Gosewe laba 15 - O Debleskro Lab 2024 (Sinte-Manouche)

¹ I kamlo lab krell te djal o vavareskri rholi pale. I lab, hoy o vavares doukrell, krell les rhoyedo.

² O gosevo rakrell yaake, te hayvenn i vavar, hoy mishto hi. Dran o narveleskro mouy vell či har dinlepen.

³ I yaka o baro Deblestar dikenn lauter, kova, hoy i čilače krenna, oun kova, hoy i lače krenna.

⁴ I lačo lab, hoy i vavares zoor dell, hi har o rouk, hoy djipen della. I midjak lab phagell leskro dji.

⁵ O dinelo shounell gar ap leskro dadeste, te dell lo les trad. Kova, kay shounell koy pre, hi gosevo.

⁶ Kova, kay an o čačepen tardo hi, les hi boudeder har les hounte vell djipaske. Kova, hoy i čilačo khetne lell, anell leske bibarht.

⁷ I gosevengro rakepen sikrell i vavarende, hoy lenge mishto hi. Kova, hoy i dinelen an o shero hi, hi či moldo.

⁸ O baro Devel dikell rhoyedes ap kova, hoy o čilačo leske anell. Te mangenn les kolla an, kay an o čačepen tardo hi, dikell lo lačes ap lengro mangepen.

⁹ O baro Devel dikell rhoyedes ap kova, hoy i čilače krenn. Koon peskro tselo djiyeha o čačepen krell, koles kamell yob.

¹⁰ Kolla, kay o Debleskro drom moukenn, lenn i phari phagi. Koon moukell pes či te penell, hounte merell.

¹¹ O baro Devel djinell, hoy hi an o telstunepen oun an o moulengro them. Har boud boudeder djinell yob, hoy an i menshengre djia hi.

¹² O pre-phourdo rhoyrell pes pral koleste, kay leske penell, hoy lo gar mishto kras. Oun yob djal gar pash kolende, kay gosevo hi.

¹³ I barhtelo dji moukell o mouyes te sal. Kones i pharo dji hi, koles hi či sapaske.

¹⁴ Yek, kay hayvell, hoy mishto oun gar mishto hi, kova rodell, har te djinell lo gomme boudeder. O narvelo bokell pal dinelo koova.

¹⁵ Kolen, kay i pharo dji hi, kolenge hi hake divessa čilače. Yekes, kay shoukapen an o dji hi, leskro dji givell oun bashrell hako dives.

¹⁶ Hi feteder, te hal čorvelo oun djiveh o baro Debleha, har te hi tout i baro bravlepen oun hounte daress halautereske.

¹⁷ Hi feteder te hi tout sharha te rhal tire malentsa, har lačo groumyengro mass kolentsa, kay hi rholi an lende.

¹⁸ I morsh an koleste rholi hi, anell čingepen. Yek, kay gar sik rhoyedo vell, kova lell i yag dran o čingepen.

¹⁹ O drom kolendar, kay kamenn gar te boudrell, hi pherdo soubyengre bourra. Kolenge, kay o čačepen krenn, hi kek barra an o drom čiddo.

²⁰ I gosevo čavo krell peskro dades oun peskri dat barhteles. I dinelo sal pral lende.

²¹ Kones či an o shero hi, kova kamell narvelo koova. I morsh, kay hayvell, hoy mishto oun gar mishto hi, ačell ap o čačo drom.

²² Kova, hoy yekes an o shero hi, djal gar mishto, te poučell lo gar i vavarendar, hoy yon patsenna. Kote, kay boud menshe hi, kay denn pengro gosvepen pashel, kote djal mishto.

²³ Barhtelo hi o morsh, te djinell lo, hoy te rakrell lo. Har lačo hi o čačo lab ap o čačo tsiro.

²⁴ Kova, kay hayvell, hoy mishto oun gar mishto hi, koleske djal peskro drom pre an o djipen. Oun yob rikrell pes pale o dromestar, kay djal tele pash i moulende.

²⁵ O baro Devel phagell o kheer kolestar, kay pre-phourdo hi. Yob dell yak, te lell kek koy phoub i romyatar krik, kolakro rom meras.

²⁶ O baro Devel dikell rhoyedes ap ko midjak koova, hoy lell pes i čilačo glan. Lačes dikell lo ap koleste, kay rakrell lače laba.

²⁷ Koon rhorhepah peskro bravlepen khetne lell, anell peskri familya an i bibarht. Koon moukell pes gar te ginell, savo djivell.

²⁸ Koon an o čačepen tardo hi, rakrell peskro djiyeha glan kova yob čomone penell. Dran o mouy o čilačestar venn čilače laba vin har divyo pani.

²⁹ O baro Devel hi dour krik kolendar, kay čilačo hi. Yob shounell kova, hoy kolla lestar mangenna, kay an o čačepen tardo hi.

³⁰ Te dikeh lačes ap yekeste, vell lo barhtelo. Te peneh leske i lačo lab, vell lo zorelo.

³¹ Te shouneh ap yekeste, kay penell touke, hoy touke mishto hi, palle hal mashkral i gosevende.

³² Koon gar shounell, te vell lo trad dino, činell pes an peskro mass. Koon moukell pes čomone te penell, kova vell gosveder.

³³ Kolla, kay djivenn o baro Debleha, dikenn dren, hoy lenge mishto hi, oun venn gosveder. Kolenge, kay krenn pen gar bares, vell ko tsiro, kay sharenn len i vavar.