Gosewe laba 1 - O Debleskro Lab 2024 (Sinte-Manouche)

Kava liil kamell touke čačo gosvepen te sikrell

¹ An kava liil hi i goseve laba o Davideskro čavestar, o Salomestar. Yob his i baro ray pral o Israel.

² Kal laba sikrenn mende, hoy čačo gosvepen hi, te nay hayvas, hoy men doureder anell, oun hoy gosevo rakepen kamell te penell.

³ Kol laba sikrenn mende, har te djivas mishto oun čačo, har te djivas i djipen kek rhorhepah, oun har te djas ap o čačo drom.

⁴ Yaake venn ninna kolla gosevo, kolen či an o shero hi. Oun terne morsha hayvenn, hoy hounte krenn le, oun dikenn dren, hoy mishto hi.

⁵ Kolla, kay gosevo hi, shounenn, har te venn le gomme gosveder. Kolla, kay siklo hi, hatsenn, har te djan le pengro drom.

⁶ Yon nay hayvenn goseve laba, oun rakepen, kay o čačepen dren khatedo hi, ava, laba, kay goseve menshe penan, oun save, kay hounte rodess, hoy yon kamenn te penell.

⁷ Glan halauter hounte djivess o baro Debleha, te kameh gosevo te vell. Koneske o gosvepen či moldo hi, oun koon kamell či te djinell, hi dinelo.

Ma dja kolentsa, kay anenn tout o čačo dromestar tele!

⁸ Miro čavo, shoun ap i laba, hoy tiro dad touke penell! De yak ap kova, hoy tiri day toutar kamell!

⁹ Kova hi touke har i shoukar stadi ap tiro shero, har i verkli troul tiri meen.

¹⁰ I čilače, te penenn le: Dik, hoy krah! Palle dja gar koy!

¹¹ Yon nay penans: “Am mentsa! Mer lourah yekes pre oun marah les. Mer nay hatsams saven, kay kek čilačepen an lengro shero hi. Kolen lah palla, te vell men čomone sapaske.

¹² Mashkral dran lengro djipen las len vin, oun bičras len tele pash i moulende an o moulengro them!

¹³ Čoras kouč koova menge, te kras mare khera pherdo kolestar.

¹⁴ Ab mentsa! Hakeno mendar lell yaake boud har ko vavar.”

¹⁵ Miro čavo, ma dja lentsa ap lengro drom! Rike tout krik lendar!

¹⁶ Yon denn an i herya, te krenn le čilačepen. Sik nashenn le, te marenn le menshen.

¹⁷ Čičeske vell i netsa glan i čirkle pre-pandlo. Yon dikenn lat oun djan gar dren.

¹⁸ Hi gar yaake kal morshentsa: Yon kamenn i vavaren te marell, oun hayvenn gar, te perenn le kokres an pengri netsa.

¹⁹ Yaake djal hakeneske, kay kamell o vavareskro bravlepen te lell. Savo mensho lell peske kokres o djipen.

O gosvepen rakrell

²⁰ O gosvepen hi har i day, kay kharell ap i dromma, oun dell gole ap i foryengre platse.

²¹ Yoy moukell pes glan i bare voudya an o foro te shounell, oun kote, kay boud menshe khetne venn:

²² T'mer, kolen či an o shero hi: Har rah kamenn t'mer dinelo koova te krell? T'mer sapangre, har rah kamenn t'mer pral o vavareste te sal oun les praasell? T'mer dinele, har rah penenn: Mer kamah gar te djinell, hoy čačo hi?

²³ Te shounans ap mande, har dom t'men trad, sikroms t'mende, hoy an miro dji hi, oun moukoms t'men mire laba te hayvell.

²⁴ Har kharom t'men, kaman gar te shounell. Har hadom miro vast, dan t'mer gar yak.

²⁵ T'mer moukan t'men či te penell, oun dan gar yak ap kova, hoy penom.

²⁶ Yaake kamau me ninna te sal, te vell i bibarht pral t'mende, ava, me sau, te vell kova, hoy darenna,

²⁷ oun vell pral t'mende har i zorelo baro dourho; te vell i bibarht pral t'mende har i phourdepen, hoy lauter khetne phagell; te vell i pharo tsiro oun bari daar pral t'mende.

²⁸ Palle denn le pal mande gole, oun me moukau či mandar te shounell. Palle rodenn le man oun hatsenn man gar.

²⁹ Yon kaman o čačepen gar te djinell, oun gar o baro Debleha te djivell.

³⁰ Har penom lenge, hoy lenge lačo hi, kran le kova gar. Har dom len trad, dikan le krik.

³¹ Doleske hounte rhan le, hoy ap lengre dromma bares vas. oun venn čalo kolestar, hoy an lengre sherya trouyel djas.

³² Kolen či an o shero hi, kolla rissrenn o Debleske o doumo; oun kova anell lenge o merepen. Oun lengro pre-phourdepen marell len.

³³ Koon ap mande shounell, nay djivell kek daryah, oun leskro dji hounte darell kek bibarht.