Gosewe laba 24 - O Debleskro Lab 2024 (Sinte-Manouche)

O deesh-te-enyato lab

¹ Ma zilve ap čilače menshende, ma rode lengro maal te vell!

² Lengre djia lenn penge savo koova pherdo marepen glan, oun hoy le rakrenn, anell bibarht.

O biishto lab

³ Tout hounte vell gosvepen, te čivess i kheer pre, oun tou hounte hayvess mishto, hoy te kress, te ačell ko kheer zoreles tardo.

⁴ Koon boud djinell, kova hayvell, har te krell lo peskre tsele iseme pherdo kouč shoukar koova.

O biish-te-yekto lab

⁵ I gosevo morsh hi har i zorelo, oun yek, kay boud djinell, an koleste hi pherdi zoor.

⁶ Te kamell lo i kourepen te krell, hounte hayvell lo mishto, har te djal glan. Oun kote, kay boud morsha pengro gosvepen khetne čivenn oun pral rakrenn, hoy mishto vals, djal lengro kourepen mishto.

O biish-te-douyto lab

⁷ I dinelo hayvell gar goseve laba. Kote, kay i čačepangre khetne venna, nay krell lo peskro mouy gar pre.

O biish-te-triinto lab

⁸ Kova, kay peske glan lell te krell lo čilačo koova, koles denn le čilačo bedo gole.

⁹ Kova, kay moukell pes či te penell, lell peske savo koova glan, hoy anell les o Debleskro dromestar tele. Oun i menshe dikenn rhoyedes ap koleste, koles i pre-phourdo dji hi.

O biish-te-starto lab

¹⁰ Kova hi gar zorelo, kay an phare tsirya gar zoreles tardo hi.

O biish-te-pančto lab

¹¹ Dja oun le kolen dran o merepen vin, kay venn pandles ap koy platsa tserdedo, kay venn le maredo. Rike kolen pale, kay koy djan.

¹² Te peneh tou: Mer djinam kova gar! Palle djiness: Kova, kay an i djia dikell, hayvell les. Oun kova, kay ap tiro djipen yak dell, kova djinell les. Oun yob dell o menshes kova pale, hoy lo kras.

O biish-te-shobto lab

¹³ Rha gvin, miro čavo! lačo hi lo, oun goudlo an tiro mouy.

¹⁴ Yaake hi o gosvepen lačo tiro djipaske. Te hatsal les, palle hi tout i lačo djipen glan toute, oun kova vella, hoy o djiyestar kamal.

O biish-te-eftato lab

¹⁵ Ma loure har i čilačo ap o kheer kolestar, kay an o čačepen tardo hi! Ma de koy platsa khetne, kay čivell lo pes sopaske!

¹⁶ Kova, kay an o čačepen tardo hi, nay perell efta kope, hako kopo stell lo pale pre. I čilače perenn an i bibarht.

O biish-te-orhtato lab

¹⁷ Te perell kova, kay touke čilačepen kamell, ma ab barhtelo! Tiro dji te sal gar pral leskri bibarht!

¹⁸ O baro Devel nay dikals kova i rholyah, oun palle rissrals lo peskri rholi kolestar tele!

O biish-te-enyato lab

¹⁹ Ma ab rhoyedo ap kolende, kay midjak koova krenn! Ma zilve ap i čilačende!

²⁰ Kolenge, kay čilačo hi, vell kek lačo tsiro. Lengro djipen hi har i momeli, hoy djal vin.

O triin-deshto lab

²¹ Miro čavo, djib glan o baro Debleskre yaka oun kre, hoy o baro ray toutar kamella! Ma dja kolentsa, kay vavaren ap lende pre anenn!

²² Sik vell i bibarht pral savende. Nay djineh tou, havi bibarht o baro Deblestar oun o baro rayestar nay vell?

Vavar goseve laba

²³ Ninna kolla hi laba, hoy i goseve penan: Kova hi gar mishto, te dikenn i čačepangre morsha yekes feteder an har o vavares.

²⁴ Kova, kay ap koleste penell, kay doosh ap peste las tout hi kek doosh, koles praasenn i menshe oun rakrenn i bibarht vin pral leste.

²⁵ Kol čačepangre morsha, kay djan pal o čačepen, kolenge djal mishto. Oun bari barht vell ap lende.

²⁶ Te deh tou i lačo lab pale, hi kova har te dess i čoum.

²⁷ Dja vin ap tiri phoub oun kre tiri boudi! Pal kova le i romni, te vell tout i familya!

²⁸ Ma an rhorhepen pre ap i vavareste! Pen o čačepen!

²⁹ Ma pen: “Yaake har yob mange kras, krau me leske ninna. Hakeneste dau pale, har yob mange kras.”

³⁰ Me djom glan vergel ko kotar phoub savestar, kay kamell gar te boudrell, oun dikom i drakengro them yekestar, koles či an o shero hi.

³¹ Oun soubyengre bourra his koy tardo oun lauter djoungelo zenlepen, oun i massouri troul ko kotar them his tele peredo.

³² Oun me dikom kova, oun moukom les an miro dji te djal; oun kova sikras mange:

³³ Te kameh o sopen oun pandeh i yaka oun čiveh i vasta an i gali oun kreh či,

³⁴ palle vell o čorvlepen lengste heryentsa pral toute. Oun tout venn phare tsirya.