Ezekiel 37 - O Debleskro Lab 2024 (Sinte-Manouche)

O them Israel lell nevo djipen

¹ I zoor o baro Deblestar vas pral mande, oun leskro dourho hidjras man vin, oun moukas man tele mashkral an i bourhli tala. Koya his pherdo moule kokale.

² Oun yob moukas man mank lende trouyel te djal an i tseli tala. Oun me dikom, kote his boud boud kokale, oun yon his trouk.

³ Oun yob penas ap mande: “Tou, mensho, venn kal moule kokale pale djide menshe?” Oun me penom: “Baro Devel, miro ray, tou djineh kova.”

⁴ Kote penas lo ap mande: Pen glan-vi, hoy kal kokalentsa djal! Pen ap lende: T'mer trouk kokale, shounenn, hoy o baro Devel penell!

⁵ Kava penell o baro Devel, maro ray, ap kal moule kokale: Me anau dourho an t'mende, oun t'mer venn djido.

⁶ Oun me čivau muskle ap t'mende, oun moukau mass pral t'mende te vell, oun tserdau hauta pral. Oun dau dourho an t'mende, te venn djido. Oun t'mer dikenn oun hayvenn pale, te hom me o baro Devel.

⁷ Oun me rakrom kol laba vin, yaake har mange penlo vas. Oun har kal laba vin rakrom, das i gole, har kal kokale khetne van – kokalo ap kokalo djas pale khetne.

⁸ Oun me dikom, muskle oun mass djan pral lende, oun hauta tserdas pes pral. Gomme his kek dourho an lende.

⁹ Oun o baro Devel penas ap mande: Tou, mensho, rake laba vin, hoy mandar venna! Pen ap o dourho: Kava penell o baro Devel, maro ray: Tou dourho, ab dran hake rigya, oun phourde ap kol marede menshende, te venn le djido!

¹⁰ Oun me rakrom kal laba vin, yaake har mange penlo vas. Oun o dourho vas oun djas an lende. Oun yon van djido, oun čivan pen ap pengre herya tardo. Kolla his boud boud lourde.

¹¹ Oun yob penas ap mande: Tou, mensho, i Israelitarya hi har kal moule kokale. Kanna penenn le: “Mare kokale hi trouk, oun halauter hi nashedo, mentsa hi trouyel.”

¹² Doleske pen lenge laba, hoy mandar venna. Pen lenge: Kava penell o baro Devel, maro ray: Mire menshe, me krau t'mare grufte pre. Oun moukau t'men dran t'mare grufte vin te vell. Oun me anau t'men an o them Israel.

¹³ Mire menshe, an ko tsiro, kay krau t'mare grufte pre, oun lau t'men dran t'mare grufte vin, palle dikenn oun hayvenn t'mer, te hom me o baro Devel.

¹⁴ Oun me dau miro dourho an t'mende, te djivenn pale. Oun me čivau t'men an t'maro them. Oun t'mer dikenn oun hayvenn palle, te hom me o baro Devel, oun krau, hoy penom. Kova penell o baro Devel.

O Israel oun o Youda venn pale khetne

¹⁵ Oun o baro Devel penas ap mande:

¹⁶ Tou, mensho, le touke i kotar kasht, oun čin ap leste: O rayeskro them Youda. Oun le i vavar kasht oun čin ap koleste: O rayeskro them Israel.

¹⁷ Oun an kol douy kashta khetne, ko yek pash o vavareste, yaake te vell lendar yek kasht an tiro vast.

¹⁸ Oun te poučenn toutar i Israelitarya, kay pash toute hi: Kameh tou menge gar te penell, hoy kamell kova te sikrell?

¹⁹ Palle pen ap lende: Kava penell o baro Devel, maro ray: Dik, me lau o kasht, hoy sikrell o kheer Israel – ko kasht hi an o Efrayimeskro vast – oun čivau les pashel pash o kasht, hoy sikrell o kheer Youda, oun krau lendar, te venn le yek kasht, koles rikrau an miro vast.

²⁰ Oun kol kashta, ap kolende tou činal, rike an tiro vast glan lengre yaka.

²¹ Oun pen ap lende: Kava penell o baro Devel, maro ray: Denn yak, me lau i Israelitaryen dran kol tsele themma vin, an kolende yon hounte djan, oun lau len khetne haki rigyatar, oun anau len pale an lengro them.

²² Oun me krau lendar, te venn le yek natsyona an o them, ap i berge Israel. Oun yek ray kokres vell pral lende halauter ray. Oun yon hi bouder gar douy natsyone an douy themma douy rayentsa.

²³ Oun yon mangenn bouder gar pengre rhorhene deblen oun djoungele figuren an, oun krenn pen bouder gar pale-čiddo dran kolende oun dran ko vavar djoungelo koova, hoy le kran. Me lau len vin dran lengri doosh, hoy le pale te pale ap pende anan, har le miro dromestar tele djan. Oun me krau, te hi le bouder gar pale-čiddo. Oun yon venn mire menshe, oun me vau lengro Devel.

²⁴ Oun yek dran i familya o Davidestar, kay hi har o David miro boudepaskro, vell lengro baro ray. Yob vell i bakrengro kolenge halauterenge, oun dell yak ap lende. Oun yon djivenn pal mire čačepaskre laba oun krenn, hoy lendar kamau.

²⁵ Oun yon djivenn pale an ko them, hoy dom me miro boudepaskres o Yakobeste, an koleste t'mare phoure djivan Hako tsireske djivenn le kote, yon oun lengre čave oun kolengre čave. Oun yek dran i familya o Davidestar, kay hi har o David miro boudepaskro, vell lengro ray hako tsireske.

²⁶ Oun me pandau miro dji ap lende, oun krau lentsa vin, te nay djivenn le an o lačepen. Kova te ačell hako tsireske yaake. Oun me moukau len boud te vell, oun krau lendar i zoreli natsyona. Oun miro kheer ačell mashkral lende hako tsireske.

²⁷ Oun me djivau mank lende. Oun me hom lengro Devel, oun yon hi mire menshe.

²⁸ Miro kheer ačell mashkral lende hako tsireske. Palle dikenn oun hayvenn i menshe an i vavar themma, te rodom me o baro Devel, i Israelitaryen mange vin, te venn le mire menshe.