Gosewe laba 27 - O Debleskro Lab 2024 (Sinte-Manouche)

¹ Ma share tout pral kova, hoy hi tout glan o vavar dives! Tou djineh gar, hoy touke ko dives anell.

² Mouk i vavaren tout te sharell oun gar tiro mouy! Hi feteder te sharell tout i vavareskro mouy har tiro mouy.

³ Phares hi barra oun čik. Douy kope phareder hi i rholi, hoy yekes hi pral i dinelestar.

⁴ I rholi hi divyo oun zorelo har i zorelo pani, hoy lauter peha krik tserdell. Koon nay ačell tardo te zilverell i morsh?

⁵ Feteder hi, te vell yekeske an o mouy penlo, hoy lo gar mishto kras, har te penell yek leske gar, te kamell lo les o djiyestar.

⁶ Laba, hoy doukrenn har dava oun venn tiro malestar, hi feteder har i čoumma kolestar, kay touke čilačes hi.

⁷ Kova, kay čalo hi, moukell o feteder gvin tardo. Koles bok hi, koleske hi shoutlo koova har te vell lo goudlo.

⁸ Har i čirklo, hoy krik djal dran peskri nesta, yaake hi ko morsh, kay hounte nashell peske dour krik dran peskro foro.

⁹ Djet oun soungepaskre kashta krenn o dji barhteles. Feteder hi o djiyeskro kamlepen i malestar.

¹⁰ Ma mouk tiro males, vitar gar tiro dadeskro males! Te djal touke djoungeles, ma dja an o kheer tiro phralestar. Hi feteder, te djas pash yekeste, kay gar dour toutar djivell, har pash tiro phraleste, kay dour toutar krik djivell.

¹¹ Ab gosevo, miro čavo! Oun kre miro dji barhteles, yaake te nay rakrau ap kolende pale, kay man praasenn.

¹² Koles i gosevo dji hi, kova dikell i bibarht te vell, oun khatrell pes. Kolen či an o shero hi, kolla nashenn doureder, oun i bibarht vell ap lende.

¹³ Yek, kay dinelo doha hi, te dell lo peskro dadeskro vast oun penell, te playsrell lo i vavareskri siyaan, kolestar le leskri baya oun gar ko vavareskri baya, te hi tout čomone an o vast, bis te yob playsrell.

¹⁴ Kote hi yek, kay sik taysarlake bares gole dell lačo dives ap koleste, kay pash leste djivell. Kova hi koleske har te rakras lo bibarht pral leste vin.

¹⁵ I romni, kay hako tsiro čingepen rodell, hi har i kheer, kay dren dell, te hi brishin.

¹⁶ Kova, kay kamell lat pale te rikrell, hi har yek, kay kamell i phourdepen pre te rikrell, oun har yek, kay kamell djet an o vast te rikrell.

¹⁷ Te dell saster ap saster, venn hake douy har i čouri, hoy mishto činell. Kay menshe khetne hi, sikell yek o vavarestar, har te djan le mishto khetne trouyel.

¹⁸ Kova, kay ap peskro faygetikro rouk yak della, kova rhal lestar ninna. Oun kova, kay ap peskro rayeste lačepen krell, vell lestar sharedo.

¹⁹ An o pani nay dikeh tiro mouy. Oun an tiro dji nay dikeh, har hal.

²⁰ O moulengro them vell gar čalo. Yaake hi ninna i menshengre yaka: Yon lenn gar doha.

²¹ An i yag vell diklo, har boud o roup moldo hi, oun an o bob sikrell pes, har boud o sonakay moldo hi. Hoy i morsh moldo hi, sikrell pes ap kova, hoy pral leste rakedo vell.

²² I kashteha vell djob tiknes kerdo an i piri. Ninna te krals yaake i dineleha, perals leskro dinlepen gar lestar tele.

²³ De mishto yak ap tire bakre oun bouzya, te hi len lauter, hoy len hounte vell.

²⁴ Bravlepen ačell gar, oun i themeskro ray ačell gar ray hako tsiro.

²⁵ Anal o phouss dren oun o nevo zenlepen vell pale vin, oun lal khetne ko zenlepen ap i berge,

²⁶ palle hi tout bakrengro bal tire ripyenge, oun nay bikreh tire bouzyendar. Oun kol loventsa nay gineh touke i harhetikri phoub.

²⁷ Oun tout hi doha bouzyengro thoud touke oun tiri familyake, oun ninna i djouvyenge, kay boudrenn touke.