Gosewe laba 2 - O Debleskro Lab 2024 (Sinte-Manouche)O Devel dell o čačo gosvepen 1 Miro čavo, shoun ap mire laba, oun rike tout ap kova, hoy me touke penom, 2 de yak ap o gosvepen, oun kre tiro dji pre, te hayvess lauter mishto! 3 Mange mandar gosvepen, oun pouč man, hoy te kress! 4 Rode pal miro gosvepen, har te rodals roup oun i khatedo bravlepen! 5 Palle hayveh, har nay djiveh o baro Debleha, oun prindjreh les boud oun boudeder. 6 O baro Devel hi kova, kay dell gosvepen. Lestar vell, te djinell oun hayvell i mensho boud koova. 7 Kolen, kay an o čačepen tardo hi, dell lo, hoy len hounte vell. Oun dell yak ap kolende, kay leskro drom djan, te krell lenge kek čomone. 8 Yob vell ap i rig kolenge, kay krenn o čačepen, oun rikrell peskre vasta pral kolende, kay djan ap leskro drom. 9 Palle hayveh, hoy glan o Debleste mishto oun čačo hi, har nay djah ap leskro drom, oun djiveh i djipen, hoy an leskre yaka lačo hi. 10 O Debleskro gosvepen vell an tiro dji, oun hoy yob toute sikrell, hi touke shoukar. 11 Oun tou deh yak, har te djivess, oun djineh, hoy mishto hi, 12 oun veh gar ap i čilačo drom, oun shouneh gar ap i menshende, kay rhorhepen rakrenna, 13 oun o čačo drom moukan, oun i djipen an o čilačepen djivenn. 14 Lenge hi shoukar, te krenn le čilačo koova, oun yon sanenn, te krenn le djoungelo koova. 15 Lengre dromma hi bango, o čačo dromestar djan le tele. 16 Ma kre har yon, te peress gar dren ap i shoukar laba i djouvyatar kay i vavareskri romni hi, 17 oun moukas peskro romes, koleha li khetne djas har li terno his, oun bistras, hoy li peskro romeste sovel das glan lakro Debleste. 18 Te djah an lakro kheer, veh ap i drom, hoy djal an o merepen. Lakre dromma djan an o moulengro them. 19 Hakeno, kay djal pash late dren, vell gar bouder pale, oun vell gar ap o drom, hoy an o djipen anell. 20 Doleske dja tou o drom, kay i lače djana, oun ač an o čačepen tardo. 21 Kolla, kay an o čačepen tardo hi, oun o Debleskro drom djan, djivenn an kava them oun ačenn koy dren. 22 Kolla, kay o čilačepen krenn oun o Debles moukenn, venn vin tradedo dran o them, yaake te hatseh bouder kek lendar. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.