Ezekiel 44 - O Debleskro Lab 2024 (Sinte-Manouche)

O pandlo voudar

¹ Oun o morsh anas man pale pash ko voudar, hoy vin glan i bari glanstouni platsa hi, ap koy rig, kay o kham pre djal. Kava voudar his pandlo.

² Oun o baro Devel penas ap mande: Kava voudar ačell pandlo, oun vell gar pre kerdo. Oun kek djal an kava voudar dren! Me, o baro Devel, ko Devel pral Israel, djom an kava voudar dren. Doleske ačell lo pandlo.

³ Kokres o ray pral Israel nay djal dren, oun beshell koy, oun rhal kote glan mande peskro kotar kolestar, hoy mange, o baro Debleske anlo vas. Te vell lo kote, hounte djal lo an i voudareskri halla dren oun ninna kote pale vin.

O Devel penell o Ezekiel, koon nay boudrell an leskro kheer

⁴ Oun o morsh anas man pash o voudar, hoy ap i nordetikri rig hi, oun djas kote mantsa dren ap koy tikni glanstouni platsa glan o baro Debleskro kheer. Koy dikom, kava kheer his pherdo o baro Debleskro raylepen. Oun me moukom man ap i phoub te perell glan leste.

⁵ Oun o baro Devel penas ap mande: Tou, mensho, kre tire yaka oun kanda pre, oun de yak ap halauter, hoy me touha rakrau! Kamau touke te penell, hoy t'mendar kamau miro khereske, oun hoy kote hounte krenn. De yak, te djiness, koon nay djal dren oun koon gar.

⁶ Ap i Israelitaryen, kay hi save menshe kay moukenn pen či te penell, pen: Kava penell o baro Devel, maro ray: T'mer dran o kheer Israel, moukenn tele t'maro tselo djoungelo koveha!

⁷ T'mer moukan vavar menshen an miro kheer dren, saven kolengro dji gar mange hi, oun kay hi gar činlo ap pengro mass. Yaake kran, te vas miro kheer pale-čiddo. Yon his koy pashel, har anan t'mer rhapen oun thulepen oun rat glan mande. Yaake phagan t'mer, hoy mer vin kram. Koy pashel vell kava tselo djoungelo kova, hoy kran.

⁸ T'mer kokres kran gar koy boudi an miro kheer. Na-a, t'mer lan vavar morshen, te krenn le t'menge koy boudi an miro kheer.

⁹ Doleske penau me, o baro Devel, t'maro ray: Kek dran i vavar them, koleskro dji gar mange hi, oun kay hi gar činlo ap peskro mass, nay vell an miro kheer dren, vitar kek vi-themari, kay mank t'mende djivell.

¹⁰ Har i Israelitarya mange o doumo sikran, oun vavar deblenge palla nashan, koy djan ninna i Levitarya mandar krik. Kanna hounte hidjrenn le pengri phagi.

¹¹ Lengri boudi an miro kheer hi kanna, te denn le yak an i bare voudya glan miro kheer. Ninna hounte marenn le kol firhen, hoy i menshe mange anenn, save firhe, kay venn tseles rhačedo oun save, hoy rhan le khetne glan mande. Yaake boudrenn le mire tsele menshenge.

¹² Bis kava dives anan le firhen lenge glan lengre rhorhene deblende, oun kran yaake, te peran i Israelitarya miro dromestar tele. Doleske hadom miro vast oun dom man sovel, te dap len pengri phagi. Kava penell o baro Devel, maro ray.

¹³ Yon nay ačenn bouder gar mire rashaya oun venn bouder gar pash kol tsele koola, hoy mange hi, oun hounte rikrenn pen pale foun ko rhapen, hoy mange dino vas, oun kokres i rashaya nay rhan. Yon hounte ladjenn pen pral ko djoungelo koova, hoy le kran.

¹⁴ Oun me krau lendar boudepangre, kay an miro kheer koy boudi krenn, hoy kerdo hounte vell.

¹⁵ Kol rashaya dran o kheer Levi, kolengro phouro dad o Zadok his, yon ačenn mire rashaya, oun nay boudrenn mange. Har i Israelitarya mandar tele peran, kran yon pengri boudi mishto an miro kheer. Doleske nay ačenn le mire rashaya oun nay anenn o thulepen oun o rat kol marede firhendar glan mande. Kava penell o baro Devel, maro ray.

