Ezekiel 7 - O Debleskro Lab 2024 (Sinte-Manouche)

O dives vell, kay vell o Debleskri rholi pral Israel

¹ Oun o baro Devel penas ap mande:

² Tou, mensho, kava hi, hoy penau me, o baro Devel t'maro ray ap o them Israel. Hi doha! O tsiro hi koy, kay djal o tselo them Israel tele.

³ Israel, kanna vell miri rholi pral toute, oun tou djah tele. Me rakrau o čačepen pral toute vin, oun tou leh tiri phagi. Ko tselo djoungelo koova, hoy kral, anau ap tiro shero pale.

⁴ Me dikau bouder gar lačes ap toute. Man khayteh tou gar. Ko djoungelo koova, hoy kral, vell ap tiro shero pale. Oun tou leh tiri phagi. Oun t'mer dikenn oun hayvenn palle, te hom me o baro Devel.

⁵ Kava hi, hoy o baro Devel, maro ray penell: Shounenn, bibarht pal bibarht vella!

⁶ O tsiro hi koy, kay djal o tselo them tele. Tele djal o tselo them! Dikenn t'mer, har i bibarht vella? Koy hi li!

⁷ I bibarht perell pral t'mende dren, pral t'mende kay djivenn an o them. O tsiro vas, ko dives hi koy, kay o ropen vell, oun bouder kek gipen pral ap i berge hi.

⁸ Sik čorau miri rholi pral t'mende vin. Oun djau rholyah t'mentsa trouyel, bis te miri rholi trouyel hi. Me rakrau o čačepen pral t'mende vin, oun t'mer lenn t'mari phagi. Ko tselo djoungelo koova, hoy kran, anau ap t'mare sherya pale.

⁹ Me dikau bouder gar lačes ap t'mende. Man khaytenn t'mer gar. Ko djoungelo koova, hoy kran, vell ap t'mare sherya pale. Oun t'mer lenn t'mari phagi. Oun t'mer dikenn oun hayvenn palle, te hom me o baro Devel, kova kay t'men dell.

¹⁰ Dikenn ko dives! Dikenn, hoy vella! I bibarht hi glan o voudar. O čilačepen vas boud oun boudeder. Oun o pre-phourdepen hi baro.

¹¹ Kolla, kay djan čilačes i vavarentsa trouyel, van čilače raya. Či ačell lendar pral. Lengro bravlepen ačell gar, vitar gar lengro raylepen oun an-dikepen.

¹² Ko tsiro vas, ko dives hi koy! O ginepaskro nay sal gar bouder. Oun kova, kay hounte bikrell čomone, hounte rovell gar koy pral. O baro Debleskri rholi vell pral kal tsele menshende.

¹³ O bikepaskro lell kova gar pale, hoy lo bikras, ninna te ačell lo djido. Kova, hoy glan-vi penlo hi, vell pral kal tsele menshende. O baro Devel lell kova gar pale. Kek, kay doosh ap peste las, ačell djido.

¹⁴ I menshe shounan, har an i phourdepaskri phourdedo vas, te kharenn le len an o kourepen, oun i kourepangre lan pengre karmangre. Oun palle vell miri rholi yaake sik pral lende halauterende, te djal kek koy.

¹⁵ Glan o foro hi kol lourde, kay kamenn i Israelitaryen te marell. An o foro hi i pharo nasslepen oun bok. Koon vin glan o foro hi, kova vell o rhareha maredo. Oun koon an o foro dren hi, merell ap o pharo nasslepen oun i bokatar.

¹⁶ Oun kolla, kay nay nashenn penge, djivenn ap i berge har darene taube mank i bare barra, oun rovenn pral pengri doosh.

¹⁷ Kek zoor hi len bouder an pengre vasta. I daryatar nay rikrenn le pengro pani gar.

¹⁸ Gone čivenn le troul pende har ripya, oun činenn pengre balla ap lengro shero tele, te sikrenn le har boud khaytell len lengri doosh. Yon trissenn i daryatar. Oun lengre sherya hi lolo i ladjatar.

¹⁹ Lengro roup vitsrenn le ap o drom, oun lengro sonakay hi lenge har čik. Lengro roup oun lengro sonakay nay lell len gar dran o merepen vin, ap ko dives, kay i rholi o baro Deblestar pral lende vell. Lengro roup oun sonakay vas či-moldo. Yon nay rhan les gar, oun nay krenn gar pengro per lestar pherdo. Lengro bravlepen his kova, hoy anas len yaake dour, te peran le o baro Debleskro dromestar tele.

²⁰ Lengro tselo shoukar koova kras, te van le pre-phourdo. Oun yon kran pen kolestar djoungele figure, rhorhene deblen, hoy le an-mangan. Doleske krom me, te vell kava koova lenge har čik.

²¹ Oun me dau kova an o vast kolendar, kay venn dran vavar themma. Kol čilače ap kay phoub randenn les, oun krenn, te nay venn kol figure bouder gar an-mangedo.

²² Oun me rissrau miro shero krik mire menshendar. Oun vavar menshe krenna, te vell kova pale-čiddo, hoy mange yaake kouč hi. Ava, randepangre phagenn dren oun krenn, te nay djivau me bouder gar koy.

²³ Kre i shello! O tselo them hi pherdo kolendar, kay lan rateskri doosh ap pende. Oun o foro hi pherdo kolentsa, kay rikran i vavaren i zoryah tele.

²⁴ Doleske moukau lourden dran čilače natsyone pral o Israel te vell, te lenn le lengre khera penge dren. Oun kol raya, kay rikran i čorvelen zoryah tele, lenge krau o pre-phourdepen paash. Oun kol platse, kay mangan le pengre deblen an, moukau pale-čiddo te krell.

²⁵ I daar vell bari. Čičeske rodenn le i khatepen, kay djal lenge či. Kek hatsenn le.

²⁶ Bibarht pal bibarht vell. Pale te pale shounenn le, havo djoungelo koova vas. Čičeske djan le pash o Debleskre rakepangre, oun poučenn lendar, hoy o baro Devel sikras len. Vitar gar i rashaya nay penenn lenge, hoy te krenn le. Oun i phoureder djinenn kek drom vin dran o merepen.

²⁷ O baro ray rovell, oun i pralstoune darenn pengro djipaske. Hakeno an o them trissell i daryatar. Me krau lentsa pal kova har yon kran. Oun yaake har kran yon o čačepen vin pral i vavarende, yaake krau me o čačepen vin pral lende. Palle dikenn oun hayvenn le, te hom me o baro Devel.