Filemon 1 - O Debleskro Lab 2024 (Sinte-Manouche)

Lačo Filemon

¹ Me, o Paulo, kay stildo hom o Yezous Kristeske, oun maro phraal, o Timoteo, mer činah kava liil ap toute, Filemon! Tou hal maro kamlo phraal oun kreh mentsa khetne o Debleskri boudi.

² Mer činah ninna ap mari phenyate, i Apfia, oun ap o Arkippo, kay boudrella mentsa o Yezous Kristeske, ninna ap i tsele patslende, kay venna khetne an tiro kheer.

³ Lačepen oun barht t'menge! Kova dell t'men o Devel, kay maro dad an o bolepen hi, oun o Yezous Kristo, maro ray.

⁴ Hako tsiro, kay rakrau o Debleha, parkrau man touke pash leste.

^5-6 Me shounom, kay tou kameh i tsele patslen o djiyestar. Oun tou patseh ap maro rayeste, o Yezouseste, yaake har mer ap leste patsah. Me mangau o Deblestar, te vell tiro patsepen yaake zoreles an toute, te hayvess tou boud oun boudeder har baro o lačepen hi, hoy das men o Yezous Kristo.

⁷ Miro phraal! Tiro kamlepen, hoy hi tout i patslenge, kova kras lengre djia zoreles. Oun kova, hoy tou lenge kral, kras man ninna barhteles, oun das man nevi zoor.

O Onesimo

^8-9 Kanna penau touke, hoske činau kava liil: Me kamau toutar, te kress tou čomone mange. Ninna te hi man o Yezouseskro vast, oun nay penoms touke zoreles, hoy tou hounte kress, kamau me kova gar zoreles touke penell. Na-a. Me, o Paulo, i phouro morsh, oun stildo o Yezous Kristeske, kamau tout o djiyestar.

¹⁰ Oun doleske mangau toutar miro čaveske, o Onesimo, te vess tou leske lačes. Kate an o stilepen penom leske o Yezous Kristestar. Oun yob vas patslo, oun vas miro čavo an o patsepen.

¹¹ Ap ko tsiro, har yob pash toute boudras, his lo touke či moldo. Kanna hi lo mange har touke boud moldo.

¹² Koles bičrau touke pale. Oun miro dji djal leha.

¹³ Me kamoms te ačals lo pash mande oun vals mange koy, yaake har tou mange koy vals, te vals tou pash mande kate an o stilepen. Kate hom doleske, kay penom i menshenge o lačo lab o Yezous Kristestar.

¹⁴ Me kamom gar čomone te krap, hoy tou gar kameh. Doleske rikrom o Onesimes gar pash mande. Tou te kameh les mange pale te dell, kress tou kova dran tiro lačepen.

¹⁵ Nay vals, te his lo i tikno tsiro gar pash toute, te ačell lo kanna hako tsireske pash toute.

¹⁶ Kanna hi lo touke bouder gar kokres i boudepaskro. Na-a. Yob hi boudeder har kova. Yob hi i lačo phraal. Kova hi lo mange, oun har boud boudeder hi lo kova kanna touke: Yob hi tiro boudepaskro oun ninna tiro phraal an o patsepen.

¹⁷ Me te hom tiro maal, palle le les pash toute pre, yaake har tou man pre lals.

¹⁸ Yob te kras touke čomone čilačes oun te hi les i siyaan pash toute, palle kre yaake, har vals man koy siyaan pash toute.

¹⁹ Me, o Paulo, činau kova kokres miro vasteha. Me kamau playsrell, hoy yob hounte playsrals touke. Me kamau gar te rakrap pral koy siyaan, hoy tout pash mande hi: Me anom tout ap o Debleskro drom.

²⁰ Ava, miro phraal! Kre man barhteles, oun kre kova, hoy me toutar mangom! Kre kova maro rayeske, o Yezous Kristeske, ap koleste mer douy patsah. Yaake kreh tou miro dji zoreles an leste!

²¹ Me djinau, te shouneh ap mande oun kreh ninna boudeder har me toutar mangom. Doleske činom touke kava liil.

²² I vavar koova mangau toutar: Kre mange i isema an tiro kheer, kay me nay sovap! O Devel te shounell t'maro mangepen, palle vau an i tikno tsiro pash t'mende. Kova patsau.

²³ O Epafras, kay mantsa an o stilepen o Yezous Kristeske hi, penell touke: Ač maro Debleha!

²⁴ Ninna o Marko, o Aristarko, o Demas, oun o Louka, kay mantsa o Yezous Kristeske boudrenna, kolla lauter penenn touke: Ač maro Debleha!

²⁵ O lačepen maro rayestar, o Yezous Kristestar, vell pral t'mende!