Ezekiel 48 - O Debleskro Lab 2024 (Sinte-Manouche)

¹ Oun kalla hi i laba kol deesh-te-douy bare familyendar oun ko kotar them, hoy hakeni lendar lell. Ko kotar them, hoy ap i nordetikri rig čiddo hi, lell o kheer Dan. Kava them djal foun o Mashkralstouno Baro Pani bis pash o foro Hetlon, oun doureder bis pash o foro Hamat, oun doureder bis pash o foro Hazar-Enan. Ap leskri nordetikri rig hi o foro Damaskus čiddo, vergel ko foro Hamat. Yaake dour hi kava kotar them, hoy o kheer Dan lell, foun kotar, kay o kham pre djal, bis kote, kay o kham tele djal.

^2-7 Ninna i vavar bare familye lenn i kotar them, hoy djal foun kote, kay o kham pre djal, bis kote, kay o kham tele djal. Ap i čači rig ko themestar, hoy o kheer Dan lell, vell ko them, hoy lell o kheer Asser. Ap i čači rig ko themestar, hoy o kheer Asser lell, vell ko them, hoy lell o kheer Naftali. Ap i čači rig ko themestar, hoy o kheer Naftali lell, vell ko them, hoy lell o kheer Manasse. Ap i čači rig ko themestar, hoy o kheer Manasse lell, vell ko them, hoy lell o kheer Efrayim. Ap i čači rig ko themestar, hoy o kheer Efrayim lell, vell ko them, hoy lell o kheer Ruben. Ap i čači rig ko themestar, hoy o kheer Ruben lell, vell ko them, hoy lell o kheer Youda.

⁸ Ap i čači rig ko themestar, hoy o kheer Youda lell, čivenn i kotar ap i rig, hoy mange hi. Kava kotar djal ninna foun kote, kay o kham pre djal bis kote, kay o kham tele djal, oun hi 12,5 (deesh-te-douy-te-paash) kilometarya bourhlo, oun yaake lengsto har kol vavar kotya ninna. Mashkral dren hi miro kheer tardo.

⁹ Kava kotar them, hoy čivenn t'mer mange ap i rig hi 12,5 (deesh-te-douy-te-paash) kilometarya lengsto oun 10 (deesh) kilometarya bourhlo.

¹⁰ Foun kava kotar hi i paash i rashayenge: 12,5 (deesh-te-douy-te-paash) kilometarya lengsto oun 5 (panč) kilometarya bourhlo. Mashkral dren hi miro kheer tardo.

¹¹ Kava kotar hi kol rashayenge, kay venn pal o Zadok. Yon hi mange koy, oun boudran mange, oun peran gar mandar tele, har i Levitarya khetne i Israelentsa mandar tele peran.

¹² Doleske vell lenge kava kotar ko themestar, hoy mange hi, oun kay miro kheer tardo hi. Kava kotar hi kokres i rashayenge, oun hi čiddo pash ko kotar them, hoy lenn i vavar Levitarya.

¹³ Oun langs ko kotar them, hoy lenn kol rashaya, lenn i Levitarya pengro kotar them. Kova hi ninna 12,5 (deesh-te-douy-te-paash) kilometarya lengsto oun 5 (panč) kilometarya bourhlo. Ko tselo kotar, hoy o Debleske ap i rig čiddo hi, hi 12,5 (deesh-te-douy-te-paash) kilometarya lengsto oun 10 (deesh) kilometarya bourhlo.

¹⁴ Oun i Levitarya hounte bikrenn či pengro themestar oun či parenn. Kava fetester kotar them hounte vell gar an i vavarengre vasta. Kava kotar them vas o baro Debleske dino.

¹⁵ Oun ko kotar them, hoy pral ačell – 2,5 (douy-te-paash) kilometarya bourhlo oun 12,5 (deesh-te-douy-te-paash) kilometarya lengsto – kova hi gar o Debleske. Kova hi o foreske Yerusalem, te djivenn i menshe kote, oun te hatsenn i firhe kote zenlepen. Oun ko foro vell mashkral dren.

