Filiparja 1 - O Debleskro Lab 2024 (Sinte-Manouche)

Ap i patslende an o foro Filipi

¹ Mer, o Paulo oun o Timoteo, činah kava liil. Mer boudrah o Yezous Kristeske, oun činah kava liil ap lauterende, kolen o Devel vin gole das an o foro Filipi, te patsenn le ap o Yezous Kristeste. Kava liil hi ninna i pralstunenge, kay denn garda ap i patslende, ninna kolenge, kay krenn o Debleskri boudi mashkral i patslende.

² Mou vell t'men lačepen oun barht an o dji! Kova dell t'men o Devel, maro dad an o bolepen, oun maro ray, o Yezous Kristo.

O Paulo mangell o Debles i patslenge

³ Hako tsiro, kay venn t'mer mange an o shero, parkrau man t'menge pash miro Debleste.

⁴ Oun hako tsiro, kay mangau o Debles t'menge lauterenge, hom barhtelo pral t'mende.

⁵ T'mer boudran mantsa khetne, har mer sikram i menshende o Yezouseskro drom. Kova kran t'mer, har patslo van, oun moukan gar tele bis kava dives.

⁶ Doleske djinau: O Devel kras i lači boudi an t'mende. Oun yob krell ninna, te ačenn pash leste, te venn lačes glan leste tardo ap ko dives, kay vell o Yezous Kristo pale.

⁷ Me nay sharau t'men yaake. T'mer han an miro dji oun rikrenn mantsa khetne, ninna kanna, kay hom an o stilepen, oun penau o lačo lab o Yezous Kristestar glan i čačepangre oun sikrau lende leskro drom yaake, te djinenn le o čačepen.

⁸ O Devel djinella: Miro dji hi pash t'mende. O Yezous Kristo das man i baro kamlepen t'menge.

⁹ Oun me mangau o Deblestar, te vell t'maro kamlepen bareder oun bareder, te hayvenn, hoy o Devel kamella, oun te djinenn, hoy te krenna.

¹⁰ Yaake nay dikenn, hoy mishto oun čačo hi. Oun ap ko dives, kay vell o Yezous Kristo pale, han t'mer an o čačepen glan leste tardo, oun kek doosh hi ap t'mende.

¹¹ Oun ko boud lačo oun čačo koova, hoy t'mer kran, krell o Debles bares. Kova kran t'mer an i zoor, hoy o Yezous Kristo das t'men.

Boud menshe shounenn o Yezousestar doleske, kay o Paulo stildo hi

¹² Shounenn, mire phrala, me kamau te djinenn t'mer kova: Dran lauter, hoy ap mande vas, shounan boud menshe o lačo lab o Yezous Kristestar.

¹³ I tsele lourde, kay denn garda ap o themeskro rayeskro kheer, ninna kol vavar, kay kate hi, kolla lauter djinenn kanna, kay hom me o Yezous Kristeske an o stilepen.

¹⁴ Ninna boud patsle van zorleder an o patsepen ap o rayeste, o Yezouseste, kanna, kay me stildo hom. Kolen hi bouder kek traash, te sikrenn le i menshende o Yezouseskro drom.

^15-17 Mashkral lende hi ninna save, kay zilverenn ap mande. Kolla rakrenn o Yezous Kristestar, te sikrenn le mande, kay yon kova feteder hayvenna har me. Yon krenn kova dran i čilačo dji oun kamenn, te vell mange boudeder ropaske. Vavar sikrenn i menshende o Yezouseskro drom dran i lačo dji. Yon kamenn man o djiyestar oun djinenna, me hom kate stildo, te sikrap o Yezouseskro drom i čačepangren yaake, te djinenn le o čačepen.

¹⁸ Hoy te penap? Mange hi boud moldo, te vell o Yezouseskro drom i menshende siklo, yaake te yaake. Yek rakrell lestar dran i čilačo dji, oun i vavar dran i lačo dji.

Miro djipen hi o Yezouseske

¹⁹ Ava, me hom barhtelo. T'mer mangenn o Debles mange. Oun ap miri rig hi o Debleskro Dourho, kay o Yezous Kristo man das. Doleske djinau, te djal lauter mishto mange.

²⁰ Me patsau te rikrell man o Devel an o vast, oun kamau o tselo djiyestar te krap či, kay hounte ladjap man glan leste. Kamau gar, te trashap i menshendar. Yaake har rakrom hako tsiro o Yezous Kristestar, oun trashom lendar gar, yaake kamau les ninna kanna an o stilepen te krell, ninna te hounte merap, te dikenn i menshe ap miro djipen oun ap miro merepen, har baro oun raylo o Yezous Kristo hi.

²¹ Miro djipen hi o Yezous Kristeske. Oun te merau me, hi kova mange feteder.

²² Me te ačau djido, nay sikrau boudeder menshende o Yezouseskro drom. Doleske djinau gar, hoy boudeder moldo hi.

²³ Ava, me djinau gar, hoy feteder hi. Ap yek rig kamaus te merap oun te vap pash o Yezous Kristeste. Kova vals mange feteder.

²⁴ Ap i vavar rig vals t'menge feteder, te ačap djido.

^25-26 Doleske hi miro dji zorelo, oun me djinau, te ačap djido, oun vau pale pash t'mende. Te hom pale pash t'mende, venn t'mer zoreles oun barhteles an o patsepen, oun parkrenn t'men pash o Yezous Kristeste, oun sharenn les boud oun boudeder.

An maro djipen o Yezouseha venn ninna douka ap mende

²⁷ Kanna, krenn lauter, te djan yaake ap o Yezouseskro drom, har kova t'mende siklo vas! Krenn kova ninna, te hom gar pash t'mende! Te dikau t'men gar, kamaus te shounap, te rikrenn t'mer lauter khetne an o patsepen, oun te krenn i tseli zoryah lauter, te vell o patsepen ap o Yezous Kristeste zorelo pash t'mende.

²⁸ Ma darenn kolendar, kay kamenn gar o Yezous Kristes, oun kay rhan pen ap t'mende! Te han zorelo an o patsepen tardo, sikrell kova lende, te djan yon nashedo, oun te lenn t'mer o djipen an o bolepen, hoy vella o Deblestar.

²⁹ O Devel hi t'menge lačo, oun das t'men o patsepen ap o Yezous Kristeste, oun gar o patsepen kokres. Na-a, dran o patsepen ap leste, hounte lenn t'mer ninna douka ap t'mende.

³⁰ Kol douka, hoy ap t'mende venna, his man ninna, har homs pash t'mende. Oun ninna kanna ap kava tsiro shounenn t'mer mandar, kay hounte lap douka ap mande.