Ezekiel 40 - O Debleskro Lab 2024 (Sinte-Manouche)

O Debleskro nevo kheer

¹ His an o 25. (biish-te-pančto) bersh, kay mer an o pandepen hams – kova his an o 14. (deesh-te-starto) bersh har o foro Yerusalem dren lino vas – ap o 10. (deshto) dives an ko bersh. Ap ko dives vas i zoor o baro Deblestar pral mande. Oun yob anas man an o foro Yerusalem.

² An i visiona anas lo man an o them Israel, oun moukas man tele ap i bari berga, hoy dour pre djas. Ap koy rig i bergatar, kay o kham pralstounes tardo hi, dikom čomone, hoy vin dikas har i foro.

³ Oun yob anas man kote, oun dikom i morshes. Kova dikas vin har vals lo dran saster. An leskro vast his i layntikri dori oun i kasht, koleha yek tele ginell, har bares čomone hi. Oun yob his mashkral an o baro voudar tardo.

⁴ Oun ko morsh penas ap mande: Tou, mensho, dik oun shoun mishto, oun de yak ap halauter, hoy sikrau tout. Doleske val tou kate anlo, te sikrap kova touke. Halauter, hoy kate dikal, pen i menshenge dran o kheer Israel!

O baro voudar ap koy rig, kay o kham pre djal

⁵ Oun dikom i massouri, hoy vin hi troul o Debleskro kheer. Oun ko morsh ginas ko kashteha tele, har bares koy massouri hi. Ko kasht his yaake triin metarya lengsto. Oun koy massouri his yaake pesso har ko kasht lengsto his, oun djas ninna yaake dour pre har ko kasht.

⁶ Oun yob djas pash o baro voudar, hoy ap koy rig hi, kay o kham pre djal. Oun djas i treppa pre. Oun dikas pal, har dour ko voudar dren djal. Oun kova djas yaake dour dren, har ko kasht lengsto his – triin metarya.

⁷ Dren an o voudareskro kheer his ap hake douy rigya triin iseme. Haki isema his yaake lengsto har bourhlo, – triin metarya lengsto oun triin metarya bourhlo. Oun i massurya, hoy mank lende hi, his 2,5 (douy-te-paash) metarya pesso. Palla an o voudareskro kheer his pale i voudar, hoy djas triin metarya dren. Koy pal his koy voudareskri halla vergel o Debleskro kheer.

⁸ Oun yob dikas pal, har baro koy voudareskri halla hi.

⁹ Kaya his star metarya lengsto. Palla an lakri massouri his i kotar pre, kay djah vin. Čačes oun serves kolestar his i massouri yek metari pesso. Vergel koy voudareskri halla his o Debleskro kheer.

¹⁰ Oun kol tikne iseme, hoy his ap kol douy rigya dren an o baro voudar, his triin ap haki rig, hakeni yaake bourhlo har koy vavar. Oun i massurya mank lende his ninna emligo bourhlo.

¹¹ Pal kova dikas yob pal, har lengsto oun bourhlo o voudareskro drom his: Kova his 6,5 (shob-te-paash) metarya lengsto oun panč metarya bourhlo.

¹² Oun glan i tikne iseme, his ap haki rig i tikni massouri i paash metari baro. Haki isema his triin metarya lengsto oun triin metarya bourhlo.

¹³ Oun yob dikas pal, har bourhlo o tselo baro voudar hi: foun i vinstouni rig foun koy yek tikni isema bis pash i vinstouni rig foun koy tikni isema vergel: Foun yek rig ap i vavar his 12,5 (deesh-te-douy-te-paash) metarya.

¹⁴ Oun koy voudareskri halla his deesh metarya bourhlo. Oun i glanstouni platsa djas bis pash i massouri foun ko baro voudar.

¹⁵ Oun o tselo voudareskro drom foun vin, kay veh dren, bis pash koy voudareskri halla his 25 (biish-te-panč) metarya lengsto.

¹⁶ Oun an i tikne iseme, hoy his ap kol douy rigya, his tikne vorhya an kol vinstoune massurya. Ninna an i voudareskri halla his vorhya ap lakre douy rigya. Oun dren an kol massurya his palmtikre rouka dren dino.

I bari glanstouni platsa

¹⁷ Oun yob anas man an i bari glanstouni platsa. Oun troul i glanstouni platsa trouyel djas i barrengro drom. Oun pal o barrengro drom his triyanda tikne iseme tardo troul i glanstouni platsa.

