Gosewe laba 19 - O Debleskro Lab 2024 (Sinte-Manouche)

¹ Hi feteder te hal an o čačepen tardo oun djiveh an čorvlepen, har te vess i dinelo, kay rakrell rhorhepen.

² Yek, kay peskro koova gar hayvell, hi či moldo, ninna te boudrell lo sik. Kova, kay sik nashell, perell.

³ O mensheskro dinlepen anell les ap i drom, kay nashrell lo pes. Oun palle dell lo o baro Debleste i doosh.

⁴ Bravele menshe hatsenn boud mala. I čorveleskre mala djan penge lestar.

⁵ Kova, kay rhorhras, har penas lo, hoy lo dikas oun shounas, kova lell peskri phagi. Oun kova kay rhorhepen pre anas, kova vell tapedo oun nay nashell gar peske.

⁶ Boud makenn o braveleske gvin troul o mouy, oun hakeno hi o maal kolestar, kay dell čomone čičeske.

⁷ I phrala i čorvelestar kamenn či lestar te djinell. Oun har boud boudeder rikrenn pen leskre mala lestar krik. Te kamell lo lentsa te rakrell, hi le bouder gar koy.

⁸ Kova, kay peske boud pashel anas, kras peske lačepen. Kova, kay lauter mishto hayvell, hatsell barht.

⁹ Kova, kay rhorhras, har penas lo, hoy lo dikas oun shounas, kova lell peskri phagi. Oun kova hoy rhorhepen pre anell, kova nashrell peskro djipen.

¹⁰ I lačo djipen hi gar i dinelenge. Har boud boudeder djal gar, te vell i boudepaskro o ray pral i pralstunende.

¹¹ Koles čačo gosvepen hi an o dji, kova vell gar sik rhoyedo, oun dikell gar ap i doosh i vavarendar. Doleske dikenn le pre ap leste.

¹² Har koy gole, hoy i levo dell, hi i rholi o baro rayestar. Oun leskro lačepen hi har o brishin ap i phoub, hoy krell lat pale sapeno.

¹³ I dinelo anell peskro dades an i bibarht. Oun i djouvel, kay i tselo tsiro čingepen rodell, hi har i kheer, kay dren della.

¹⁴ I kheer oun love lell o čavo peskro dadestar pal koleskro merepen. I romni, kay an peskro dji dikell, glan te rakrell li, vell o baro Deblestar.

¹⁵ Kova, kay kamell gar te boudrell, vell khino. Moukell lo peskre vasta an i gali čiddo, vell ko tsiro, kay hounte bokell lo.

¹⁶ Kova, kay rikrell pes ap o činlo lab, dell yak ap peskro djipen. Kova kay gar yak dell ap peskre dromma, merella.

¹⁷ Kova, kay peskro dji pre krell oun i čorveles dell, kova hi har yek, kay patsals o baro Debleske. Oun o baro Devel dell les ko lačepen pale, hoy lo kras.

¹⁸ Činge tiro čaveha yaake rah har yob terno hi, oun ap toute shounella. De yak, te dess les gar yaake, te merell lo.

¹⁹ Kova, kay dran i bari rholi čomone kras, mouk les peskri phagi te lell. Veh tou ap leskri rig, hounte kress tou kova pale te pale.

²⁰ Shoun ap kova, hoy yek ap toute penell, oun mouk touke čomone te penell, te vess pal kova gosevo.

²¹ Boud koova hi, hoy i morsh peske glan lell an peskro dji; kokres kova vella, hoy o baro Debles glan hi yekeha.

²² Kova, hoy i mensho rodell, hi kamlepen. Hi feteder te hal čorvelo har te vals i rhorheno.

²³ Te djiveh o baro Debleha, hi tout o djipen: tout hi doha rhapaske; tou nay soveh mishto; kek bibarht vell ap toute.

²⁴ I či-moldo, kay kamell či te krell, čivell peskro roy an o čaro, oun anell peskro vast gar pash o mouy.

²⁵ Te deh tou yekes, kay pral halauter sal, palle venn kolla gosevo, kolen či an o shero hi. Oun te čingreh koleha, kay hayvell, hoy mishto oun gar mishto hi, palle hayvell lo gomme boudeder.

²⁶ Kova, kay peskro dades dell oun peskri dat tradell, kova hi i čavo, hoy ladj ap peste oun lende anell.

²⁷ Miro čavo, te moukeh touke či bouder te penell, palle djineh tou sik bouder gar, hoy čačo hi.

²⁸ Yek, kay hounte penell, hoy lo dikas oun shounas, oun kay či moldo hi, leske hi o čačepen sapaske. Oun čilače menshe rhan o čilačepen har maro.

²⁹ Pral kol pre-phourden, kay pral halauter sanenn, vell i phagi vin rakedo; oun dava ap o doumo lell o dinelo.