¹⁶ Yon nay venn an miro kheer dren, oun yon venn pash miri rhapaskri, te venn le mange koy oun boudrenn mange an miro kheer.

¹⁷ Te venn le an kol voudya dren, hoy djan ap koy tikni glanstouni platsa, hounte rivenn le i rashayengre layntikre koola an. Kek koola dran bakrengre balla hounte venn ap lende an ko tsiro, kay boudrenn ap i tikni glanstouni platsa oun dren an o kheer.

¹⁸ Lengro shereskro diklo oun lengre rholopya hounte venn dran layntikro than. Kek koola hounte venn ap lende, hoy krenn, te vell lenge tato oun te nashell o pani lendar tele.

¹⁹ Te djan le ap i bari glanstouni platsa vin pash i menshende, hounte rivenn le kol koola, an kolende yon boudran, pale vin, oun čivenn len tele an kol iseme, hoy i rashayenge hi. Oun rivenn vavar koola an, te taprenn i menshe gar i rashayengre koola an, oun merenn.

Har i rashaya hounte djivenn

²⁰ Oun i rashaya hounte činenn gar pengre balla tseles tele, oun moukenn len ninna gar lengsto te vell. Tiknes hounte venn le činlo.

²¹ Te djan le dren ap koy tikni glanstouni platsa glan o Debleskro kheer, hounte piyan le kek mool.

²² Oun i moukli djouvyat nay romedinerenn le gar, vitar gar i djouvyat, kolakro rom meras. Na-a, kokres i čay dran o kheer Israel, kay kek morshestar an-tapedo hi, nay romedinerenn le, oun i djouvel, kolakro rom i rashay his oun meras.

²³ I rashaya hounte sikrenn mire menshende, hoy mange, o Debleske hi, oun kova, hoy i menshenge hi. Oun yon hounte djinenn, hoy pale-čiddo glan mande hi, oun hoy gar pale-čiddo glan mande hi.

²⁴ Te vell i čingepen glan lende anlo, hi yon i čačepangre morsha oun hounte penenn o čačepen vin, oun hounte djan pal mire čačepaskre laba. Oun yon hounte krenn, te venn mire bare divessa ap o čačo tsiro yaake dren rikedo, har me penom, te vell kova kerdo. Ninna denn le yak, te vell o Debleskro dives dren rikedo.

²⁵ Oun pash i mouleste hounte djan le gar dren, te krenn le pen gar pale-čiddo. Kokres pash pengro dadeste oun pengri date oun pash o čaveste oun pash i čate oun pash o phraleste oun pash i phenyate, kolat gomme kek morshes hi, pash lende nay djan le. Kote nay krenn le pen pale-čiddo.

²⁶ Te kras pes i rashay ap sau mouleste pale-čiddo, hounte krell lo, hoy glan činlo hi, te vell lo pale erligo. Te vas lo pale erligo, ačell lo gomme efta divessa khere.

²⁷ Ap ko dives, kay djal lo pale ap koy tikni glanstouni platsa, te krell lo peskri boudi an miro kheer, hounte marell lo mange i firhes, te vell o pale-čiddo koova lestar krik lino. Kava penau me, o baro Devel, t'maro ray.

²⁸ I rashayenge vell kek kotar phoub, hoy o dadestar ap o čaveste doureder dino vell. Me hom lengro kotar. Len vell kek kotar them an o them Israel. Me dau len, hoy len hounte vell djipaske.

²⁹ Lengro rhapen lenn le kolestar, hoy glan mande anlo vell, ko djobestar oun kol firhendar, hoy maredo venn, te vell i doosh oun o pale-čiddo koova krik lino, oun kol firhendar, hoy venn maredo, te vell lauter pale mishto. Ninna lenn le halauter, hoy i menshe mange ap i rig čivan.

³⁰ Ninna o feteder djob kolestar, hoy neves baro vas, oun kova, hoy hounte denn i menshe o Debleske, hi i rashayenge. Anenn lenge ninna i erste mare, hoy o nevo djobestar peklo van. Koon kova krell, ap koleste oun leskri familya vell o Debleskri barht.

³¹ Kek čirklen oun vavar firhen, hoy meran oder moulo dandedo van, te rhan i rashaya.