Gosewe laba 14 - O Debleskro Lab 2024 (Sinte-Manouche)

¹ I gosevi djouvel krell, te vell lakro kheer zoreles tardo. I dineli djouvel phagell les peskre vastentsa tele.

² Kova, kay kamell o baro Debleha te djivell, djal o čačo drom. Koon či lestar kamell te djinell, djal ap bange dromma.

³ O rakepen o dinelestar sikrell peskro pre-phourdepen. I laba i gosevendar hi har vasta troul leste, hoy rikrenn len.

⁴ Kote, kay kek groumya hi, vell kek djob dren anlo. I zoryah i groumyendar aneh boud djob dren.

⁵ Te penell i morsh o labestar, hoy lo dikas oun shounas, rakrell lo o čačepen. Te penell i rhorheno, hoy lo dikas oun shounas, anell lo rhorhepen pre.

⁶ I pre-phourdo, te rodell lo o gosvepen, hatsell lo les gar. Kova, kay peskro djiyeha rakrell, koleske hi gar phares čomone dren te dikell.

⁷ Ma dja khetne i narveleha! Tou shouneh lestar či vavar har dinelo koova.

⁸ O gosevo dell yak har lo djivell, doleske hi lo gosevo. I narvele perenn hako kopo ap dinlepen dren. Oun yaake rhorhenn le pen kokres.

⁹ I dinele sanenn pral i doosh, hoy yon ap pende anan. O Devel dikell lačes ap kolende, kay o čačo drom djan.

¹⁰ Ko mensho, koleskro dji rovell, hi kokres. Oun ninna te stell leskro dji i barhtyatar, nay hayvell kek vavar čačepah leskri barht.

¹¹ O kheer o čilačestar vell tele phagedo, i familyake kolestar, kay djal o čačo drom, djal mishto oun vell bareder.

¹² Hi menshe koy, kay patsenn, kay lengro drom o čačo drom hi, oun djinenn gar, kay anell lo len an o merepen.

¹³ Ninna te sal yek, nay rovell o dji. Oun pal o sapen vell o ropen.

¹⁴ Koon bange dromma djal, koleske djal yaake, har lo djivas. Ninna i lačo morsheha hi yaake: yob lell pale pal kova, hoy yob kras.

¹⁵ Koles či an o shero hi, kova patsell hako lab, hoy yek ap leste rakrell. Kones i gosevo dji hi, kova dell yak, hoy lo krell oun kay lo djal.

¹⁶ O gosevo darella oun rikrell pes pale o čilačepastar. O dinelo vell sik rhoyedo oun patsell, te nay djal leske kek čilačepen.

¹⁷ Koon sik an i rholi vell, krell yek dinelo koova pal o vavar. Oun koon lell pes čilačepen glan, pral koleste hi le rhoyedo.

¹⁸ Kolen či an o shero hi, lenna pale, hoy dran lengro dinlepen vell. O gosevo djinell boud. Kova hi leske har i rayeskri stadi, hoy krell les shoukar.

¹⁹ I čilače hounte vitsrenn pen tele glan i lačende. Ava, yon hounte vitsrenn pen tele glan i voudya kolendar, kay an o čačepen tardo hi.

²⁰ Kek kamell o čorveles, vitar gar kova, kay pash leste hi. O braveles hi boud mala.

²¹ Kova kay ap o vavareste tele dikell, anell doosh ap peste. Barhtelo vell kova, koles i dji i čorvelenge hi.

²² Kolen, kay čilačepen an o shero hi, kolla djan nashedo. Kolla, kay kamenn o lačepen te krell, kolenge hi i vavar menshe lačes oun rikrenn ap lende.

²³ Kote, kay boudrenn le, venn le ninna playsedo. Kote, kay rakepen hi oun či vavar, hi len gar doha djipaske.

²⁴ O gosvepen hi har shereskro sonakay i gosevenge. Ap o shero i narvelendar hi lengro dinlepen har i stadi.

²⁵ Kova, kay doureder penella an o čačepen, hoy lo dikas oun shounas, kova lell menshen dran o merepen vin. Kova, kay anell rhorhepen ap i vavareste pre, hi i rhorheno.

²⁶ Kova, kay djivell o baro Debleha, koles hi zoor an o dji. Ninna pral leskre čavende rikrell o baro Devel peskre vasta.

²⁷ Kova, kay o baro Debleha djivell, nay djivell kek daryah. Yob rikrell peskre herya pale, te perell lo gar an i dorya, hoy tserdenn les an o merepen.

²⁸ Te hi i baro rayes boud menshe, palle hi lo zorelo. Te hi les gar boud menshe, djal lo tele.

²⁹ Kova, kay gar sik rhoyedo vell, hi gosevo. Koon sik rhoyedo vella, sikrell har dinelo yob hi.

³⁰ Shoukapen an o dji krell o tselo menshes sasto. I dji, hoy zilverell, hi har i nasslepen, hoy i kokale pre rhal.

³¹ Koon zoryah i čorveles tele rikrell, kova praasell koles, kay o čorveles kras. Kones leske i baro dji hi, sharell o Debles.

³² O čilačo vell tele vitsedo dran leskro čilačepen. Kova, kay an o čačepen tardo hi, koleskro patsepen rikrell les ninna gomme an o merepen.

³³ O gosvepen hi khere an o dji kolestar, kay hayvell, hoy mishto oun gar mishto hi. An i dinelengre djia hi kek gosvepen.

³⁴ Te vell hakeneste peskro čačepen dino an yek them, palle vell kava them an-diklo. Kote, kay i menshe o čačo dromestar tele djan, hounte ladjenn le pen.

³⁵ I baro ray dikell lačes ap peskro boudepaskro, kay lauter mishto hayvell. Oun leskri rholi vell ap koleste, kay vi-ladjedo koova krell.