Gosewe laba 13 - O Debleskro Lab 2024 (Sinte-Manouche)

¹ I gosevo čavo shounell ap peskro dadeste, te penell yob leske, hoy lo gar mishto kras. I pre-phourdo sal oun shounell ninna gar, te vell lo trad dino.

² I lačo mensho djivell ko lačepastar, hoy dran leskre laba vella. I phoukepangre bokenna pal o kourepen.

³ Kova kay ap peskro rakepen yak dell, kova dell yak ap peskro djipen. Koles i baro mouy hi, kova tserdell bibarht ap peste.

⁴ Kova, hoy yek kamell, kay kamell gar te boudrell, vell les gar. Kolenge, kay boud boudrenn, hi doha koy.

⁵ O rhorheno rakepen hi djoungeles glan i yaka kolestar, kay an o čačepen tardo hi. O čilačo krell praasedo koova oun vi-ladjedo koova.

⁶ Lengro čačo koova anell kolen dran i bibarht vin, kay kek doosh ap lende hi. I doosh i čilačendar anell len an i bibarht.

⁷ Kote hi yek, kay krell, har te vals lo bravelo. Oun les hi či. Oun kote hi yek, kay krell, har te vals lo čorvelo. Oun les hi boud bravlepen.

⁸ I bravelo nay ginell peskro djipen vin. I čorveleste dell kek trad. Pash leste hi či te lell.

⁹ Koon an o čačepen tardo hi, hi har i momeli, hoy barhteles rhačell, oun i čilačo har i momeli, hoy djal vin.

¹⁰ Mank i pre-phourde hi hako tsiro čingepen. Te hal gosevo, moukeh touke čomone te penell.

¹¹ O bravlepen, hoy sik khetne lino vas, djal ninna sik pale krik. Kova, kay anell lokes peskre love khetne, lell boudeder oun boudeder.

¹² Te dikell yek i rah tsiro ap čomone, oun kova vell gar, vell leskro dji pharo. Te vell kova, ap hoy yek yaake rah dikas, palle djivell leskro dji pale pre.

¹³ Koleske, kay i lačo lab i heryentsa stakrell, djal djoungeles. Koleske, kay rikrell pes ap ko lab, djal mishto.

¹⁴ I laba, hoy i gosevo rakrell, hi har djipaskro pani, oun sikrenn havo drom yek hounte djal, te perell lo gar an o merepaskre shelle.

¹⁵ Kol menshe, kay hayvenn, hoy hounte kerdo vell, hatsenn mala. I phoukepangre djan i drom, kay anell len an i bibarht.

¹⁶ Hakeno, kay gosevo hi, krell či, te rakras lo gar peskro djiyeha pral kova. I dinelo mensho dell peskro narvlepen vin gole.

¹⁷ I čilačo bičepaskro anell bibarht. I bičepaskro o labestar rakrell yaake, te vell lauter pale mishto.

¹⁸ An čorvlepen oun ladj vell kova, kay moukell pes či te penell. An-diklo vell kova, kay shounell, te vell lo trad dino.

¹⁹ Te vell kova, hoy yek yaake rah kamas, hi lo barhtelo. I dinele rhoyrenn pen, te hounte moukenn le pengro čilačo drom.

²⁰ Kova, kay khetne hi kolentsa, kay gosevo hi, kova vell ninna gosevo. Kova kay i maal hi i dinelentsa, kova vell bibarhtelo.

²¹ Kolla, kay o Debleskro dromestar tele djan, kolen lell i bibarht palla oun taprell len. Kolla, kay an o čačepen tardo hi, lenn lačo koova.

²² Kova, hoy i lačo morsh pale moukell, vell doureder dino leskre čavende oun čavengre čavende. O bravlepen kolestar, kay an o čilačepen djivas, lell kova, kay an o čačepen tardo hi.

²³ Boud djob vell bares ap i phoub i čorvelenge. Lengro čačepen lenn le gar, oun boud merenn i bokatar.

²⁴ I dad, kay peskro čaveste kek phagi dell, krell leske gar mishto. Koon les kamell o djiyestar, kova rikrell pes gar pale, te dell lo les i phagi.

²⁵ Koles, kay an o čačepen tardo hi, hi doha rhapaske. O per i čilačestar bokella.