Gosewe laba 11 - O Debleskro Lab 2024 (Sinte-Manouche)

¹ I vaga, hoy sikrell gar čačes, har pharo čomone hi, hi i djoungelo koova glan o baro Debleskre yaka. Yob hi barhtelo pral koleste, kay playsrell pal o čačo pharepen.

² I pre-phourdo dji vell sik an i ladj. I dji, hoy hadell pes gar, hi gosevo.

³ Lengro djoudjo dji anell i lačen ap o čačo drom. Ko midjak koova, hoy i phoukepangre krenn, vell ap lende pale oun phagell len.

⁴ O bravlepen hi i bravelenge či moldo ap ko dives, kay o Debleskri rholi pral i menshende vell. Kol menshe, kay an o čačepen tardo hi, venn vin lino dran o merepen.

⁵ Ko čačo koova, hoy o Debleskre menshe krenna, krell lengre dromma čačo. Ko čilačo nashrell pes an peskro čilačo koova.

⁶ Ko čačo koova, hoy o Debleskre menshe krenna, lell len vin dran o merepen. I phoukepangre venn tapedo an pengri bok pal i love.

⁷ Ap ko dives, kay merell o čilačo, merell ninna kova, kay lo peskro dji pre čivas. Kova, hoy leske boud moldo his, hi čičeske.

⁸ Kova, kay an o čačepen tardo hi, vell vin lino dran i bibarht. Oun pal leste vell ko čilačo koy dren.

⁹ Yek, kay kamell či o Deblestar te djinell, anell peskro rakepah i vavaren o Debleskro dromestar tele. Kolla, kay an o čačepen tardo hi, lenn pengro gosevo rakepah vavaren dran o merepen vin.

¹⁰ Te djal i lačenge mishto, palle hi i menshe an o tselo foro barhtelo. I čilače, te merenn le, denn le an o foro gole i barhtyatar.

¹¹ O Debleskre menshe anenn o Debleskri barht pral o foro. Oun o foro vell zorelo. Dran o mouy i čilačendar vell sau rakepen, hoy phagell o foro tele.

¹² Koon praasell o vavares, hi narvelo. I gosevo morsh rikrell peskro mouy.

¹³ Kova, kay djoungelo koova pral i vavarende rakrell, phoukrell, hoy lo čorrhanes shounas. I morsh o labestar rikrell kova peske.

¹⁴ Kote, kay kek an o them hi, kay i menshenge o drom sikrell, djan le tele. Kote, kay boud penenn, har nay doureder djal, djal i menshenge mishto.

¹⁵ Kova, kay peskro dadeskro vast das, te playsrell lo i vavareskri siyaan, koles khaytell kova, hoy lo kras. Koon kova gar kamell te krell, koleske djal feteder.

¹⁶ I kamli djouvel vell sharedo. Oun i morsh, kay hayvell pes te kourell, vell bravelo.

¹⁷ Kova, kay lačo ap o vavareste hi, krell peske kokres mishto. Kova, kay o vavares doukrell, doukrell pes kokres.

¹⁸ I čilačo mensho lell peske sau koova khetne, hoy leske gar ačell. Koon an o čačepen peskri boudi krell, lell i playsepen, hoy ačell.

¹⁹ Te kreh o čačepen, hal ap o drom an o djipen. Te nasheh o čilačepen palla, djah ap o drom an o merepen.

²⁰ O baro Devel dikell rhoyedes ap kolende, kolen douy djia hi. Lačes dikell lo ap kolende, kay o čačo drom djan.

²¹ Tou nay deh tiro vast koy pre: O čilačo lell peskri phagi. Kolla, kay an o čačepen tardo hi, venn vin lino dran o merepen.

²² I shoukar djouvel, kay djinell gar, hoy čačo hi, hi har i sonakaskri goustri an o nak i balestar.

²³ Kova, hoy kolla kamenn, kay o čačepen krenn, anell lenge lačepen. Oun kova, hoy i čilače kamenn, anell lenge o Debleskri rholi.

²⁴ Kote hi yek, kova dell oun dell; oun yob lell boudeder oun boudeder. Oun kote hi i vavar, kova hi činlo oun dell či; oun vell čorvleder.

²⁵ Kones i baro dji i vavarenge hi, koleske vell yaake boud dino, te vell lo boudeder har čalo. Oun kova, kay i trousheles pani dell, koles vell ninna pani dino.

²⁶ Kova, kay djob pale rikrell, pral koleste rakrenn le bibarht vin. Oun barht rakrenn le vin pral koleste, kay djob bikrell.

²⁷ Kova, kay kamell o tselo djiyeha o lačepen te krell, ap koleste dikenn le lačes. Kova, kay o čilačepen rodell, ap koleste vell kova.

²⁸ Kova, kay čivell peskro dji ap peskro bravlepen, merell tele har patria. Kolenge, kay krenn o čačepen, djal mishto har i zenelo rouk.

²⁹ Kova, kay gar yak dell ap peskro kheer oun ap peskri familya, pral koleste vell i phourdepen, hoy lauter krik phourdell. Oun ko dinelo vell palle o boudepaskro kolestar, koles i gosevo dji hi.

³⁰ Kova, hoy i lačo oun čačo mensho krell, hi har i rouk, hoy o djipen dell. Ko mensho, kay gosevo hi, tserdell vavar menshen ap peskri rig.

³¹ Djiness, i lačo mensheske ap kay phoub vell o lačepen pale dino, hoy lo kras. Har boud boudeder vell palle o čilačepen pale dino kolenge, kay o čilačepen kran oun o Debleskro drom moukan.