma dik čilačes, te dell tout o baro Devel i phagi! Ma naash lestar krik, te dell lo tout trad. 12 Kones o baro Devel o djiyestar kamell, koles dell lo, yaake har i dad peskro čaveha krell, ap koleste yob lačes dikell. 13 Har barhtelo hi ko mensho, kay o gosvepen hatsas, kova, kay djinell, hoy mishto hi. 14 Te hi tout gosvepen, hi kova boudeder moldo, har te vell tout roup oun sonakay. 15 O gosvepen hi koučeder har mirklia. Ava, či, hoy kamals, te vell tout, hi yaake boud moldo har o gosvepen. 16 An peskro čačo vast, rikrell o gosvepen i lengsto djipen touke, peskro servo vasteha dell lo tout bravlepen oun raylepen. 17 O gosvepen anell ap shoukar dromma, kay dell kek čingepen. 18 Har i rouk, hoy o djipen dell, hi o gosvepen hakeneske, kay les an peste pre-lell. Barhtele hi lauter, kay o gosvepen an pengre djia rikrenn. 19 O baro Devel kras i phoub o gosvepah, oun o bolepen yaake, har yob djinas, kay kova mishto his. 20 Leskri gosvepah moukas lo pani te vell dran i phoub oun brishin dran o bolepen. 21 Miro čavo, mouk o gosvepen gar dran tire yaka! Rike tout ap kova, hoy mishto oun gosevo hi! 22 Kova dell tiro djipen zoor oun krell les shoukar har i verkli troul tiri meen. 23 Yaake nay djah zoreles tiro drom, oun pereh gar pral i barra, hoy kote čiddo hi. 24 Rati čiveh tout tele kek daryah, oun tou nay soveh mishto. 25 Tout hounte vell kek daar glan i bibarht, hoy vell sik, vitar gar glan o merepen, hoy vell pral kolende, kay kamenn o Deblestar či te djinell. 26 O baro Devel hi pash toute. Yob dell yak ap toute, te stakress gar an i khatede dorya, hoy kamenn tout te taprell. 27 Te hi tout lačo koova, de ninna koleste, koles či hi. 28 Te nay deh les kova kanna, ma pen ap leste: Dja touke oun ab o vavar dives pale! Palle kamau tout čomone te dell. 29 Ma le touke glan, te kress čilačepen koleske, kay pash toute an o lačepen djivell! 30 Ma činge čičeske yekeha, kay touke či kras! 31 Ma dik zilve yakentsa ap yekeste, kay las pes i zoryah, hoy i vavareske his. Ma kre har yob! 32 O baro Devel dikell rhoyedes ap kolende, kay bange dromma djan. I maal hi lo kolenge, kay ap o čačo drom djan. 33 O baro Devel čivell i bibarht ap o kheer i čilačendar, oun barht ap o kheer kolendar, kay an o čačepen tardo hi. 34 Kolla, kay praasenn i vavaren, kolen praasell lo ninna. Kolla, kay krenn pen gar bares, ap kolende dikell lo lačes. 35 Kolla, kay čačepah gosevo hi, venna sharedo. Kolla, kay dinelo koova krenn, hounte hidjrenn pengri ladj. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.