Gosewe laba 26 - O Debleskro Lab 2024 (Sinte-Manouche)

¹ Har gib an i niyal oun har depen an ko tsiro, kay anenn le o djob dren, yaake djal gar, te vell o dinelo sharedo!

² Har i čirklo, hoy hadell pes an o bolepen, oun vell gar tele pash i mensheste, yaake hi o praasepen, hoy vas vin rakedo pral yekeste, kay kek doosh ap peste anas. Ko praasepen taprell les gar.

³ I čoupni o grayeske, oun i ledertikri rima troul i meen i eslatar, oun i kasht ap o doumo i dinelestar.

⁴ Ma rake dinlepen ap i dineleste pale, te vess gar har yob!

⁵ Rake i dineleha, kay rakrell dineles ap toute, yaake te hayvell lo, har dinelo yob hi.

⁶ Kova, kay i dinelo bičepaskres bičrell, kova hi har yek, kay dell peske kokres i herya tele oun rhal dava.

⁷ Har i herya i bango menshestar kek zoor an lende hi, yaake hi i gosevo lab an o mouy i dinelestar.

⁸ Yek, kay sharell o dineles hi har yek, kay pandell i bar yaake zoreles an i vitsepaskri, te nay vitsrell lo les gar.

⁹ I soubyengro kasht an o vast kolestar, kay mato hi, yaake hi i gosevo lab an o mouy i dinelestar.

¹⁰ Har yek, kay troul peste karye dell, oun hakenes doukrell, yaake hi kova, kay lell i dineles, te boudrell lo leske, oder saven, kay djan ap o drom.

¹¹ Har i djouklo, hoy pale rhal, hoy lo vin čadas, yaake hi o narvelo, kay krell pale te pale dinelo koova.

¹² I dinelo nay vell sikeder gosevo har yek, kay pestar kokres patsell, te hi lo gosevo.

¹³ Ko či-moldo, kay kamell gar te boudrell, kova penell: Vin hi i levo, ava, mashkral ap o drom hi i levo.

¹⁴ Yaake har i voudar rissrell pes an i rikepangre, yaake rissrell pes an peskro čiben ko či-moldo, kay kamell či te boudrell.

¹⁵ I či-moldo, kay kamell či te krell, čivell peskro roy an o čaro, oun anell peskro vast gar pash o mouy.

¹⁶ I či-moldo, kay kamell gar te boudrell, hi an peskre yaka gosveder har efta, kay djinenn, hoy mishto oun čačo hi.

¹⁷ Kova, kay pes dren moukell an i vavarengro čingepen, kova hi har yek, kay taprell i djoukles pash i kanda.

¹⁸ Har i baro dinelo, kay troul peste karye dell oun menshen moulo karye dell,

¹⁹ yaake hi ko morsh, kay peskro males rhorhell, oun palle penell: Hoy krom, his sapaske.

²⁰ Kote, kay bouder kek kasht hi, kote djal i yag vin, oun kote, kay kek bouder hi, kay rhorhepen ap vavarende pre anell, kote djal o čingepen krik.

²¹ Yaake har krell o kasht, te rhačell i yag doureder, yaake krell i morsh, hoy čingepen rodell, te djal o čingepen doureder.

²² Kol laba kolestar, kay rhorhepen ap vavarende pre anell, hi har lačo rhapen, oun djan tele har djet.

²³ Har čare dran rhačedi čik, pral kolende roup maklo vas, yaake hi o mouy, hoy shoukar laba rakrella, hoy venn dran i čilačo dji.

²⁴ I midjak mensho hi pherdo rhorhepen. Kova khatrell lo pal shoukar laba.

²⁵ Te rakrell lo ninna yaake kamles, ma pats leske! Les hi efta bengeskro koova an leskro dji.

²⁶ Ninna te khatrell lo peskri rholi ap i vavarende pal shoukar laba, vell ko dives, kay dikell hakeno leskro čilačepen.

²⁷ Kova, kay i vavareske i grouba vin hadas, kova perell kokres dren. Oun yek, kay vitsrell i bar, ap koleste perell lo pale tele.

²⁸ Kova, kay rhorhepen rakrell, kamell o vavareske čilačepen te krell oun les doukrell. Oun kova, kay goudle labentsa rakrell, anell i bibarht.