Galatarja 4 - O Debleskro Lab 2024 (Sinte-Manouche)

Mer ham o Debleskre čave

¹ Me penau t'menge: O čavo, kay lell yek dives lauter peskro dadestar, koles hi či penepaske pral peskro bravlepen, yaake rah har yob tikno hi. Yob hi har i boudepaskro, ninna te hi ko tselo bravlepen leskro.

² Yob hi an i vasta kolendar, kay denn garda ap leste, bis te vell ko tsiro, kay leskro dad penas, te lell yob ko bravlepen.

³ Yaake djas menge kova ninna. An ko tsiro, har gomme gar patslo hams, hams har tikne čave oun hams tel i zoor kolendar tardo, kay hi i raya pral kay phoub, oun hams ap lende pandlo.

⁴ Har ko čačo tsiro vas, bičras o Devel peskro čaves. Kova vas i mensho, oun pandlo ap o Moseskre laba.

⁵ Yob vas, te lell lo kolen vin, kay hi pandlo ap o Moseskre laba, yaake te vas mer o Debleskre čave.

⁶ Kanna ham leskre čave. Doleske das o Devel peskro čaveskro Dourho an mare djia. Kova dell gole: Tata, miro dad!

⁷ Kanna hal tou bouder gar har i boudepaskro, kay les či hi. Tou hal kanna o Debleskro čavo. Oun doleske leh tou ninna kova, hoy o Devel peskre čavende della.

Ma djan bouder ap o phouro drom!

⁸ An ko tsiro, kay prindjran t'mer o Debles gar, hans vavarenge koy, har te vans le o Devel.

⁹ Kanna prindjrenn t'mer o Debles. Feteder hi, te penau me: O Devel prindjrell t'men. Har nay čivenn t'mer t'men pale tel kol zorya, ap kolende i menshe pandlo hi? T'mer shounenn pale ap laba, hoy či moldo hi, oun an lende kek zoor hi.

¹⁰ T'mer denn yak ap divessa, čonna, bersha oun bare tsirya oun rikrenn len dren.

¹¹ Me trashau t'menge, kay miri boudi pash t'mende čičeske his.

¹² Mire phrala, me mangau t'men, venn yaake, har me hom! Me vom ninna yaake har t'mer, vom yek, kay hi gar pandlo ap o Moseskre laba. Hans t'mer čilačo ap mande,

¹³ har me o ersto kopo pash t'mende homs? Na-a, kova hans gar. T'mer djinenna, har me t'menge o Debleskro lačo lab penom, koy djas mange gar mishto.

¹⁴ Ninna te his miro nasslepen t'menge gar shoukar, dikan t'mer gar tele ap mande, vitar gar bičran man t'mendar krik. Na-a! T'mer lan man pre, har te voms o Debleskro bolepaskro, har te voms o Yezous Kristo kokres.

¹⁵ T'mer hans yaake barhtelo ap ko tsiro! Kay ačas t'mari barht? Ap ko tsiro lans t'mare yaka vin oun dans len mande.

¹⁶ Kanna, kay penau t'menge o čačepen, han t'mer čilačo ap mande?

¹⁷ Kova hi gar mishto, hoy kol menshe krenna, kay nashenn t'menge palla, te shounenn t'mer ap lende. Yon kamenn t'men mandar krik te lell, te nashenn t'mer lenge palla.

¹⁸ Me penau t'menge: Nashenn kova palla, hoy lačo hi! Krenn kova hako tsiro, ninna te hom me gar pash t'mende!

¹⁹ Mire phrala! Me kamau t'men o djiyestar, har te vans mire čave. Yaake har i djouvyat douka hi, te lell li i ternepen, yaake hi man pale douka t'menge, bis te vell o Yezous Kristo diklo an t'mende.

²⁰ Me kamoms, te voms kanna nay pash t'mende oun te rakroms nay yaake, te djal kova an t'maro dji! Me hom kate tardo oun djinau gar, hoy te krap.

O Abrahameskre douy čave

²¹ T'mer kamenn yaake te djivell har o Moseskre laba penenna. Djinenn t'mer gar, hoy kol laba penenna?

²² Kote hi činlo: O Abrahames his douy čave. Ko yekeskri day his i boudepaskretsa, i Hagar. Oun ko vavareskri day his i rayetsa, i Sara.

²³ I boudepaskretsa las o čaves, har menshe kova kaman. I rayetsa las o čaves, har o Devel kova penas.

²⁴ Kal douy djouvya hi har douy koova, hoy o Devel i menshentsa an Israel vin kras. Yek koova kras o Devel lentsa vin ap i berga Sinay. Kote lan i menshe o Moseskre laba. Kol laba hi o ray pral lende, yaake har his i ray pral i Hagar tardo.

²⁵ I Hagar hi har i berga Sinay an Arabia. Yaake har kote i menshe ap o Moseskre laba pandlo van, yaake hi kanna o foro Yerusalem peskre menshentsa ap o Moseskre laba pandlo.

²⁶ Hi ninna i foro Yerusalem an o bolepen. Ko Yerusalem hi har i rayetsa, i Sara. Lakre čave hi gar pandlo ap o Moseskre laba. Yoy hi mari day.

²⁷ Latar hi činlo: Ab barhtelo, ninna te nay lal tou kek čave! De gole i barhtyatar, ninna te vas toutar kek ternepen boldo! Kanna hi tout boudeder čave har koya, kay his o romeha khetne.

²⁸ Mire phrala, t'mer han o Debleskre čave. T'mer van boldo, har o Devel kova kamas, yaake har o Isaak boldo vas, har o Devel kova penas.

²⁹ An ko phouro tsiro his yaake: Ko čavo, kay vas boldo, har i menshe kova kaman, kova las koles palla, kay vas boldo dran o Debleskri zoor. Kova hi kava dives ninna yaake.

³⁰ O Debleskro lab penell koy pral: Trade koy boudepaskretsa peskro čaveha toutar krik, te lell yob gar peskro dadeskro bravlepen. Ko bravlepen lell ko čavo, koleskri day i rayetsa hi.

³¹ Mire phrala, mer ham gar i čave kolatar, kay hi i boudepaskretsa. Mer ham i čave kolatar, kay hi i rayetsa!