Galatarja 1 - O Debleskro Lab 2024 (Sinte-Manouche)

Ap i patslende an o them Galatia

¹ Me, o Paulo, činau kava liil ap i patslende, kay venn khetne an o them Galatia. O Yezous Kristo das an miro vast, te penap i menshenge leskro lab. Me hom gar i menshendar bičedo. Kova, kay bičras man, hi o Yezous Kristo oun o Devel, maro dad. Kova kras les i moulendar djido.

² Me oun i tsele phrala, kay pash mande hi, mer penah t'menge:

³ Lačepen oun barht t'menge! Ko dell t'men o Devel, kay maro dad hi, oun maro ray, o Yezous Kristo.

⁴ Yob meras, te lell lo mari doosh ap peste. Kova kras lo, te lell lo men vin dran ko čilačo tsiro, an hoy mer djivah. Kova kamas o Devel, maro dad yaake.

⁵ Koles sharas kanna oun hako tsiro! Amen.

Yek drom kokres anell pash o Debleste

⁶ Mange ačas o rakepen krik, har me shounom, kay t'mer moukan yaake sik o Yezouseskro drom. O Devel das t'men gole, te patsenn ap o Yezous Kristeste, kay his yaake lačo ap t'mende. Oun kanna shounenn t'mer ap menshende, kay kamenn t'men ap i vavar drom te anell.

⁷ Čačepah, dell kek vavar drom, te venn t'mer pash o Debleste! Kolla menshe kamenn t'men dinelo te krell. Yon rissrenn o čačepen pral o Yezous Kristeste trouyel.

⁸ Kova, kay penell, te dell i vavar drom har ko drom, hoy mer t'mende sikram, kova te vell praasedo o Deblestar, ninna te vams mer kova, ninna te vals i bolepaskro dran o bolepen pash t'mende oun penals kova.

⁹ Yaake har mer yek kopo penam, penau me kanna pale: Te vell yek pash t'mende oun penell t'menge, te dell i vavar drom pash o Debleste har ko drom, hoy mer t'mende sikram, kova te vell praasedo o Deblestar!

¹⁰ Penenn mange, rakrau me kanna yaake, har kamenn i menshe kova te shounell? Na-a! Me rakrau yaake, har o Devel kova kamella. Me kamau gar, te sharenn man i menshe. Te vals kova yaake, voms gar o Yezous Kristeskro boudepaskro.

O Pauleskro rakepen vell o Yezous Kristestar

¹¹ Mire phrala, djinenn, o Yezouseskro drom hoy me t'mende sikrom, hi gar i menshengro koova.

¹² Me shounom kova gar i menshendar. I mensho sikras les mande vitar gar. O Yezous Kristo kokres sikras les mande.

¹³ T'mer shounan, har me djivom an o biboldengro patsepen, oun lom kolen palla, kay patsenn ap o Yezous Kristeste, oun kamom, te marap len.

¹⁴ Me rikrom man ap o biboldengro patsepen feteder har boud vavar bibolde, kay yaake phouro his har me. Miri tseli zoryah kamom kova te krell, hoy mare phoure penan.

^15-16 O Debles his i vavar drom mange. Yob kamas mande peskro čaves te sikrell, te djinap, koon yob hi. Har me gomme gar boldo homs, rodas yob man vin. Oun yob his mange lačo oun das man gole, te djap pash kolende, kay kek bibolde hi, te penap lenge leskro čavestar. Har o Devel man pash lende bičras, poučom gar i menshendar, te penenn le mange, hoy te krap,

¹⁷ djom vitar gar an o foro Yerusalem pash kolende, kay glan mande o Yezousestar bičedo van, te penenn le i menshenge leskre laba. Lendar poučom gar, hoy te krap. Na-a, me djom an o them Arabia oun vom pale pale an o foro Damaskus.

¹⁸ Pal triin bersha vom me an o foro Yerusalem, te dikap o Kefases. Deesh-te-panč divessa ačom pash leste.

¹⁹ Kol vavar bičepangren, kay o Yezous Kristo glan mande pash i menshende bičras, kolendar dikom me kekes kote har o Yakobo kokres, o Yezouseskro phraal.

²⁰ O Devel djinella, kay kava lauter čačo hi, hoy me t'menge činau. Me rhorhau gar.

²¹ Pal kova vom me an i themma Syria oun Cilicia.

²² An o them Youdea prindjran man kol patsle gar.

²³ Yon shounan, hoy vavar pral mande penan: “Ko morsh, kay men palla las oun kamas o patsepen ap o Yezouseste paash te krell, ko morsh penell kanna i menshenge, te djan le ap o Yezouseskro drom.”

²⁴ Oun yon sharan o Debles pral halauter, hoy yob ap mande kras.