Filiparja 4 - O Debleskro Lab 2024 (Sinte-Manouche)

Avenn barhtelo hako tsiro!

¹ Mire kamle phrala, me kamau o tselo djiyestar pash t'mende te vell. T'mer han miri barht oun miro raylepen. Doleske ačenn zoreles pash maro rayeste, o Yezouseste!

² Me mangau t'men, t'mer phenya Evodia oun Sinticha, čingrenn bouder gar khetne! T'mer han phenya an o patsepen ap maro rayeste, o Yezouseste.

³ Me mangau ninna tout, miro lačo males, ab lenge ap i rig! Har sikrom i menshenge o Yezouseskro drom, boudran le khetne mantsa oun o phraleha, o Klemens, oun kol vavarentsa, kolengre laba hi činlo an o Debleskro liil, kay halauter dren činlo hi, kay lenn o Debleskro djipen.

⁴ Avenn barhtelo hako tsiro! T'mari barht vell o Yezousestar, maro rayestar. Ava, avenn barhtelo!

⁵ Sikrenn hakeneste t'maro lačepen! O ray Yezous vella an i tikno tsiro pale.

⁶ Ma darenn či! Hako tsiro mangenn o Deblestar, hoy t'men hounte vell, oun penenn leske lauter, hoy ap t'maro dji hi! Oun parkrenn t'men pash leste!

⁷ Palle dell o Devel t'men peskri barht an o dji. Leskri barht hi yaake baro, kay nay hayvah kova gar. Oun o Yezous Kristo rikrell t'maro dji, oun lell t'mari daar krik.

⁸ Pale penau t'menge, mire phrala, rakrenn pral kova, hoy lačo oun čačo hi, hoy djoudjo hi, hoy kamlo hi, hoy mishto hi pash i menshende! Ava, rakrenn pral lauter kova, hoy shoukar hi oun vell sharedo!

⁹ Oun djivenn yaake, har me t'menge penom oun sikrom, yaake har t'mer kova mandar shounan oun ap mande dikan! Oun o Devel, kay kras i drom, te nay djivah an o lačepen khetne, hi t'mentsa!

O Paulo parkrell pes pash i patslende

¹⁰ Me homs o djiyestar barhtelo, oun parkrom man pash maro rayeste, o Yezouseste, har dikom, kay t'mer bistran man gar, oun bičran man kova, hoy man hounte vell djipaske. Ninna te kaman t'mer kova i rah tsiro mange te krell, djas kova gar.

¹¹ Kova penau gar, te sikrap t'men, kay man gar doha his. Na-a. An miro djipen hayvom, te hi mange kova doha, hoy man hi.

¹² Me nay hom čorvelo, oun me nay hom bravelo. Kova lauter prindjrau. Me nay bokau. Oun me nay hom čalo. Me djinau har kova hi, te hi man boudeder har doha djipaske. Oun me djinau, har kova hi, te hi man gar doha djipaske.

¹³ O Yezous Kristo dell man i zoor, te djivap yaake te yaake.

¹⁴ Ninna te rakrau yaake, his kova shoukar t'mendar, kay van mange ap i rig, har djas mange gar mishto.

¹⁵ T'mer patsle, kay an o foro Filipi djivenna, t'mer djinenna, har krom man ap o drom, te penap i menshenge o lačo lab o Yezous Kristestar, oun djom dran o them Macedonia vin. An ko tsiro dan t'mer man lauter, hoy man hounte vas djipaske. Kek vavar patsle, pash kolende homs, kran kova, har t'mer kokres.

¹⁶ Ninna har homs an o foro Tessalonika, bičran t'mer mange douy kope čomone.

¹⁷ Me penau kova gar, te denn mange čomone. Na-a, kamau, te denn t'mer o Debleske čomone, te sharell yob t'men.

¹⁸ Kanna hi man lauter, hoy man hounte vell djipaske, oun boudeder har doha. O Epafrodito anas mange kova lauter, hoy t'mer mange bičran. Kova hi yaake, har te anans t'mer o Debleske lačo koova, hoy soungell mishto, oun kay dikell lo lačes pre oun hi barhtelo pral kova.

¹⁹ Miro Devel dell ninna t'men lauter, hoy t'men hounte vell djipaske. Les hi i baro bravlepen an o bolepen. Kova dell lo kolen, kay djan ap o Yezous Kristeskro drom.

²⁰ Sharas o Debles, maro dades an o bolepen, kanna oun hako tsiro! Amen.

Ačenn o Debleha!

^21-22 Penenn ap kol tsele patslende, kay djan ap o Yezous Kristeskro drom: “Ačenn maro Debleha!” Kova penenn t'menge ninna kol phrala, kay pash mande hi, ninna i tsele patsle, kay kate an o foro Rom hi. Kolla, kay boudrenn an o kheer o baro rayestar an o foro Rom, kamenn t'men o tselo djiyestar.

²³ O lačepen maro rayestar, o Yezous Kristestar, vell pral t'mende!