¹⁶ Oun yaake baro vell ko foro: 2.250 (douy-zerya-douy-sheel-te-paash-sheel) metarya ap haki rig.

¹⁷ Oun troul o foro, ap hake star rigya, vell i kotar them, hoy hi 125 (sheel-te-biish-te-panč) metarya bourhlo. Kote nay rhan i firhe.

¹⁸ Ap kol douy rigya o forestar, kay o kham pral djal oun kay lo tele djal, ačell i kotar them, hoy hi ap kal douy rigya 5 (panč) kilometarya lengsto. Leskri nordetikri rig djal bis ap ko kotar them, hoy mange, o baro Debleske dino hi. Kate nay boudrenn kolla ap i harhetikri phoub, kay an o foro Yerusalem boudrenn, te vell len rhapaske.

¹⁹ Yon venna dran kol tsele 12 (deesh-te-douy) bare familye an Israel.

²⁰ Ko tselo kotar them, hoy t'mer ap i rig čivenn o Debleske oun o foreske Yerusalem, kova hi ap haki rig 12,5 (deesh-te-douy-te-paash) kilometarya lengsto. Haki rig hi emligo baro.

^21-22 Oun kova hoy ap kol douy rigya pral ačell, ap ko rig, kay o kham pre djal bis pash o pani Yordan, oun ap koy rig, kay o kham tele djal bis pash o Mashkralstouno Baro Pani, kova hi o baro rayeske. Kova hi o them mashkral o them Youda oun o them Benyamin. Mashkral dren an o rayeskro kotar them hi ko kotar them, kay o Debleskro kheer tardo hi, oun hoy hi i rashayenge, oun ko kotar i Levitarenge, oun ko kotar, kay o foro Yerusalem tardo hi.

^23-27 Palle lenn i vavar bare familye, kay pral ačan, pengro kotar them, hoy djal foun kote, kay o kham pre djal bis kote, kay o kham tele djal. Ap i čači rig ko themestar, hoy o rayeske hi, vell ko them, hoy lell o kheer Benyamin. Ap i čači rig ko themestar, hoy o kheer Benyamin lell, vell ko them, hoy lell o kheer Simeon. Ap i čači rig ko themestar, hoy o kheer Simeon lell, vell ko them, hoy lell o kheer Issakar. Ap i čači rig ko themestar, hoy o kheer Issakar lell, vell ko them, hoy lell o kheer Zabulon. Ap i čači rig ko themestar, hoy o kheer Zabulon lell, vell ko them, hoy lell o kheer Gad.

²⁸ O them Gad djal ap koy rig, kay o kham pralstounes tardo hi, bis pash o foro Tamar, oun foun kote doureder bis pash o pani Meriba pash o foro Kadesh, oun foun kotar doureder bis pash ko tikno pani, hoy nashell mank Israel oun Egiptia bis pash o baro pani.

²⁹ Kava hi o them, hoy denn t'mer i bare familyenge, kay venna kol 12 (deesh-te-douy) čavendar o Yakobestar, te lell hakeni peskro kotar them. Kava them hi hako tsireske i Israelenge, oun vell o dadestar ap o čaveste doureder dino. Kava penell o baro Devel, maro ray.

I bare voudya o forestar Yerusalem

^30-34 Troul o foro Yerusalem hi i massouri, hoy ap haki rig 2.250 (douy-zerya-douy-sheel-te-paash-sheel) metarya lengsto hi. An haki rig hi triin bare voudya. Oun kol voudya kharenn har i laba o Yakobeskre 12 (deesh-te-douy) čavendar. Ap i nordetikri rig: o voudar Ruben oun o voudar Youda oun o voudar Levi. Ap i rig, kay o kham pre djal: o voudar Yosef oun o voudar Benyamin oun o voudar Dan. Ap i rig, kay o kham pralstounes tardo hi: o voudar Simeon oun o voudar Issakar oun o voudar Zabulon. Ap i rig, kay o kham tele djal: o voudar Gad oun o voudar Asser oun o voudar Naftali.

³⁵ Kal star rigya o forestar hi khetne enya (9) kilometarya lengsto. Foun ko tsiro vell o foro kharedo: O baro Devel hi kay!