Ezekiel 4 - O Debleskro Lab 2024 (Sinte-Manouche)O foro Yerusalem vell dre-pandlo 1 Tou, mensho, le i bar dran rhačedi čik, oun čip les glan toute, čin dren, har o foro Yerusalem vin dikell! 2 Kava barreha sike, har ko foro dren lino vell! Kre bare turme troul leste, oun čip čik khetne, te kress i drom, hoy djal ap o foreskre massurya pre. Čip lourden troul o foro trouyel! Oun čip bare pesse roukengre kotya pash i massurya troul o foro, kolentsa i massurya paash dino venn. 3 Oun le touke i bobeskro saster, oun čip les pre mank toute oun o foro, har te vals lo i massouri! Oun palle dik ap o foro, oun kre yaake, har te pandals les dren. Kova hi i sikepen i Israelenge, hoy sikrell lende, hoy pral lende vella. 4-5 Oun tou čip tout ap tiri servi rig, oun me čivau i doosh o kherestar Israel ap toute pre. 390 (triin-sheel-te-enya-deesh) divessa hounte vess koy čiddo ap i phoub, oun hounte hidjress lengri doosh. Yaake boud bersha anas o Israel doosh ap peste. Yek dives hako bersheske hounte hidjress lengri doosh. 6 Oun te hi ko tsiro trouyel, palle čip tout i douyto kopo tele, kava kopo ap i čači rig, oun hidje i doosh o kherestar Youda 40 (star-deesh) divessa. Yek dives hi yek bersheske. 7 Oun koy pashel dikess kote, kay o dren pandlo foro Yerusalem hi, oun dess les trad tiri pre čakedo moussyah, oun peness leske glan-vi, hoy pral o foro vella. 8 Oun me čivau shelle ap toute, te nay rissress tou tout gar yek rigyatar ap i vavar, yaake rah har o foro Yerusalem dren pandlo hi. 9 Oun le touke gib oun djob oun bohne oun linse oun hirsa oun dinkel. Oun čip len khetne an yek čaro, oun kre touke maro kolestar! Kova hi tiro rhapen, hoy rhah 390 divessa, yaake rah har ap tiri servi rig čiddo hal. 10 Hako dives rhas tou i paash founto maro. Rha kova hako dives ap o emligo tsiro! 11 Oun hako dives piyess tou i paash litari pani. Pi kova hako dives ap o emligo tsiro! 12 Peke ko maro har sane mare dran djob. Peke les pral menshengro foul! Kre kova glan i menshende, te dikenn le kova. 13 Oun o baro Devel penas doureder: Kova sikrell, te vell i tsiro, kay tradau i Israelitaryen an vavar themma mank vavar menshende. Oun kote hounte rhan le maro, hoy pale-čiddo hi. 14 Kote penom me: Ah miro ray, baro Devel! An kek tsiro vom me pale-čiddo. Foun tiknes pre bis kava dives, rhom gar firhen, kay meran, vitar gar saven, kay khetne dandedo van. Kek mass, hoy pale-čiddo hi, vas an miro mouy. 15 Oun yob penas ap mande: Mishto, palle le groumyengro foul oun kek menshengro foul, te pekess tiro maro koy pre! 16 Oun yob penas pale ap mande: Tou, mensho, me krau, te vell bouder gar doha maro an o foro Yerusalem. Palle hi hakenes kokres i tikno kotar maro, oun nay piyell kokres i tikno khoro pani. Oun yon lenn daar, te hounte merans le i bokatar. 17 Ava, maro oun pani hi gar doha lenge. Oun an lengri traash venn le sano, oun yek pal o vavar merell. Kova hi i phagi lengri doshake. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.