Ezekiel 5 - O Debleskro Lab 2024 (Sinte-Manouche)

O Ezekiel činell peskro bal oun peskri čor

¹ O baro Devel penas: Tou, mensho, le touke i rharo, hoy mishto činell, oun čin touke koleha i balla ap tiro shero tele oun tiri čor. Palle le i vaga, čip i balla pre, oun kre triin kotya lendar, hakeno yaake pharo har ko vavar.

² Ap ko tsiro, kay vell o foro dren lino, rhače yek triinto kotar foun kol balla mashkral an o foro. Oun i vavar triinto kotar de ko rhareha paash vin glan kol foreskre voudya. Oun ko vavar triinto kotar vitse pre, te lell len o dourho peha! Yaake lau me i menshen dran Yerusalem palla o rhareha.

³ Rike kol ballendar čomone pale oun pande len tella an tiri baya.

⁴ Oun kolendar less triin-star kotar oun vitse len an i yag oun rhače len pre! Foun kolendar djal i yag vin oun vell pral o tselo kheer Israel.

O Devel sikrell, har vell leskri rholi pral Yerusalem

⁵ Kava hi, hoy penau me, o baro Devel, t'maro ray: Kava bar hi o foro Yerusalem! Mashkral dren an i themma, kay vavar menshe djivenn, čivom kava foro.

⁶ I menshe an Yerusalem moukan pen či mandar te penell, oun shounan gar ap mande. Yon van čilačeder har kol themma, kay troul lende hi. Mire čačepaskre laba vitsran le pal pende, oun djivan gar yaake har lendar kamom.

⁷ Doleske penau me, o baro Devel, lengro ray, ap lende: T'mer hans čilačeder har i menshe an i themma troul t'mende, oun djivan gar yaake har t'mendar kamom, oun rikran gar mire čačepaskre laba dren. Ava, t'mer han yaake čilačo, te rikran t'men vitar gar ap o čačepen kol vavar menshendar, kay troul t'mende djivenn.

⁸ Doleske shounenn, t'mer menshe an Yerusalem, hoy penau me, o baro Devel, t'maro ray: Kanna sikrau les t'menge! Oun dau t'men t'mari phagi glan i yaka kol vavar menshendar.

⁹ Oun me kamau t'mentsa yaake te krell, har kova kekeha krom, oun vitar gar krau an ko tsiro, hoy vella. Kava krau doleske, kay kran savo boud djoungelo koova.

¹⁰ I tsiro vell, kay rhan dada pengre čaven mashkral an Yerusalem, oun čave rhan pengre daden. Yaake pharo vell miri phagi, hoy dau t'mende. Oun halauter, kay t'mendar pral ačenn, venn vin tradedo ap hake rigya.

¹¹ T'mer kran miro kheer pale-čiddo kol rhorhene deblentsa oun djoungelo koveha, hoy kote kran, penau me, o baro Devel, t'maro ray. Doleske dau man sovel, me o djido Devel, te dap t'men paash. T'mer khaytenn man bouder gar oun me krau miro dji bouder gar t'menge pre.

¹² O triinto kotar t'mendar merell ap i pharo nasslepen oun i bokatar. Oun i triinto kotar t'mendar vell glan o foro o rhareha moulo dino. Oun i triinto kotar t'mendar tradau vin ap hake rigya, oun me lau len palla o rhareha.

¹³ Te moukom miri tseli rholi ap t'mende vin, oun dom t'men pale, hoy kran, palle djal miri rholi krik, oun hom bouder gar rhoyedo pral t'mende. Oun t'mer djinenn, te homs me, o baro Devel, kay das t'men trad o tselo djiyeha.

¹⁴ Toutar, Yerusalem, krau i moulo foro. Či har barra ačenn toutar pral. I menshe an i vavar themma troul toute trouyel, san pral toute – hakeno kay djal koy oun dikell tout.

¹⁵ Ava, yon san pral toute oun praasenn tout. Lenge vell traash, te dikenn le, har miri bari rholi pral toute vell, oun har djoungeles save menshenge djal, kay man moukan. An miri rholi anau tiri doosh ap toute pale. Me, o baro Devel, rakrom.

¹⁶ Te bičrau i bok mank t'mende, hi kova yaake har te doms čilače fayle karye mank t'mende, te marap t'men. An ko tsiro vell t'men bouder gar doha te rhal. Oun i bok vell baro oun bareder mank t'mende.

¹⁷ Ava, i bok oun divye firhen bičrau mank t'mende. Kolla marenn t'mare čaven. Ninna pharo nasslepen, marepen oun kourepen anau pral t'mende. Me, o baro Devel, rakrom.