Galatarja 3 - O Debleskro Lab 2024 (Sinte-Manouche)

I patsle an o them Galatia hayvan gar, hoy o Devel kamella

¹ Hoske kamenn t'mer patsle an Galatia kova gar te hayvell? Koon kras t'menge dinelo? T'menge vas o Yezouseskro merepen ap o troushel yaake penlo, har te dikans kova t'mare yakentsa!

² Kova kamau me t'mendar te djinell: Har djas kova, kay lan o Debleskro Dourho? Lan t'mer les, har t'mer kran, hoy o Moseskre laba penenna? Na-a, t'mer lan les, har shounan o Yezousestar oun patsan ap leste.

³ Har vell kova, kay hayvenn t'mer kova gar? Dran o Debleskri zoor van t'mer patslo. Kamenn t'mer kanna dran t'mari zoor čačo glan leste te vell?

⁴ T'mer djan ap o Yezouseskro drom. Oun doleske kran i menshe t'menge o djipen phares. His kova lauter čičeske?

⁵ O Devel das t'men peskro Dourho oun kras pash t'mende boud baro oun zorelo koova, hoy kek vavar nay krella. Kras lo kova, har djivan t'mer pal o Moseskre laba? Na-a! Yob kras kova, har t'mer shounan o Yezousestar oun ap leste patsan.

Hakenes, koon ap o Yezouseste patsella, čivell o Devel an o čačepen

⁶ Yaake his kova ninna o Abrahameha. Yob patsas o Debles. Doleske čivas o Devel les an o čačepen.

⁷ T'mer dikenn kanna: O Abrahameskre čače čave hi kolla, kay o Debles patsenna.

⁸ O Debleskro lab penas glan i rah tsiro, kay o Devel ninna kolen čačo krella, kay kek bibolde hi, te patsenn le ap leste. Doleske penas lo ap o Abrahameste: Kay barht, hoy me dau tout, djal doureder ap i tsele menshende ap i phoub.

⁹ Yaake har o Abraham o Debles patsas oun o Devel das les peskri barht oun zoor, yaake lenna kolla lauter o Debleskro djipen, kay les patsenna.

O Moseskre laba denn men kek djipen

¹⁰ Kol vavar, kay rikrenn pen ap o Moseskre laba, oun kamenn yaake čačo te vell glan o Debleste, kolla hi tel o Debleskro praasepen. O Debleskro lab penella: Hakeno hi praasedo, koon gar lauter krella, hoy o Moseskre laba penenna. Oun kek mensho hi koy, kay krell lauter, hoy o Moseskre laba penenna.

¹¹ Koon rikrell pes ap o Moseskre laba, vell dran kova gar čačo glan o Debleste. An o Debleskro lab hi ninna činlo: Kova, kay patsella, kova vell čačo glan o Debleste oun djivella.

¹² Te rikrell yek pes ap o Moseskre laba, hi kova gar ko emligo, har te patsals lo ap o Yezous Kristeste. Pral o Moseskre laba hi činlo: Koon krell hako koova, hoy o Moseskre laba penenna, kova djivella.

¹³ Mer nashte rikram kova lauter gar. Oun dran kova vam tel o Debleskro praasepen. Oun o Yezous Kristo las ko praasepen mendar krik, har yob ap o troushel dino vas, oun yaake menge praasedo vas. O Debleskro lab penella: Hakeno, koon ap o troushel dino vella, hi praasedo.

¹⁴ Oun kova kras o Yezous Kristo, te vell o Debleskri zoor pash i tsele menshende, yaake har o Devel glan i rah tsiro o Abrahameske penas. Kanna nay lah mer lauter o Debleskro Dourho, te patsah mer ap o Yezouseste.