¹⁸ Oun ko barrengro drom djas troul i tseli platsa, oun djas yaake dour dren ap i platsa har i bare voudya. Ko barrengro drom his o telstuneder drom.

¹⁹ Oun ko morsh dikas pal, har bourhlo koy bari glanstouni platsa hi: Foun o telstouno voudar bis pash i massouri, hoy djas troul i tikni glanstouni platsa his 50 (paash-sheel) metarya. Kava his koy rig, kay o kham pre djal. Palle djas lo glan mande ap koy rig, kay norden hi.

O baro voudar ap i nordetikri rig

²⁰ Oun ko morsh dikas pal, har baro oun bourhlo ko voudar hi, hoy glan i bari glanstouni platsa hi ap koy rig, kay norden hi.

²¹ An kava voudareskro kheer his ninna tikne iseme, triin ap haki rig. Oun leskre massurya oun koy voudareskri halla his yaake baro har pash ko vavar baro voudar, kote kay o kham pre djal. Khetne his kava voudar 25 (biish-te-panč) metarya lengsto oun 12,5 (deesh-te-douy-te-paash) metarya bourhlo.

²² Oun leskre vorhya oun leskre palmtikre rouka, hoy an i massurya dino hi, his yaake har pash ko baro voudar ap koy rig, kay o kham pre djal. Glan kava voudar djan efta stufe pre. Oun les his i voudareskri halla ap i vavar rig.

²³ Oun yaake har pash ko voudar ap koy rig, kay o kham pre djal, his pash kava voudar ap i nordetikri rig. Vergel lestar his i baro voudar, hoy djas an i tikni glanstouni platsa. Oun ko morsh ginas tele, har dour hi foun ko yek voudar bis pash ko vavar. Oun kova his 50 (paash-sheel) metarya.

O baro voudar ap koy rig, kay o kham pralstounes hi

²⁴ Palle anas man ko morsh ap koy rig, kay o kham pralstounes tardo hi. Oun ap kay rig dikom ninna i baro voudar. Oun yob dikas pal, har baro leskre massurya oun koy voudareskri halla hi. Oun yon his yaake baro har pash kol vavar bare voudya.

²⁵ Oun kote his vorhya an o voudar oun an i voudareskri halla, yaake har pash kol vavar bare voudya. Khetne his kava voudar 25 (biish-te-panč) metarya lengsto oun 12,5 (deesh-te-douy-te-paash) metarya bourhlo.

²⁶ Oun glan kava voudar djan efta stufe pre. Oun les his i voudareskri halla ap i vavar rig. Oun palmtikre rouka his an lakre massurya dren dino ap haki rig.

²⁷ Oun vergel kava baro voudar his ninna i vavar voudar, hoy djas an i tikni glanstouni platsa. Kol douy bare voudya his ap koy rig, kay o kham pralstounes tardo hi. Oun ko morsh dikas pal har dour his foun ko yek voudar bis pash o vavar. Kova his 50 (paash-sheel) metarya.

Koy tikni glanstouni platsa

²⁸ Oun ko morsh djas mantsa an kava baro voudar, kay kote hi, kay o kham pralstounes tardo hi, oun doureder ap i tikni glanstouni platsa. Oun yob dikas pal, har baro kava voudar hi. Oun kova his yaake baro har kol vavar voudya.

²⁹ Oun leskre tikne iseme oun leskre massurya oun koy voudareskri halla, yon his yaake baro, har kolla an i vavar bare voudya. Koy his ninna vorhya an o voudareskro kheer oun an i glanstouni halla. Khetne his kava voudar 25 (biish-te-panč) metarya lengsto oun 12,5 (deesh-te-douy-te-paash) metarya bourhlo.

³⁰ Oun koy trouyel his glanstoune halle. Khetne his le 12,5 (deesh-te-douy-te-paash) metarya lengsto oun 2,5 (douy-te-paash) metarya bourhlo.

³¹ Oun i voudareskri halla djas bis pash i bari glanstouni platsa. Oun an lakri massurya his palmtikre rouka dren dino. Orhta stufe djan kote pre.

³² Oun yob anas man an koy tikni glanstouni platsa ap koy rig, kay o kham pre djal. Oun dikas pal, har baro ko baro voudar kote hi. Oun kova his yaake baro har kol vavar.

³³ Oun leskre tikne iseme oun leskre massurya oun i voudareskri halla, yon his yaake baro har kolla an i vavar voudya. Koy his ninna vorhya an o voudar oun an i voudareskri halla. Khetne his kava voudar 25 (biish-te-panč) metarya lengsto oun 12,5 (deesh-te-douy-te-paash) metarya bourhlo.

