Gosewe laba 18 - O Debleskro Lab 2024 (Sinte-Manouche)

¹ Koon pes i vavarendar krik rikrella, rodell, hoy peske kokres shoukar hi, oun kamell gar dren te dikell, hoy lačo leske vals.

² I dinelo kamell či te hayvell, yob kamell te sikrell, hoy yob lauter djinell.

³ Čilačepen oun ladj djan khetne. Oun kay ladj hi, koy i ninna praasepen.

⁴ I laba i gosevo menshestar hi har telstoune panya, hoy nashenna an i phoub oun denn djipen.

⁵ Hi gar mishto, te dell i čačepaskro morsh koles čačepen, kay i doosh ap peste anas, oun shounell gar ap koleste, kay an o čačepen tardo hi.

⁶ Kova, hoy i dinelo rakrell, anell čingepen. Oun leskro mouy dell pal dava gole.

⁷ O rakepen o dinelestar anell les an i bibarht. Oun yob taprell pes kokres an peskre laba.

⁸ Te shounah djoungelo rakepen pral i vavarende, hi kova menge har shoukar rhapen, oun djal menge tele har djet.

⁹ I či-moldo, kay kamell gar te boudrell, hi gar feteder har kova, kay marepen oun merepen anell.

¹⁰ O baro Devel hi har i baro zorelo kheer. Kova, kay an o čačepen tardo hi, nashell pash leste oun khatrell pes pash leste.

¹¹ Glan i braveleskre yaka hi leskro bravlepen har i zorelo foro oun har i bari massouri troul leste.

¹² Pre-phourdepen vell glan o perepen. Kolenge, kay krenn pen gar bares, vell ko tsiro, kay sharenn len i vavar.

¹³ Shoun! Oun palle rake! Te kreh vavarčandes, hal dinelo oun hounte ladjess tout.

¹⁴ I mensho kay zorelo an peskro dji hi, nay hidjrell peskro nasslepen. Te hi leskro dji phagedo, har nay hidjrell lo peskro pharepen?

¹⁵ I gosevo mensho kamell boud te djinell, oun krell peskre kanda pre, te hayvell lo, hoy čačo hi.

¹⁶ I mensho, kay i vavaren shoukar koova dell, krell peske i voudya pre pash i pralstunende.

¹⁷ An i čingepen dikell vin, har te vals koles čačo, kay glanstounes rakrell. Te vell palle o vavar, vell vin, kones čačepah čačes hi.

¹⁸ Te čingrenn pen douy zorele, oun tikne kashta venn vitsedo, te vell diklo, kones čačo hi, djal o čingepen krik, oun yon moukenn pendar tele.

¹⁹ I phraal, kay doukedo vas an peskro dji, moukell gar peha te rakrell, oun hi pandlo har i foro, kay hi i zoreli massouri troul leste. Oun o čingepen hi har ko kashteskro, hoy o foreskro voudar pandell.

²⁰ I morsh lell, hoy leskro mouy rakras. Dran leskre laba lell lo doha djipaske.

²¹ Kol laba, hoy yek rakrell, nay anenn leske o merepen oun ninna o djipen. Oun kova, kay boud rakrell, dikella, hoy leskre laba leske dren anenn.

²² Koon i romyat hatsas, hatsas i barht. O baro Devel dikas lačes ap leste.

²³ O čorvelo mangell o ropah, o bravelo rakrell pale i djiyeha, hoy hi har i bar.

²⁴ Dell mala, kay anenn tout an i bibarht. I čačo maal rikrell boudeder ap toute har i phraal.