Gosewe laba 17 - O Debleskro Lab 2024 (Sinte-Manouche)

¹ I trouk kotar maro oun kek čingepen hi feteder har i kheer pherdo mass o čingepah.

² I boudepaskro, kay djinell, hoy te krell, kova vell o ray pral o čaveste ko kherestar, kay ladj ap peste anas. Ko boudepaskro lell palle ninna kolestar, hoy i čave lenna pral pengro dadeskro merepen.

³ Yaake har o roup an i yag čiddo vell, oun o sonakay an i bob, yaake lell o baro Devel i menshengre djia an o yak.

⁴ Kova, kay čilačo koova krell, shounell ap midjak rakepen. Oun i rhorheno shounell ap save laba, hoy bibarht anenn.

⁵ Kova kay pral i čorveleste sal, kova praasell koles, kay les kras. Kova, kay barhtelo hi pral o vavareskri bibarht, savo lell peskri phagi.

⁶ Čavengre čave hi har i rayeskri stadi i phourenge. Oun i čave sharenn pen pengro papeha oun pengri mami.

⁷ Kova djal gar, te krenn i narvele bare oun shoukar laba. Vitar gar djal, te rakrell i an-diklo morsh rhorhepen.

⁸ Kova, kay vavaren čorrhanes love dell, te krenn le, hoy yob kamell, an koleskre yaka hi peskre love har dourkepangre barra, hoy anenn leske barht an hako koova.

⁹ Kova, kay i doosh i vavarendar bistrell, krell peske mala. Kova, kay pale te pale pral koy doosh rakrell, nashrell peskre malen.

¹⁰ Te čingreh yekeha, kay moukell pes čomone te penell, lell yob kova peske boudeder an o dji, har te dell yek sheel kope an i dineleste dren.

¹¹ I čilačo mensho rodell hako tsiro čingepen. Doleske vell yek pash leste bičedo, ko dell les i phari phagi.

¹² Hi touke feteder, te vess pash i bari divyi margodja, kolake i terne krik lino van, har te vess i dineleha khetne, kay narvelo koova krell.

¹³ Koleske lačepen kerdo vas, oun yob čilačepen pale das, dran koleskro kheer djal i bibarht bouder gar krik.

¹⁴ Mouk tele o čingepah yaake rah har lo gomme tikno hi! Čingepen hi har pani, hoy dran i phoub vin phagell. Mouk tele glan kova yob zorleder vell!

¹⁵ Kova hi douy kope i djoungelo koova glan o baro Debleskre yaka: te rakrell yek koles čačes, kay doosh ap peste las, oun ninna, te čivell yek doosh ap koleste, kay o čačepen kras.

¹⁶ Hoske hounte dals i dinelo love vin, te nay djal lo an i sikepaskri? Leske djal či an leskro shero.

¹⁷ I maal sikrell hako tsiro pengro kamlepen. Oun i phraal vell boldo, te vell lo touke ap i rig an phare tsirya.

¹⁸ Narvelo hi kova, kay dell peskro dadeskro vast oun penell, te playsrell lo i siyaan i vavareske.

¹⁹ Kova, kay čingepen kamell, kova kamell ninna o čilačepen. Kova kay hadell pes kokres pral, nay perell sik.

²⁰ Yek douy djiyentsa hatsell kek lačepen. Oun yek douy čipyentsa perell an i bibarht.

²¹ Kones i čavo hi, hoy narvelo koova krell, koles hi i pharo djipen. I dineleskro dades hi či sapaske.

²² I barhtelo dji hi mishto tiro sastepaske. Te hi touke hako tsiro ropaske, nashreh tiri zoor.

²³ O čilačo kamell i love, hoy leske čorrhanes dino vell, te rissrell lo o čačepen trouyel.

²⁴ Kova, kay hayvell, hoy mishto oun gar mishto hi, moukell pes gar tele te rikrell, te lell lo gomme boudeder gosvepen. I dinelo dikell kate te kote.

²⁵ I dinelo čavo krell peskro dadeske rholi. Oun leskri date vell ropaske pral leste.

²⁶ Kova hi gar mishto, te lell kova i phagi, kay kek doosh ap peste anas. Gomme djoungleder hi, te rhal i an-diklo mensho dava.

²⁷ Kova, kay peskre laba pale rikrell, sikrell, te djinell lo, hoy mishto hi. Kova, kay gar sik an i rholi vell, sikrell, te hi lo gosevo.

²⁸ Ninna i dinelo, kay rikrell peskro mouy, nay vell yaake an-diklo, har te vals lo gosevo. Te krell lo peskro mouy gar pre, hi lo i vavarenge har i gosevo.