Gosewe laba 25 - O Debleskro Lab 2024 (Sinte-Manouche)

Vavar goseve laba o Salomestar

¹ Ninna kalla hi goseve laba o Salomestar. I sikepangre an o kheer o baro rayestar Hiskiya lan kal laba khetne. O Hiskiya his o baro ray pral o them Youda.

² O Devel vell sharedo koleske, hoy yob khatedo rikrell. O baro ray vell sharedo koleske, hoy yob pre čakrell.

³ O bolepen djal dour pre, oun i phoub djal dour tele, oun kek nay djinell, hoy an o baro rayeskro dji hi.

⁴ Le i čik dran o roup vin, palle nay krell kova, kay boudrell o roupeha, i shoukar čaro kolestar.

⁵ Le o čilačes krik o baro rayestar, palle ačell yob i baro ray, kay an o čačepen tardo hi.

⁶ Ma kre tout bares glan o baro rayeste, oun pash i pralstunende ab gar tardo!

⁷ Hi feteder, te penenn le ap toute ab kate pre, har te bičrenn le tout tele kotar, kay beshal tout, oun denn tiri beshepaskri i vavareste, kay boudeder an-diklo hi.

⁸ Ma dja sik pash i čačepangre morshende, te peness lenge, hoy dikal. Te vell palle i vavar oun sikrell, kay hi tout gar čačo, hoy kreh tou palle?

⁹ Te hi tout i čingepen i vavareha oun moukeh o čačepen vin te krell mashkral t'mende, ma rake pral kova, hoy djineh khatedes lestar.

¹⁰ Te kreh tou kova, shounenn vavar menshe kolestar oun kharenn tout phoukepaskro. Oun kova vell touke gar bouder bistedo.

¹¹ I lab rakedo an o čačo tsiro, hi har sonakangre phabya an i roupeno čaro.

¹² I gosevo mensho, kay trad dell, oun i kand, hoy ap leste shounell, kolla hi har i sonakaskri goustri oun i sonakaskri verkli troul i meen.

¹³ I morsh o labestar hi koleske, kay les bičras, har shila pani an ko tato tsiro, kay o djob dren anlo vell, oun dell les nevi zoor.

¹⁴ Kolla, kay penenn, te denn le čomone, oun palle denn le kova gar, kolla hi har volke oun i phourdepen, hoy denn kek brishin.

¹⁵ Boud lače labentsa nay tserdeh pralstunen ap tiri rig. Oun i kamlo rakepen phagella kokale khetne.

¹⁶ Te hatsal gvin, palle rha gar boudeder har touke mishto hi, te vess gar čalo lestar oun hounte čadess les pale vin.

¹⁷ Ma dja hako kopo pash tiro maleste khere. Les nay vals o nak toutar pherdo oun vals rhoyedo ap toute.

¹⁸ Kova, kay ap i vavareste rhorhepen pre anell, savo hi har i tover, oun i rharo, oun činell har i čouri.

¹⁹ Te hi tout i kalo dives oun dikeh ap i maleste, te vell lo ap tiri rig, oun yob hi kek morsh o labestar, palle hi kova, har te dandals ap i tele phagedo dand, oun har te nashals ap yek heri.

²⁰ Te giveh gilya yekeske, koleskro dji rovella, palle hi kova leske, har te randjell yek i baya vin ap i shil dives, oun har te čorell yek shout an i doukepen.

²¹ Te hi koles bok, kay kamell touke čilačepen, palle de les maro te rhal. Oun te hi les troush, de les pani te piyell!

²² Palle rhačell les an leskro dji oun les khaytell, hoy lo kras. Oun o baro Devel dell tout tiro lačepen pale.

²³ I phourdepen oun kale volke anenn brishin, oun i čip, hoy pal o vast rakrell, anell rholi.

²⁴ Hi feteder te beshess ap i dacha, har an o kheer khetne i romyah, kay hako tsiro čingepen rodell.

²⁵ I liil dran i dour them lače labentsa hi har shil pani koleske, kay troushella.

²⁶ Har i djoungelo pani oun i brounna, hoy khandella, hi yek, kay an o čačepen tardo hi oun glan i čilačeste trissella.

²⁷ Boud gvin hi gar mishto. Yaake hi ninna, te shareh tou i vavares boud shoukar labentsa.

²⁸ Yaake har i foro, kay kek massouri troul leste hi, yaake hi i morsh, kay nay rikrell gar peskri rholi pale.