Ezekiel 39 - O Debleskro Lab 2024 (Sinte-Manouche)

¹ Tou, mensho, pen ap o Gog, hoy pral leste vella! Pen: Kava penell o baro Devel, maro ray: Kanna sikrau les touke, Gog, tou pralstouno pral i natsyone Meshek oun Toubal.

² Oun krau, te rissress tout trouyel, oun tserdau tout vin dran ko them, hoy dour krik kote hi, kay norden hi. Oun me anau tout ap i berge Israel.

³ Oun me dau touke tiro bogo dran tiro servo vast, oun tire fayle dran tiro čačo vast.

⁴ Ap i berge Israel veh tou moulo dino, tou oun tire tsele lourde, ninna kol lourde dran vavar themma, kay touha van. Oun me dau t'men i divye firhenge oun hake čirklenge, kay mass rhan, te rhal.

⁵ Oun t'mer ačenn moulo čiddo ap i phoub. Me, o baro Devel, penom kova.

⁶ Oun me bičrau yag ap i forya an o them Magog, oun ap kolende, kay djivenn pash o baro pani, oun kolen kek daar hi vavarendar. Palle dikenn oun hayvenn le, te hom me o baro Devel.

⁷ Me sikrau mire menshenge Israel, te hom o Devel, oun moukau bouder kek ladj ap mande te anell. I menshe an vavar themma hounte dikenn oun hayvenn, te hom me o baro Devel, o Devel pral o Israel.

⁸ Denn yak, kova, hoy penom, vella, oun vell sik. Kova hi o dives kolestar me rakrom, penell o baro Devel, maro ray.

⁹ Oun kolla, kay djivenn an i forya an o them Israel, djan palle vin, oun lenn kol karmangre kol moule lourdendar khetne, oun krenn yag oun rhačrenn len, kol tikne oun bare shilte, kol boge oun fayle, kol kashtene depangre oun vitsepaskre čourya. Oun kolentsa krenn le efta bersha pengri yag.

¹⁰ Oun yon hounte lenn bouder kek kasht an o veesh khetne, vitar gar hounte denn le rouka tele, te vell len yagakro kasht. Na-a, kol karmangre lenn le oun krenn lentsa pengri yag. Oun yon randenn kolen vin, kay kaman len vin te randell. Kolla, kay kaman pash lende te čorell, venn kanna lendar vin čoredo. Kava penell o baro Devel, maro ray.

¹¹ An ko dives dau i platsa an o them Israel, kay vell o Gog paskedo. Koya hi koy tala, hoy kharell Abarim, oun hi pash o baro pani ap koy rig, kay o kham pre djala. Kote vell yob peskre boud lourdentsa paskedo. Doleske nay djan kolla, kay ap i raysa hi, bouder gar vergel. Koy tala vell kharedo Tala Hamon Gog.

¹² Oun i Israelitarya paskrenn len, te ačell o them bouder gar pale-čiddo. Len hounte vell efta čonna, te paskrenn le len halauter.

¹³ Oun i tsele menshe an o them Israel paskrenn len. Koleske venn le sharedo i vavar menshendar ap ko dives, kay sikrau har baro oun raylo hom. Kova penell o baro Devel, maro ray.

¹⁴ Oun pal kal efta čonna bičrenn le morshen vin, te djan yon an o tselo them trouyel oun rodenn pal moulen, kay pral ačan, te venn le paskedo, te ačell o them bouder gar pale-čiddo.

¹⁵ Oun te djan kolla an o them trouyel oun hatsenn menshengre kokale, palle hounte čivenn le i sikepen pre, hoy sikrell, te hi i moulo koy čiddo, bis te venn kolla, kay paskrenn ko moules an i Tala Hamon Gog,

¹⁶ gar dour ko forestar Hamona. Oun yaake krenn le, te hi ko them bouder gar pale-čiddo.

¹⁷ O baro Devel, maro ray penas ap mande: Tou, mensho, pen ap i tsele čirkle oun ap i tsele divye firhe: Avenn khetne, avenn kay, avenn khetne haki rigyatar, pash ko baro rhapen, hoy krau t'menge. Kova vell i baro rhapen ap i berge Israel. Avenn, rhan mass oun piyenn rat!

¹⁸ Rhan o mass i zorele lourdendar, oun piyenn o rat i pralstunendar ap kay phoub! Yon venn maredo, har te vans le thoulle firhe, kay o Debleske maredo venn, har morshkane bakre, tikne bakre, bouzya oun gourma, kay halauter dran o them Bashan hi.

¹⁹ Pash kava rhapen, hoy t'menge krau, rhan t'mer thulepen, bis te han čalo. Oun piyenn rat bis te han mato.

²⁰ Rhan i grayen oun i klissepangren, i pralstunen oun i tsele lourden! Rhan t'men čalo ap miri rhapaskri! Kava penell o baro Devel, maro ray.

²¹ Oun me sikrau i menshenge an vavar themma, har baro oun raylo me hom. Halauter dikenn, har me o čačepen vin krau pral o Gog, oun havi zoryah dau les oun leskre lourden pengri phagi.

²² Oun an ko tsiro dikenn oun hayvenn i Israelitarya, te hom me o baro Devel, lengro Devel, oun bistrenn kova bouder gar.

²³ Oun i menshe an vavar themma dikenn oun hayvenn palle, te van i Israelitarya pengri doshake, hoy le ap pende anan, an o pandepen anlo. Yon rikran bouder gar ap mande. Doleske moukom len. Oun dom len an o vast kolendar, kay kouran pen lentsa. Yaake van lengre tsele lourde o rhareha maredo.

²⁴ Yon kran pen pale-čiddo glan mire yaka, har djan le miro dromestar tele. Doleske moukom len, oun dom lenge lengri phagi yaake har mishto his.

²⁵ Kanna krau, penell o baro Devel, maro ray, te vell lauter pale mishto o Yakobeske, oun krau miro dji pre o tselo khereske Israel. Miro tselo djiyeha krau, te vell bouder gar djoungeles rakedo pral mande.

²⁶ An ko tsiro, kay djivenn le pale kek daryah an pengro them, oun kek len traash krell, bistrenn le ko tsiro, kay vas bari ladj ap lende har moukan le man.

²⁷ Me anau len pale dran i themma kolendar, kay kouran pen lentsa oun van i zorleder, oun anau len pale khetne an o them Israel. Oun yaake sikrau boud menshen an vavar themma, te hom me o Devel.

²⁸ Palle dikenn oun hayvenn i Israelitarya, te hom me, o baro Devel, lengro Devel, kova kay anas len an o pandepen an vavar themma, oun moukell len palpale te vell an lengro them. Kek lendar ačell kote pale.

²⁹ Me čorau miro dourho vin ap o kheer Israel, oun moukau len bouder gar. Kava penell o baro Devel, maro ray.