Ezekiel 8 - O Debleskro Lab 2024 (Sinte-Manouche)

An o baro Debleskro kheer venn rhorhene debla an-mangedo

¹ An o shobto bersh, ap o pančto dives an o shobto čon homs beshdo an miro kheer. Oun i phoureder kolendar, kay van dran o them Youda pandles anlo an o them Babilonia, his glan mande beshdo. Kote peras i zoor o baro Deblestar, miro rayestar, ap mande.

² Oun me dikom yekes, kay vin dikas har i morsh. Oun leskro shero oun leskro beč dikan vin har o sonakay, kay o kham pre perell. Oun o telstouno kotar, kova hoy vin dikas har leskre herya, his har yag.

³ Oun yob čivas čomone har i vast pal mande vin, oun tapras man ap mire balla ap o shero. Oun an ko dikepen, hoy dikom, oun hoy vas o Deblestar, hadas man o dourho pre dour pral i phoub, oun anas man an o foro Yerusalem pash o baro voudar, hoy hi ap i nordetikri rig, glan koy platsa, hoy djal troul o Debleskro kheer. Kote his i figura tardo, hoy i menshe an-mangan, oun pral kolate o baro Devel bares rhoyedo his.

⁴ Kote dikom o Israeleskro Devel an peskro raylepen, yaake har les dikom an koy tala.

⁵ Oun yob penas ap mande: Tou, mensho, dik kote, kay norden hi! Oun me dikom kote, kay norden hi. Oun kote vin glan o voudar his i rhačepaskri. Oun pash o voudar his koy figura, pral kolate o Devel yaake rhoyedo his.

⁶ Oun o baro Devel penas ap mande: Tou, mensho, dikeh tou, hoy le krenn? Baro djoungelo koova hi, hoy o kheer Israel kate krell, te djap mange dran miro kheer vin. Oun tou dikess gomme bareder djounglepen.

⁷ Oun yob anas man an o voudar glan koy platsa, hoy glan o Debleskro kheer hi. Kote dikom i rheb an i massouri.

⁸ Oun yob penas ap mande: Tou mensho, de koy massouri dren! Oun me phagom koy massouri dren. Oun dikom i voudar koy palla.

⁹ Oun yob penas ap mande: Dja koy dren, oun dik ko tselo čilačo djoungelo koova, hoy yon kate krenn.

¹⁰ Oun me djom dren an i isema oun dikom boud djoungele figure an i massurya dren dino: sapa oun vavar djoungele firhe, kolen i menshe dran o kheer Israel an-mangenn.

¹¹ Glan kol figure his 70 (efta-deesh) phoureder dran o kheer Israel tardo, mank lende o Yazania, koleskro dad o Shafan his. Oun hakeno lendar his i čaro an o vast, kay soungepaskro koova dren hi. Oun dran kova hadas pes i tampa pre.

¹² Oun o baro Devel penas ap mande: Tou mensho, dikal tou kava, hoy krenn i phoureder dran o kheer Israel čorrhanes – hakeno lendar glan peskri figura an lakri isema? Yon penenn penge: O baro Devel dikell men gar, oun djas peske dran kava them!

¹³ Oun yob penas doureder: Tou dikess gomme bareder djoungelo koova, hoy yon krenn.

¹⁴ Oun yob anas man pash o voudar ap i nordetikri rig glan o baro Debleskro kheer. Kote his djouvya beshdo. Oun kolla rovan pral o merepen ko deblestar, kay kharell Tammus.

¹⁵ Oun o baro Devel penas ap mande: Tou mensho, dikal tou kova? Tou dikess gomme bareder djoungelo koova, har kava.

¹⁶ Oun yob anas man dren ap koy tikni platsa glan o baro Debleskro kheer. Oun glan o voudar o kherestar mashkral i glanstouni halla oun i sasterni rhačepaskri his 25 (biish-te-panč) morsha tardo. Kolla rissran pengre dume khatar o baro Debleskro kheer, oun dikan ap koy rig, kay o kham pre djal. Oun yon moukan pen ap i phoub te perell, oun mangan o kham an.

¹⁷ Oun yob penas ap mande: Tou mensho, dikal tou kava? Hi i menshenge dran o kheer Youda gar doha, te krenn le ko tselo djoungelo koova kate? O tselo them kran le pherdo čilačepen. Hounte rhoyrenn le man pale te pale? Dik, har rikrenn le penge zenele patria glan pengre naka!

¹⁸ Doleske djau lentsa i rholyah trouyel. Yon khaytenn man bouder gar. Oun man vell kek lačepen lenge. Ninna te denn le palle glan mire kanda pre gole, shounau me gar ap lende.