Gosewe laba 23 - O Debleskro Lab 2024 (Sinte-Manouche)

O shobto lab

¹ Te vell, te beshess pash i rayeste ap i rhapaskri, palle biste gar, koon glan toute beshdo hi.

² Ma pere pral o rhapen, har bari ninna tiri bok hi.

³ Mouk tiro dji gar pal leskro lačo rhapen te nashell! Kova nay vell i rhorheno rhapen.

O eftato lab

⁴ Ab yaake gosevo, te maress tout gar tele, bravelo te vell.

⁵ Te dikeh tire yakentsa pre, hi o bravlepen gar bouder koy, yaake sik hi lo krik har i čirklo, hoy hadell peskre moussya oun hadell pes an o bolepen.

O orhtato lab

⁶ Ma rha ko maro, hoy i činlo toute dell. Mouk tiro dji gar pal leskro lačo rhapen te nashell!

⁷ Les hi douy djia. Ap toute penell lo: “Rha oun pi”, an leskro dji kamell lo toute či te dell.

⁸ Kova, kay tou tele dandral oun rhal, koles hounte čadess tou pale vin. Oun tire lače laba his čičeske.

O enyato lab

⁹ Ma rake an i kanda i dinelestar! Ap tiro gosvepen dikell yob tele.

O deshto lab

¹⁰ Ma čip kol phoure barra krik, hoy sikrenn, har baro tiro them hi. Ma le i phoub kol čavendar krik, kolen kek dad bouder hi.

¹¹ O baro Devel vell lenge zoreles ap i rig, oun lell lengro koova an o vast, oun krell o čačepen pral toute vin.

O deesh-te-yekto lab

¹² De yak ap kova, hoy tiro sikepaskro touke penell, oun shoun ap kova, hoy mishto oun čačo hi.

O deesh-te-douyto lab

¹³ Ma rike tout pale, te dess tiro čaves i phagi. Te deh les o kashteha, merell lo kolestar gar.

¹⁴ Tou deh les o kashteha, oun rikreh les yaake pale, ap o merepaskro drom te vell.

O deesh-te-triinto lab

¹⁵ Miro čavo, te hi tiro dji čačes gosevo, palle hi miro dji ninna barhtelo.

¹⁶ Te rakreh, hoy mishto hi, sal miro dji.

O deesh-te-starto lab

¹⁷ Ma zilve ap kolende, kay o Debleskro drom moukan. Hako dives de yak, te djivess o baro Debleha.

¹⁸ Palle hi tout i lačo djipen glan toute, oun kova vella, hoy tou o djiyestar kamal.

O deesh-te-pančto lab

¹⁹ Shoun, miro čavo oun ab gosevo, oun dja o djiyestar o čačo drom!

²⁰ Ma ab mank kolende, kay pen mates piyenn, vitar gar mank kolende, kay boudeder mass an pende dren rhan har mishto hi.

²¹ Ko pipaskro oun ko rhapaskro venn čorvelo, oun kolenge, kay kamenn gar te boudrell, vell ko tsiro, kay hi len či te rivell har koola hoy paash hi.

O deesh-te-shobto lab

²² Shoun ap tiro dadeste oun tiri date! Yon dan tout o djipen. Ma dik tele ap lende, te van le phouro.

²³ Mouk touke o čačepen oun o gosvepen boud moldo te vell! Mouk touke hako tsiro čomone te penell, te hayvess lauter mishto.

²⁴ Barhtelo hi i dad, te hi leskro čavo an o čačepen tardo oun les i gosevo dji hi.

²⁵ Doleske kre tiro dades oun tiri day barhteles! Kre, te givenn le i barhtyatar pral toute.

O deesh-te-eftato lab

²⁶ Miro čavo, kre tiro dji mange pre, oun dja ap mire dromma!

²⁷ Ma dja pash i loubyate, vitar gar pash o vavareskri romyate. Kolla hi har i brounna, hoy dour tele djal, kay veh gar bouder vin.

²⁸ Yon hi har čorepangre, kay lourenn khatemen pash o drom, oun anenn boud morshen yaake dour, te rhorhenn le pengre romyen.

O deesh-te-orhtato lab

²⁹ Koneske hi ropaske? Koneske djal djoungelo? Koon krell čingepen? Koon hi bibarhtelo? Kones hi douk kek nasslepah? Kones hi mate yaka?

³⁰ Kova hi kolla, kay dour an i rati gomme pash i mool beshdo hi, oun zorelo vavar pipen khetne čorenn oun piyenn.

³¹ Ma dik i mool an, te hi li yaake shoukar loles an o khoro, oun djal tele har djet.

³² O vavar dives djal touke yaake, har te dandrals tout i čilačo sap.

³³ Tire yaka dikenn kova, hoy gar koy hi. Oun tiro dji penell touke dinelo koova.

³⁴ Oun tou hal har yek, kay hi čiddo an i shiffo, hoy djal pral oun tele ap o baro pani, oun har savo, kay hi kote beshdo pral pre ap o pesso kasht.

³⁵ Palle peneh: “Mange hi, har dans le man, ninna te hayvom kek douk, har te marans le man khetne, ninna te doukell mange či. Te hom vi-sodo, palle djau pale koy.”