Ezekiel 6 - O Debleskro Lab 2024 (Sinte-Manouche)

O them Israel ačell mouklo čiddo

¹ Oun o baro Devel penas ap mande:

² Tou, mensho, dik kote, kay i berge Israel hi, oun pen lenge glan-vi, hoy pral lende vella!

³ Pen lenge: T'mer berge Israel, shounenn hoy o baro Devel t'menge penell! O baro Devel, maro ray, penell ap i bare oun tikne berge, ap i panya oun ap i tale, kay kran pen i menshe platse, kay le pengre rhorhene deblen an-mangenn: Shounenn, me anau o kourepen pral t'mende, oun krau kol moulne platse paash.

^4-5 Kol rhačepangre, kay firhe rhačedo venn, ninna kol boba, kay soungepaskro koova rhačedo vell, venn khetne phagedo. Oun kolla, kay t'mendar moulo dino venn, vitsrau glan t'mare rhorhene deblen ap i phoub. Oun i kokale kol moule Israelendar vitsrau troul kol rhačepangre, kay mangan kol rhorhene deblen an.

⁶ An o tselo them ačell t'mare foryendar či har barra pral. T'mare moulne platse venn paash kerdo, oun i rhačepangre tele phagedo, te ačell lendar či har barra pral. T'mare rhorhene debla venn khetne dino, oun nay venn bouder gar an-mangedo. Oun kol boba, kay soungepaskro koova rhačran, venn tele dino. Kova, hoy kran t'menge, hi kanna paash.

⁷ Oun kolla t'mendar, kay moulo dino venn, ačenn čiddo ap i phoub. Palle dikenn oun hayvenn t'mer, te hom me o baro Devel.

⁸ Gar halauter t'mendar moukau o rhareha moulo te dell. Kolla, kay ačenn djido, moukau pandles krik te anell an vavar themma.

⁹ Kote, kay le pandle hi, vau me lenge an o shero. Oun yon dikenn dren, te dom len i phagi koleske, hoy yon kran: Yon phagan mantsa oun nashan rhorhene deblen palla. Palle rissrell lenge halauter an pende pral ko tselo djoungelo koova, hoy yon kran.

¹⁰ Oun yon dikenn oun hayvenn palle, te dom me, o baro Devel, len gar čičeske trad, har penom, havi bibarht pral lende vella.

¹¹ Oun o baro Devel, miro ray, penas ap mande: De an tire vasta oun stake tire heryentsa zoreles pre, oun de vin gole: Havi bibarht vell pral i menshende Israel dran ko boud djoungelo koova, hoy yon kran! O rhareha oun i bokatar oun ap i pharo nasslepen hounte merenn le.

¹² Kolla, kay an i dour them hi, merenn ap o nasslepen. Oun kolla, kay djivenn an o them Israel oun troul o them trouyel, kolla merenn an o kourepen. Oun kolla, kay pral ačenn, merenn i bokatar. Yaake krau lentsa, bis te miri rholi trouyel hi.

¹³ Palle hi i moulo-dine čiddo mashkral pengre rhorhene deblende, oun troul lengre rhačepangre trouyel ap haki tikni oun bari berga, oun tel hako baro rouk boud patyentsa, oun tel hake vavar zenele rouka, kay mangan le pengre rhorhene deblen an, oun rhačran lenge lačo soungepaskro koova. Oun t'mer dikenn oun hayvenn, te hom me o baro Devel.

¹⁴ Oun me hadau miro vast ap lende oun krau lengro them paash, te vell ko tselo them mank o moulo divyo them Youda oun o foro Ribla i mouklo them. Hako forestar, kay le djivan, ačell či har barra. Palle dikenn oun hayvenn le, te hom me, o baro Devel.