Gosewe laba 20 - O Debleskro Lab 2024 (Sinte-Manouche)

¹ Te piyeh i zorelo pipen, veh divyo oun saneh pral lautereske. Kova, kay yaake boud piyell, te vell lo mato, koles hi kek gosvepen.

² I baro ray, te dell lo trad, palle hi kova, har te dell i levo gole. Kova, kay leskri rholi ap peste tserdell, nashrell peskro djipen.

³ O morsh, kay rikrell pes o čingepastar krik, vell sharedo. Kolla, kay rodenn o čingepen, hi halauter dinele.

⁴ Ko či-moldo, kay kamell gar ap peskri phoub te boudrell an o čačo tsiro, kova hatsell či an ko tsiro, kay o djob dren anlo vell.

⁵ Kova, hoy i mensho peske glan lell, hi dour tele an peskro dji har pani an i brounna. I gosevo anell kova nay pre.

⁶ Boud menshe sharenn pen pengro lačepah. Nay hatseh čačepah i morshes o labestar?

⁷ Kova, kay an o čačepen tardo hi oun o Debleskro drom gar moukell, barhtelo hi leskre čave, kay pal leste venna.

⁸ I baro ray, kay o čačepen vin rakrella pral i menshende, hatsell kolen vin, kay čilačo hi.

⁹ Koon nay penell pestar: Me rikrom miro dji djoudjes, man hi kek doosh?

¹⁰ I vaga, hoy gar čačes sikrella, har pharo čomone hi, oun i khoro, kay gar yaake boud dren hi, har penlo vas, kol douy hi i djoungelo koova glan o baro Debleskre yaka.

¹¹ An kova, hoy i tikno čavo krell, moukell pes te dikell, har yob vella: i morsh, kay djivell i djoudjo djipen oun djal o čačo drom oder gar.

¹² O kand, hoy shounell oun i yak hoy dikell, kol douyen kras o baro Devel.

¹³ Te kameh o sopen, veh čorvelo. Kre sik taysarlakro tire yaka pre, palle vell tout doha rhapaske.

¹⁴ “Kava hi či moldo”, penell o ginepaskro. Oun te djal lo peske, palle sharell lo les!

¹⁵ Dell sonakay oun boud kouč barra. I koučeder koova hi i mouy, hoy rakrell, hoy mishto oun čačo hi.

¹⁶ Yek, kay dinelo doha hi, te dell lo peskro dadeskro vast oun penell, te playsrell lo i vavareskri siyaan, kolestar le leskri baya oun gar ko vavareskri baya, te hi tout čomone an o vast, bis te yob playsrell.

¹⁷ Čoredo maro hi goudlo. Pal i tsiro hi kova har tikne barra an o mouy.

¹⁸ Rake i vavarentsa pral kova, hoy touke glan lal, te vell kova mishto. Kova hounte kress, hoy tout ninna glan hi, har boud boudeder te kameh i kourepen te krell.

¹⁹ Kova, kay djal trouyel oun rakrell djoungelo koova pral vavarende, phoukrell ninna vin, hoy i vavar leske čorrhanes penan. Doleske rike tout pale kolestar, kay nay rikrell gar peskro mouy.

²⁰ Kova, kay pral peskro dades oun peskri date bibarht vin rakrell, koleske djal har yek, koleskri momeli vin djal an i kali rat.

²¹ Te kameh sik kova te lell, hoy yek tire phourendar peskre menshenge pale moukell, palle anell kova touke kek barht.

²² Ma le touke glan, te dess o čilačepen pale, hoy yek ap toute kras. Dik ap o baro Debleste! Kova lell tiro koova an peskro vast.

²³ I bikepaskro, kay čivell pash yekeste sau saster ap i vaga oun pash i vavareste i vavar saster, kova krell i djoungelo koova glan o baro Debleskre yaka. I vaga, hoy i rhorheno pharepen sikrell, hi gar mishto.

²⁴ O baro Deblestar vell, har o djipen hakenestar djal. Har djinell i mensho, kay leskro drom les anell?

²⁵ Kova, kay sik penell: “Me dau man sovel pash o baro Debleste, te dap les kava te kova”, oun moukell les peske gar glan kova an o shero trouyel te djal, har nay rikrell lo peskro lab, koleske hi peskre laba har dorya, an kolende yob dren stakrell oun perell.

²⁶ I baro ray, kay gosevo hi, hatsell i čilačen dran peskre menshende vin, oun les hi kek dji lenge oun dell len pengri phagi.

²⁷ O mensheskro dourho hi har i momeli o baro Deblestar. Koleha nay dikell o mensho an peste dren oun dikell, hoy an peskro dji hi.

²⁸ O baro rayeske ačell leskri rayeskri zoor yaake rah har lo o lačepen oun o čačepen krella.

²⁹ O raylepen i terne morshendar hi lengri zoor. Oun parne balla hi o shoukapen i phourenge.

³⁰ Ratle dava lenn o čilačepen krik. Oun dava djan koleske, kay dino vell, an o dji.