Ezekiel 9 - O Debleskro Lab 2024 (Sinte-Manouche)

O Debleskri rholi vell pral Yerusalem

¹ Oun me shounom, har das o baro Devel zoreles gole, oun penas: Mou venn le, kolla, kay denn o foro peskri phagi! Hakeno lendar te lell peskro kourepaskro kasht an o vast!

² Koy van shob morsha ap o drom, kay vas kotar, kay o pralstouno baro voudar hi, ap i nordetikri rig o baro Debleskro kherestar. Oun hakenes his čomone an o vast, koleha yob nay marell. Oun pash lende his yek, koleskre koola his dran layntikro than. Ap leskro pereskri dori his i činepaskri pandlo, koleha yob nay laba pre činell. Oun yon van oun ačan pash i sasterni rhačepaskri tardo.

³ Oun o raylepen o Israeleskro Deblestar, kay his pral kol star bolepangren, kay kharan Keroubim, hadas pes foun kotar, oun djas pash o kheer, kote kay o voudar hi. Oun o baro Devel das ap ko morsheste gole, koleskre koola dran layntikro than his, oun koles i činepaskri ap peskri rig his,

⁴ oun penas ap leste: An o foro Yerusalem hi gomme menshe, kolengro dji rovell oun dell gole pral kava boud djoungelo koova, hoy kate kerdo vell. Dja an o tselo foro trouyel, oun kre i sikepen glan ap kolengre sherya.

⁵ Ap kol vavar morshende penas lo yaake, te shounom kova: Djan pal leste an o foro oun denn hakenes moulo. Dikenn kek kamlepah ap lende! Kek hounte khaytell t'men!

⁶ Denn i phouren moulo, oun i terne morshen oun i terne čen, ninna i čaven oun i djouvyen! Ma taprenn yekeske an, koles ko sikepen glan ap peskro shero hi! Djan glanstounes pash miro kheer, oun foun kotar doureder. Yaake kran le, oun maran glanstounes kol pralstunen, kay glan o baro Debleskro kheer tardo his.

⁷ Oun o baro Devel penas ap lende: Anenn kolen, kay moulo dino van, ap i platse glan o Debleskro kheer! Krenn yaake o kheer pale-čiddo! Palle djan vin an o foro! Oun yon djan vin, oun dan i menshen an o foro moulo.

⁸ Oun har le kova kran, ačom me kokres ap i platsa glan o Debleskro kheer pale. Oun moukom man ap i phoub te perell, oun dom pre gole oun penom: Baro Devel, miro ray! Hal tou yaake rhoyedo pral Yerusalem, te moukess halauteren moulo te dell, kay i Israelendar pral ačan?

⁹ Oun yob penas ap mande: I doosh, hoy i menshe dran o kheer Israel oun dran o kheer Youda ap pende anan, hi yaake boud. Boud marepen hi an o them. Oun an o foro rikrenn i zorele i vavaren zoryah tele. Oun yon penenn: “O baro Devel djas peske dran kava them. Yob dikell men gar!”

¹⁰ Doleske dikau me kek kamlepah ap lende, oun yon khaytenn man gar. Lengro čilačepen anau ap lengre sherya pale.

¹¹ Koy vas ko morsh, koleskre koola dran layntikro than his, oun koles i činepaskri ap peskro pereskri dori pandles his, oun penas: “Me krom kova, hoy tou mange penal.”