O Devel rikrell peskro lab, hoy yob o Abrahameste das

¹⁵ Mire phrala, kanna rakrau pral čomone, hoy t'mer lauter prindjrenna. Te krenn douy menshe čomone vin oun denn pengro dadeskro vast koy pre, nay penell kek: Kanna hi kova bouder či moldo. Vitar gar nay čivell yek čomone koy pashel.

¹⁶ Yaake hi kova o labeha, hoy o Devel o Abrahameste das. O Devel penas ap o Abrahameste, te dell lo peskri barht oun zoor ap leste oun ap leskro čaveste, kay vella pal leste. Kate rakrell o Devel yek čavestar. Yob rakrell gar kol boud čavendar, kay venna pal o Abraham. Ko yek čavo hi o Yezous Kristo.

¹⁷ Me kamau t'menge kava te penell: O Devel das o Abrahameste peskro lab, oun čivas peskro vast koy pre, te vell kova čačo, hoy yob penas. O Moseskre laba van star-sheel-te-triyanda (430) bersha palla oun nay lenn ko lab gar krik, hoy o Devel o Abrahameste das.

¹⁸ Te lals yek o Debleskro bravlepen oun djipen, te rikrals lo pes ap o Moseskre laba, palle čivals o Devel peskro lab ap i rig, hoy yob o Abrahameste das. Kova hi gar yaake. O Devel rikrell peskro lab, oun doleske das yob o Abrahameste peskro bravlepen čičeske.

O tsiro hi trouyel, kay djivah pal o Moseskre laba

¹⁹ Hoske hi o Moseskre laba koy? O Devel das len mende, te dikas mer, har baro maro čilačepen hi. O Moseskre laba ačan tardo yaake rah, bis te vas o Abrahameskro čavo, ko yek, konestar o Devel penas, te vell yob. I bolepangre anan kol laba o Moseske. Kova his tardo mank i menshende oun o Debleste. Oun o Mose das kol laba i menshende.

²⁰ His vavarčandes, har o Devel o Abrahameste peskro lab das. O Devel kokres das les peskro lab. Oun kek hounte vas tardo mank leste oun o Abrahameste.

²¹ Penenn o Moseskre laba, kay hi ko lab bouder či moldo, hoy o Devel o Abrahameske penas? Na-a! Kova hi gar yaake. Te vals o nevo djipen dran o Moseskre laba, palle vals čačepah ko mensho čačo glan o Debleste, kay rikrell pes ap kol laba. Kova hi gar yaake.

O Devel sikras mende o nevo drom

²² O Debleskro lab penella, kay hi hako mensho pandlo ap o čilačepen. Ko yek drom, kay anell men vin dran o čilačepen, hi o patsepen ap o Yezous Kristeste. Kova penas o Devel.

²³ Yaake rah, har patsam gar ap o Yezous Kristeste, hams pandlo ap o Moseskre laba. Palle sikras men o Devel i nevo drom pash leste: Kova hi o patsepen.

²⁴ O Moseskre laba sikran men maro čilačepen. Yaake anan le men pash o Yezous Kristeste, te patsas ap leste, oun te vas čačo glan o Debleste.

²⁵ Kanna, kay patsah ap leste, hounte daras bouder gar koy phagi, hoy o Moseskre laba pral mende vi-rakrenna.

²⁶ Dran t'maro patsepen ap o Yezous Kristeste han lauter Debleskre čave.

²⁷ Har van t'mer ap o Yezous Kristeskro lab taufedo, his kova yaake, har te rivans t'mer o Yezous Kristes an, – yaake har i ripen.

²⁸ Yaake djivah lauter o Yezouseha khetne. Kanna hi yek, koon t'mer han: bibolde oun kolla, kay kek bibolde hi, boudepangre oun raya, morsha oun djouvya. An o Yezous Kristeste hi yek har o vavar.

²⁹ Te djan t'mer o Yezous Kristeha, han t'mer ninna o Abrahameskre čave. Oun t'mer lenn kova, hoy o Devel o Abrahameskre čavende della, yaake har penas lo.