Gosewe laba 16 - O Debleskro Lab 2024 (Sinte-Manouche)

¹ O mensho lell pes čomone glan an peskro dji. Hoy čačepah vella, penell o baro Devel.

² Hako drom hoy i morsh djal, hi an leskre yaka čačo, o baro Devel dikell dour an leskro dji.

³ Čip kova, hoy tou kameh te krell an o baro Debleskro vast, oun yob moukell kova yaake te vell, har touke glan lal.

⁴ Lauter, hoy o baro Devel kras, hi čomoneske, ninna kras lo o čilačo menshes ko diveske, kay i bibarht vella.

⁵ O baro Devel dikell rhoyedes ap hakeneste, koles i pre-phourdo dji hi. O vast pre, kova lell peskri phagi.

⁶ Ab lačes oun rike pash o Debleste, oun yob bistrell tiri doosh. Te djiveh leha, rikreh tout pale o čilačepastar.

⁷ Te dikell o baro Devel lačes ap kova, hoy yek krell, palle krell lo, te venn ninna kolla leskre mala, kay kaman leske čilačepen.

⁸ Hi feteder, te hi tout gar boud, oun kova lal touke khetne kek rhorhepah, har te vell tout boud bravlepen, hoy anal khetne o rhorhepah.

⁹ O mensheskro dji lell peske čomone glan, o baro Devel hi kova, kay anell leskre herya ap ko drom, har yob kamell.

¹⁰ Te rakrell i baro ray, hoy o Devel leske an o mouy čivell, palle rakrell lo o čačepen vin pral i mensheste yaake har čačo hi.

¹¹ I vaga, hoy o čačo pharepen sikrell, vell o baro Deblestar. Yob penas, har pharo i saster hounte vell, hoy o pharepen sikrell.

¹² Te krenn bare raya čilačo koova, hi kova i djoungelo koova glan o Debleste. Te krenn le o čačepen, ačell lengri rayeskri beshepaskri zoreles tardo.

¹³ I mensho, kay o čačepen rakrell, krell, te dikell o baro ray lačes ap leste. Yob kamell o morshes o labestar.

¹⁴ I baro ray, kay rhoyrell pes, nay bičrell yekes an o merepen. Oun i gosevo morsh krell lauter, te bistrell yob peskri rholi.

¹⁵ Te dikell o baro ray lačes ap yekeste, nay djivell kova pre. Oun leskro kamlepen hi har i brishin, hoy moukell o djob bares te vell.

¹⁶ Hi boudeder moldo te less gosvepen har te less sonakay. Te hayveh, hoy mishto oun gar mishto hi, hi kova touke feteder har roup.

¹⁷ Kolla, kay ap o čačo drom djan, ačenn dour krik o čilačepastar. Koon yak dell, havo drom yob djal, kova dell yak ap peskro djipen.

¹⁸ Koon pes bares krell, vell phagedo. Oun i pre-phourdo mensho perell.

¹⁹ Hi feteder te veh gar an-diklo oun djiveh i čorvelentsa, har te vess yek kolendar, kolen i baro mouy hi, oun djiveh foun lengro čoredo koova.

²⁰ Kova, kay dell yak ap o lab, hoy leske penlo vas, hatsell barht, oun kova hi barhtelo, kay čivell peskro dji ap o baro Debleste.

²¹ Kova kay hayvell, hoy mishto oun gar mishto hi, kova vell kharedo gosevo morsh. Oun yek, kay lače laba hatsell, hi i lačo sikepaskro.

²² Čačo gosvepen hi har djido pani koleske, kay les hi. O dinlepen hi i phagi kolenge, kay dinelo hi.

²³ I mensho i gosevo djiyeha rakrell laba, hoy mishto hi. Oun kova, hoy lo penell, sikrell i vavarende, hoy te krenn le.

²⁴ Kamle laba hi har gvin, rakrenn kamles an o dji oun denn nevi zoor.

²⁵ Kote dell i drom, kova i morsheske čačes vin dikell, pal i tsiro anell lo les an o merepen.

²⁶ Te hi i boudepaskres bok, boudrell lo boudeder. Leskri bok penell leske, te krell lo doureder.

²⁷ I čilačo mensho rodell i drom, har nay doukrell lo i vavaren. Hoy lo rakrell, rhačell har yag.

²⁸ I midjak mensho anell čingepen. Oun kova, kay djoungelo koova pral vavarende rakrell, krell, te čingrenn pen lače mala.

²⁹ I čilačo marepaskro anell peskro rakepah peskro males ap i drom, hoy gar mishto hi.

³⁰ Kova kay i yakentsa dell oun peskro mouy khetne tserdell, koles hi čilačepen an o shero.

³¹ Parne balla hi har i kouč rayeskri stadi, hoy o Devel kolen dell, kay leskro drom djan.

³² Yek, kay gar sik rhoyedo vella, hi feteder har i čačo kourepaskro. Oun koon o ray pral peste hi, hi boudeder moldo har yek, kay i tselo foro dren lell.

³³ O mensho vitsrell tikne kashta, te djinell lo, hoy te krell. Har le perenn, kova vell o baro Deblestar.