Gosewe laba 29 - O Debleskro Lab 2024 (Sinte-Manouche)

¹ Koon moukell pes či te penell, oun djal hako tsiro pal peskro shero, savo vella ap yek kopo phagedo, oun kek hi palle koy, kay hadell les pale pre.

² Te hi boud menshe koy, kay an o čačepen tardo hi, palle hi i tsele menshe barhtelo. Te hi i čilačo o ray pral lende, palle hi i tsele menshenge ropaske.

³ Kova, kay kamell o gosvepen, krell peskro dades barhtelo. Kova, kay pes loubyentsa dren moukell, nashrell peskro bravlepen.

⁴ I baro ray, kay rikrell pes ap o čačepen, kova krell, te djal o themeske lačes. Kova, kay lell boud themeskre love peskre menshendar, kova krell o them paash.

⁵ Kova, kay makell i vavareske gvin troul o mouy, kova čivell i netsa khatedo vin glan koleskre pire.

⁶ I čilačo taprell pes an peskro čilačepen. Kova, kay an o čačepen tardo hi, djal barhteles peskro drom.

⁷ Kova, kay an o čačepen tardo hi, kova dell ninna yak, te lell o čorvelo peskro čačepen. I čilače djinenn gar, hoy čačo hi.

⁸ Kol pre-phourde, kay djinenn lauter feteder, krenn i tselo fores divyes. I goseve hayvenn, har te lenn le lengro čingepen krik.

⁹ Te vell i gosevo khetne i dineleha pash o čačepaskro morsheste, te vell o čačepen vi-kerdo, palle vell o dinelo divyo oun sal. Či dikell lo dren.

¹⁰ I marepangre hi rhoyedo pral koleste, kay kek doosh ap peste anas. Kolla, kay an o čačepen tardo hi, denn yak ap koleskro djipen.

¹¹ I dinelo rikrell peskri rholi gar pale. I gosevo hi o ray pral peskri rholi.

¹² I ray, kay ap rhorhene laba shounella, koleskre boudepangre venn lauter rhorhene.

¹³ O čorvelo oun kova, kay les tele rikrell, kol douyen hi yek koova khetne: Kol douyende das o baro Devel yaka.

¹⁴ I baro ray, kay dell i čorvelen lengro čačepen, ačell ray i rah tsiro.

¹⁵ Te lell i čavo i phagi oun vell leske penlo, hoy lo gar mishto kras, palle vell lo gosevo. I čavo, kay ap peste kokres yak hounte dell, savo anell ladj ap peskri date.

¹⁶ Kote, kay boud čilače hi, kote hi ninna boud doosh. Vell ko tsiro, kay dikenn kolla, kay an o čačepen tardo hi, har i čilače perenn.

¹⁷ Sike tiro čaves zoreles, hoy lo gar mishto kras. Palle krell lo tout barhtelo. Oun tou hounte ladjess leske gar.

¹⁸ Te hi kek Debleskro rakepen koy, palle venn i menshe divyo oun bipandlo. Barhtelo hi kova, kay shounell ap o Debleskre laba.

¹⁹ I labentsa moukell pes o boudepaskro či te sikrell. Ninna te hayvals yob, rikrell lo pes gar ap kova.

²⁰ Dikeh tou i morshes, kay sik ap o rakepen hi, i dineleske nay djal feteder har saveske.

²¹ Te deh tou tiro boudepaskres lauter, hoy kamell lo, foun tiknes pre, palle vell ko dives, kay shounell lo bouder gar ap toute.

²² I morsh, kay hako tsiro an i rholi hi, savo krell čingepen, oun anell boud doosh ap peste.

²³ O pre-phourdepen i menshestar krell, te perell lo. Kova, kay hadell pes gar, vell an-diklo.

²⁴ Kova, kay djal khetne yekeha, kay čorell, činell pes an peskro mass: yob djinell, o praasepen hounte vals ap leste, te penell lo či. Oun yob kamell či te penell.

²⁵ Kova, kay darell i menshendar, perella. Kova, kay rikrell pes ap o baro Debleste, pral koleste rikrell lo peskre vasta.

²⁶ Boud rodenn i rayes pre, te rakrenn le leha. Kova, kay dell o menshes peskro čačepen, hi kokres o baro Devel.

²⁷ Rhoyedo pral kolende, kay čilačo koova krenn, hi kolla, kay o čačepen krenn. Oun rhoyedo pral koleste, kay o čačepen krell, hi kolla, kay čilačo koova krenn.