Ezekiel 45 - O Debleskro Lab 2024 (Sinte-Manouche)

Ko kotar them o baro Debleske

¹ Ap ko dives, kay vitsrenn t'mer tikne kashta, te djinenn, koneske havo kotar them vell, čivenn i kotar them ap i rig, hoy o baro Debleske hi: 12,5 (deesh-te-douy-te-paash) kilometarya lengsto oun 10 (deesh) kilometarya bourhlo. Kava tselo kotar them hi o baro Debleske.

^2-3 Foun kava kotar them, lenn i paash, kova hi 12,5 (deesh-te-douy-te-paash) kilometarya lengsto oun 5 (panč) kilometarya bourhlo. Lestar vell i kotar phoub lino o Debleskro khereske: 250 (douy-sheel-te-paash-sheel) metarya lengsto oun 250 (douy-sheel-te-paash-sheel) metarya bourhlo, oun troul leste i platsa trouyel, hoy hi 25 (biish-te-panč) metarya bourhlo. Oun kote vell o Debleskro kheer tardo, kay ninna o Debleskri kouč isema dren hi.

⁴ Kava tselo kotar them, hoy 12,5 (deesh-te-douy-te-paash) kilometarya lengsto oun 5 (panč) kilometarya bourhlo hi, hi o Debleske ap i rig čiddo. Kate hi o Debleskro kheer tardo. Oun kate nay čivenn leskre rashaya pengre khera pre, kolla kay boudrenn glan leste an leskro kheer.

⁵ Ko vavar kotar them, hoy hi 12,5 (deesh-te-douy-te-paash) kilometarya lengsto oun 5 (panč) kilometarya bourhlo hi i Levitarenge, kolla an o Debleskro kheer boudrenn. Kote nay krenn le penge forya, an kolla yon djivenn.

⁶ Ap i rig foun ko kotar them, hoy o Debleske hi, vell i kotar them o foreske Yerusalem, hoy hi 12,5 (deesh-te-douy-te-paash) kilometarya lengsto oun 2,5 (douy-te-paash) kilometarya bourhlo. Kate nay djivenn menshe dran o tselo them Israel.

Ko kotar them o rayeske pral Israel

⁷ Oun o rayeste pral o them denn i kotar them ap kay rig oun ap i vavar rig foun ko kotar them, hoy hi o Debleske oun o foreske Yerusalem, ap koy rig, kay o kham tele djal, oun ap koy rig, kay o kham pre djal. Ap kal douy rigya djal o rayeskro them yaake dour, har ninna o them djal, hoy kol deesh-te-douy čave o Yakobestar lenna.

⁸ Kava kotar them vell o rayeske. Les vell gar boudeder them an Israel. Kamau gar, te čorenn mire raya o them mire menshendar. Na-a, yon hounte moukenn o them i Israelenge yaake har kova o Yakobeskre čavenge dino vas.

I lab, hoy penell o baro Devel i rayenge

⁹ Kava penell o baro Devel, maro ray: Kanna hi doha! T'mer raya pral o Israel, herenn pre, te rikrenn i menshen i zoryah tele! Doukrenn len bouder gar! Krenn, hoy mishto oun čačo hi! Moukenn tele, te tradenn mire menshen dran pengre khera vin! Kava penell o baro Devel, maro ray.

¹⁰ T'men hounte vell i vaga, hoy o čačo pharepen sikrell. Oun t'mare pirya oun khore, hoy lenn t'mer, te dikenn, har boud čomone hi, kolla hounte venn o čačo barepen.

¹¹ I piri, hoy sikrell har boud djob dren hi, oun o khoro, hoy sikrell har boud djet dren hi, kolla douy hounte venn emligo bares. An hakeno lendar hounte djal i deshto kotar foun i korba, an koleste 220 litarya djan. Pal savi korba vell lengro barepen vin kerdo, har bares yon venn.

¹² Oun kol barra, hoy sikrenn har pharo čomone hi, hounte sikrenn o čačo pharepen.

