Gosewe laba 22 - O Debleskro Lab 2024 (Sinte-Manouche)1 Te rakrenn le pral toute lačo koova, hi kova feteder har baro bravlepen. Te dikenn le lačes ap toute, hi kova feteder har roup oun sonakay. 2 Bravelen oun čorvelen hi yek koova khetne: Kol douyen kras o baro Devel. 3 Koles i gosevo dji hi, kova dikell, har i bibarht vella oun khatrell pes. Kolen či an o shero hi, kolla nashenn doureder, oun i bibarht vell ap lende. 4 Kova, kay krell pes gar bares oun djivell o baro Debleha, lell bravlepen oun sharepen oun o čačo djipen. 5 O drom, kay i čilače djana, hi pherde soubyengre bourra oun shelle, kay nay stakrenn le dren. Kova, kay ap peskro djipen yak dell, djal kote gar. 6 Sike i tikno čaves peskro drom, palle djal yob gar kolestar krik, ninna te vell lo phouro. 7 O bravelo hi o ray pral o čorveleste. Oun kova, kay patsell peske love, hounte boudrell koleske, pash koleste yob siyaan hi. 8 Kova, kay rhorhepen vin vitsrell har djob, kova anell bibarht dren. Palle nay djal lo bouder gar i vavarentsa yaake trouyel har yob kamell. 9 Kova, kay lačes ap i vavarende dikell, dell peskro maro i čorveleste. Ap leste vell barht vi-rakedo. 10 Trade ko pre-phourdes vin, kay sal pral halauter. Palle djal o čingepen leha. Oun kol čilače laba oun o praasepen djan ninna krik. 11 Kova, koles i djoudjo dji hi oun lačepen rakrell, koleskro maal hi o baro ray. 12 O baro Devel dell yak, te vell diklo, haveskre laba mishto oun čačo hi. Oun yob čakrell kol laba pre, hoy i phoukepaskro rakras. 13 Ko či-moldo, kay kamell gar te boudrell, penell: I levo hi vin ap o drom, kay nay rhals man. 14 O mouy i vavareskro romyatar hi har i grouba, hoy dour tele an i phoub djal. Oun kolla perenn dren, pral kolende o baro Devel rhoyedo hi. 15 Tikne čave krenn dinelo koova. Te rhan le dava, krenn le kova bouder gar. 16 Kova, kay rikrell i čorveles tele, te vell yob kokres bravleder, ninna kova, kay dell i braveles čomone, kova krell, te vell lo kokres čorvelo. Triyanda goseve laba 17 Shoun mishto oun de yak ap i laba kol gosevendar! Le mire laba an o dji, hoy touke sikrenn, hoy mishto oun čačo hi. 18 Ma biste len! Har shoukar hi, te nay peneh len doureder! 19 Kamoms, te dikess oun rikress ap o baro Debleste. Doleske penau me touke kova kava dives. 20 Me činom touke 30 (triyanda) laba pre, hoy touke penenn, hoy te kress, hoy touke mishto hi, 21 te sikrap toute, hoy o čačepen hi, yaake te nay peness koleske, kay tout bičras, hoy lo kamell te djinell. O ersto lab 22 Ma rande o čorveles vin, doleske kay lo čorvelo hi! Te hal leha glan i čačepangre, ma le leskro čačepen krik. 23 O baro Devel lell lengro koova an o vast. Oun kova, kay len vin randas, koleske lell yob o djipen krik. O douyto lab 24 Mouk tout gar dren yekeha, kay sik an bari rholi vell. Ma ab leha khetne beshdo! 25 Palle nay djal touke yaake, te veh har yob, oun pereh an i bibarht. O triinto lab 26 Ma ab yek kolendar, kay denn pengro dadeskro vast oun penenn, te playsrenn le i siyaan i vavarenge. 27 Te nay playsreh lat palle gar, lenn le ninna tiro čiben tel toute krik. O starto lab 28 Ma čip kol phoure barra krik, hoy sikrenn har baro tiro them hi, oun hoy tire phoure kote čivan. O pančto lab 29 Dikeh i morsh, kay peskri boudi hayvella, palle djiness, kova nay boudrell bare rayenge. Savenge, kay gar an-diklo hi, boudrell lo gar. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.