Gosewe laba 12 - O Debleskro Lab 2024 (Sinte-Manouche)

Te shouneh ap o Debleste, hal ap o drom an o djipen

¹ Koleske, kay kamell gosevo te vell, hi shoukar, te vell leske penlo, hoy lo gar mishtes kras. Kova, kay moukell pes či te penell, ačell dinelo.

² Ap i lačo mensheste dikell o baro Devel lačes. Pral koleste, koles o čilačepen glan hi, rakrell lo i phagi vin.

³ O čilačepen dell kekes i zoor, te ačell lo zoreles tardo. Kova, kay an o čačepen hi, ačell zoreles tardo har i rouk bare drabentsa.

⁴ I romni, kay peskri boudi mishto krell, hi peskro romeske har shereskro sonakay. I romni, kay anell ladj ap peskro romeste, hi har i djoungelo nasslepen an leskre kokale.

⁵ O Debleskre menshe kamenn o čačepen te krell. Čilače menshen hi či an o shero har rhorhepen.

⁶ I čilačengre laba kamenn yekes an o merepen te anell. O rakepen kolendar, kay o čačo drom djan, lell len dran o merepen vin.

⁷ I čilače venn tele vitsedo oun hi gar bouder koy. O kheer kolendar, kay an o čačepen tardo hi, ačell tardo.

⁸ Kones gosevo koova an o shero hi, kova vell sharedo. Kones dinelo koova an o shero hi, ap koleste dikenn le tele.

⁹ Hi feteder, te hi yek čorvelo oun hounte djal ap i boudi, har te krell pes yek bares oun les hi gar doha rhapaske.

¹⁰ Kova, kay an o čačepen tardo hi, les hi i dji peskre firhenge. I čilačen hi kek dji lenge.

¹¹ Koon ap peskro kotar phoub boudrell, koleske vell boud maro. Koon savo koova pal nashell, hoy či moldo hi, kova hi narvelo.

¹² Čilače menshenge hi shoukar, te krenn le midjak koova. Kolla, kay an o čačepen tardo hi, hi zoreles tardo oun krenn lačo koova.

¹³ O čilačo taprell pes kokres an peskre rhorhene laba. Kolla, kay an o čačepen tardo hi, venn vin dran i bibarht.

¹⁴ Koon lačepen rakrella, djivell ninna lačes. I mensho lell pale, hoy lo peskre vastentsa krell.

¹⁵ O drom, kay o dinelo djal, hi an leskre yaka čačo. I gosevo mensho shounell ap kova, hoy vavar leske penenn, te krell lo.

¹⁶ Koon peskri rholi sik sikrell, hi dinelo. Koon krell, har te shounals lo o praasepen gar, kova hi gosevo.

¹⁷ I morsh o labestar rakrell o čačepen vin. I rhorheno, kay dell glan, te penell lo, hoy lo dikas oun shounas, anell rhorhepen pre.

¹⁸ Laba, hoy sik vin rakedo venna, nay denn čourye har i rharo. O rakepen i goseve menshendar anell sastepen.

¹⁹ O čačo rakepen ačell hako tsireske. Rhorhene laba rikrenn gar rah.

²⁰ Rhorhepen hi an i djia kolendar, kay čilačo koova vin krenn. Kolla, kay yaake rakrenn, te vell kek čingepen pre, venn barhtelo.

²¹ Kek čilačo koova vell ap kolende, kay an o čačepen tardo hi. Ap i čilačende vell boud bibarht.

²² O baro Devel dikell rhoyedes ap kolende, kay rhorhenna. Lačes dikell yob ap kolende, kay krenn o čačepen.

²³ Yek, kay gosevo hi, sikrell gar, har boud yob djinell. I dinele denn pengro dinlepen vin gole.

²⁴ Koon boud boudrell, vell o ray pral vavar. Koon peskre vasta an i gali čiddo moukell, vell i boudepaskro, oun hounte boudrell tel dava.

²⁵ I pharo dji tserdell i menshes tele. I lačo lab krell les barhtelo.

²⁶ Kova, kay an o čačepen tardo hi, hatsell peskro drom. I čilačen anell pengro drom kote, kay djan le nashedo.

²⁷ Koon peskre vasta an i gali čiddo moukell, hatsell či, hoy yob nay rhals. Koles, kay boud boudrell, hi boud rhapaske.

²⁸ O djipen hi kote, kay djan le ap o čačo drom. Kava drom hi mishto kerdo oun anell gar an o merepen.