Hoy i raya hounte krenn

¹³ Kova hi, hoy t'mer hounte anenn o baro Debleske: o 60. (shob-deshto) kotar foun o djob oun foun o gib, hoy t'mer dren anan.

¹⁴ Oun yek litari djet foun sheel litarya, hoy kran.

¹⁵ Te hi yekes douy sheel bakre, hounte anell lo yek lendar. Dran o tselo them Israel hounte anenn i menshe kova, te vell mange rhapen dran djob rhačedo, ninna firhe, hoy tseles rhačedo venn, oun vavar, hoy rhan le khetne glan mande, te vell lauter krik lino, hoy mank mande oun i menshende tardo hi. Kava penell o baro Devel, maro ray.

¹⁶ Oun hakeno an o them Israel hounte dell kova, oun anell kava koova pash o rayeste pral Israel.

¹⁷ O ray hounte dikell koy pre, te venn i firhe, o djob oun i mool anlo glan o baro Debleste an kol bare divessa, kay venn i Israelitarya khetne, te sharenn le o Debles, ninna ap ko dives, kay vell o nevo čon diklo, oun ap o Debleskro dives, oun ap kol tsele vavar bare divessa. O ray dell ko djob, koy mool oun kol firhen i rashayen, te anenn yon kova glan o baro Debleste, te vell lauter krik lino, hoy mank o Debleste oun i Israelitaryen tardo hi. I firhe, hoy maredo venn, hi save, kay venn tseles rhačedo oun save, kay venn maredo, te vell i doosh krik lino, oun save, kay rhan i menshe khetne glan o baro Debleste.

¹⁸ Kava penell o baro Devel, maro ray: An o yekeskro čon ap o yekeskro dives an ko čon vell i terno sasto gouroum vi-rodedo oun maredo, te vell leskro rateha i doosh oun o pale-čiddo koova dran o Debleskro kheer krik lino.

¹⁹ Oun o rashay lell ko rat ko firhestar, oun makell les ap i pesse kashta, hoy hi čačes oun serves o voudarestar an o Debleskro kheer, oun ap i star ekke foun i rhačepaskri, oun ap i pesse kashta čačes oun serves o voudarestar glan i tikni glanstouni platsa.

²⁰ Oun yaake kress tou kova ninna ap o eftato dives foun ko čon, hakeneske, kay doosh ap peste las, oun kova gar kamas oun djinas. Oun yaake lenn t'mer i doosh oun o pale-čiddo koova krik dran o kheer.

²¹ An o glanstouno čon ap o 14. (deesh-te-starto) dives an ko čon, rikrenn kol bare divessa dren, hoy kharenn Passa, oun hoy djan 7 (efta) divessa. An kava tsiro hounte rhan kek maro dran shoutlo yarro.

²² Ap o deesh-te-starto dives anell o ray peske oun i tsele menshenge an Israel i gouroum, hoy maredo vell, te vell i doosh lendar krik lino.

²³ Oun an kol efta divessa, anell lo hako dives efta terne saste gourma, oun efta saste morsh bakre, te venn le maredo oun tseles rhačedo o baro Debleske, oun koy pashel hako dives yek morsh bouzni, te vell i doosh oun o pale-čiddo koova krik lino.

²⁴ Pash hako gouroum oun hako bakro venn 12 (deesh-te-douy) kilogramme yarro oun yek khoro djet koy pashel dino.

²⁵ An o eftato čon ap o 15. (deesh-te-pančto) dives an ko čon vell ko festo, kay djivenn i Israelitarya an patyengre khera efta divessa. An kal efta divessa krell o ray yaake har an kal efta divessa glan kova, oun anell ko emligo koova o baro Debleske: firhe, hoy venn maredo oun tseles rhačedo, oun save, hoy venn maredo, te vell i doosh krik lino, ninna djob oun djet. Oun halauter vell yaake kerdo har glan kova.