³⁴ Oun koy voudareskri halla djas bis pash koy bari glanstouni platsa. Oun an i massurya ap lakre douy rigya his palmtikre rouka dren činlo. Oun orhta stufe djan kote pre.

Ko baro voudar ap i nordetikri rig

³⁵ Oun yob anas man pash ko voudar, hoy kote hi, kay norden hi. Oun dikas pal, har baro kava hi. Kova his yaake baro har kol vavar.

³⁶ Les his tikne iseme, massurya, i voudareskri halla oun vorhya troul leste. Khetne his kava voudar 25 (biish-te-panč) metarya lengsto oun 12,5 (deesh-te-douy-te-paash) metarya bourhlo.

³⁷ Oun koy voudareskri halla djas bis pash koy bari glanstouni platsa. Oun an lakre massurya his palmtikre rouka dren činlo. Orhta stufe djan kote pre.

Vavar iseme an i tikni glanstouni platsa

³⁸ An i voudareskri halla foun o nordetikro voudar his i voudar, hoy djas an i tikni isema. Kote vell o mass kol firhendar thodo, hoy venn tseles rhačedo o Debleske.

³⁹ Oun an i voudareskri halla foun kava voudar his star rhapangre tardo, douy ap haki rig. Oun ap lende venn kol firhe maredo, hoy o Debleste dino venn, kolla kay venn tseles rhačedo, oun kolla kay venn maredo, te vell i doosh krik lino, ninna kolla kay venn maredo, te vell lauter pale mishto.

⁴⁰ Oun vin glan i voudareskri halla his star rhapangre, douy ap haki rig kote, kay djan le dren an o nordetikro voudar.

⁴¹ Yaake his ap haki rig pash ko baro voudar star rhapangre tardo. Kolla hi khetne orhta rhapangre, ap kolende i firhe maredo venn.

⁴² Oun kol star rhapangre, hoy kol firhenge hi, hoy o Debleske tseles rhačedo venn, kolla his dino dran bare barra, 75 (efta-deesh-te-panč) centimetarya lengsto, oun ninna yaake bourhlo, oun i paash metari baro. Koy pre venn kol čourya oun vavar koola čiddo, kolentsa i firhe maredo venn, save firhe, kay venn tseles rhačedo, oun hake vavaren ninna.

⁴³ Oun ap i rhapangre vas o mass čiddo. Oun an i massurya trouyel his hidjepangre dren dino, hoy hi i vast bourhlo.

⁴⁴ Palle anas lo man glan koy tikni glanstouni platsa. Kote dikom douy iseme, kolengre voudya ap koy tikni glanstouni platsa djan. Koy yek isema his pash o nordetikro voudar, oun lakri glanstouni rig sikrell kote, kay o kham pralstounes tardo hi. Oun koy vavar isema his pash ko voudar, hoy kote tardo hi, kay o kham pralstounes hi, oun lakri glanstouni rig sikrell kote, kay norden hi.

⁴⁵ Oun ko morsh penas ap mande: Kay isema kolakri glanstouni rig kote sikrell, kay o kham pralstounes tardo hi, hi kol rashayenge, kay boudrenn an o Debleskro kheer.

⁴⁶ Oun koy isema, kolakri glanstouni rig kote sikrell, kay norden hi, hi kol rashayenge, kolla pengri boudi ap i rhačepaskri krenn. Kolla hi kol morsha, kolengro dad o Zadok his. I tsele morshendar, kay venn dran o kheer Levi, hi yon kokres kolla, kay nay venn glan o baro Debleste, te boudrenn le leske.

⁴⁷ Oun ko morsh dikas pal, har baro koy tikni glanstouni platsa hi: Koles his star rigya, kolendar hakeni yaake baro hi har koy vavar: 50 (paash-sheel) metarya. Glan o Debleskro kheer his koy rhačepaskri tardo.

O Debleskro kheer

⁴⁸ Oun yob anas man dren an i glanstouni halla o Debleskro kherestar. Oun yob dikas pal, har baro i glanstouni halla hi: Ap haki rig o voudarestar his i massouri 2,5 (douy-te-paash) metarya pesso. O voudar his efta metarya bourhlo. Oun i massurya ap haki rig lestar his 1,5 (yek-te-paash) metarya bourhlo.

⁴⁹ Koy tseli glanstouni halla his deesh metarya bourhlo oun shob metarya lengsto. Oun deesh stufe djan ap late pre. Oun pash o voudar his ap haki rig yek turmo tardo.