Ezekiel 36 - O Debleskro Lab 2024 (Sinte-Manouche)

I pandle Israelitarya venn khere an pengro them

¹ Tou, mensho, rake ap i berge an Israel oun pen lenge, hoy lentsa djal, oun pen: T'mer berge Israel: Shounenn, hoy o baro Devel penell!

² Kava penell o baro Devel, maro ray: Kolla, kay rhoyedo pral t'mende hi, san pral t'mende oun penenn: Haha! Kal berge, kay his hako tsiro koy, van kanna menge!

³ Doleske pen ap i berge, hoy vella! Pen: Kava penell o baro Devel, maro ray: Hi čačo, yon kran, te van t'mer i moulo them. Haki rigyatar van le oun stakran o them khetne. Oun menshe dran i themma troul t'mende van oun lan t'maro them penge. Oun i menshe rakrenn djoungeles pral t'mende.

⁴ Doleske shounenn, t'mer berge Israel, hoy o baro Devel penell! Kava penell o baro Devel, maro ray, ap i bare oun tikne berge, ap i panya oun tale, ap i barra, hoy i tele-phagede kherendar pral ačan, oun ap i moukle forya. I menshe dran i themma troul t'mende, randan t'men vin, oun t'mer van lenge sapaske.

⁵ Doleske penell o baro Devel, maro ray: Čačepah, an miri tati rholi rakrom me i phagi vin pral i menshende an o them Edom oun an i themma troul t'mende, kolla miro them penge lan, te randenn le les vin. Koy pashel san le pen moulo pral t'mende, te djas t'menge yaake, oun praasan t'men.

⁶ Doleske pen glan-vi, hoy pral o them Israel vella. Pen ap i bare oun tikne berge, ap i panya oun tale: Kava penell o baro Devel, maro ray: T'mer hounte hidjran savo baro praasepen kol vavar menshendar. Doleske hom rhoyedo pral lende, oun an miri tati rholi rakrau i phagi vin pral lende.

⁷ Doleske penau me, o baro Devel, t'maro ray: Me hadau miro vast oun dau man sovel: Čačepah, kol vavar menshe, kay djivenn an i themma troul t'mende, yon hi kolla, kay venn praasedo vavarendar.

⁸ T'mer berge Israel, ap t'mende venn pale rouka baro oun zenelo, oun hidjrenn roukengre mire menshenge Israel. Sik vell ko tsiro, kay venn le pale khere.

⁹ T'mer dikenn: Me hom ap t'mari rig, oun dikau lačes ap t'mende. Oun ap t'mende boudrenn pale harhe oun vitsrenn djob vin ap i phoub.

¹⁰ Oun me krau, te venn i menshe boud, kay djivenn ap t'mende. O tselo kheer Israel, halauter lendar, djivenn kote. Palle djivenn le pale an lenge forya. Oun kol tele-phagede forya venn pale neves kerdo.

¹¹ Oun me krau, te venn i menshe oun firhe boud ap t'mende. Yon lenn boud čave. Oun me krau te nay djivenn i menshe kote yaake, har an i phoure tsirya his. Oun krau t'menge boudeder lačepen har an kek tsiro glan kova. Palle dikenn oun hayvenn t'mer, te hom me o baro Devel.

¹² Oun me moukau pale mire menshen Israel ap t'mende te djivell. T'mer berge venn pale lengro them, kay djivenn le hako tsiro. Oun t'mer krenn bouder gar, te merenn lengre čave i bokatar.

¹³ Kava penell o baro Devel, maro ray: Pal o them Israel vell penlo: “Ko them marell peskre menshen, oun krell, te merenn i čave kolendar, kay an leste djivenn.”

¹⁴ Doleske penau me, o baro Devel, t'maro ray: Kova te vell bouder gar yaake! Tou rhah bouder gar menshen! Oun kreh bouder gar, te merenn i čave kolendar, kay an toute djivenna.

¹⁵ Me krau, te shouness bouder gar o praasepen kolendar dran vavar themma, oun hounte ladjess tout bouder gar glan lende. Tou kreh bouder gar, te hi t'mare menshen bouder kek čave. Kava penell o baro Devel, maro ray.

¹⁶ Oun o baro Devel penas ap mande:

¹⁷ Tou, mensho, har o kheer Israel an peskro them djivas, kran le savo koova, oun djivan yaake, te vas o them pale-čiddo. Lengro djoungelo djipen his mange har ko pale-čiddo tsiro i djouvyatar, kolat pengro koova hi.

¹⁸ Yon maran menshen, oun mangan djoungele deblen an. Yaake kran le o them pale-čiddo. Doleske moukom miri rholi ap lende te vell.

¹⁹ Oun me tradom len an vavar themma mank vavar menshende, oun dom len pengri phagi koleske, hoy le kran oun har le djivan.

²⁰ An havo them, kay le ninna van, vas lendar penlo: “I menshe o baro Deblestar hi kalla, oun hounte djan penge dran leskro them.” Yaake anan le ladj ap miro lačo lab.

²¹ Kote, kay le van, rakran i menshe djoungeles pral mande. Kova doukas man, te vas miro lačo lab an i čik tserdedo.

²² Doleske pen ap o kheer Israel: Kava penell o baro Devel, maro ray: T'mer kran, kay vas djoungeles rakedo pral mande mank i menshende an vavar themma, pash kolende t'mer van. Kova, hoy kanna krau, krau gar t'menge dran o kheer Israel. Na-a, kova krau, te vell miro lačo lab pale sharedo.

²³ T'mer kran, kay vas djoungeles rakedo pral miro baro lab mank i menshende an vavar themma. Oun me krau, te vap pale sharedo. Kova hoy krau t'menge, sikrell lende, te hom čačepah o Devel. Oun yon hounte dikenn oun hayvenn, te hom me o baro Devel. Kova penau me, o baro Devel, t'maro ray.

²⁴ Me lau t'men vin dran i tsele themma oun vavar menshendar. Oun lau t'men khetne oun anau t'men an t'maro them.

²⁵ Me vitsrau djoudjo pani ap t'mende, te venn djoudjo halauterestar, hoy kras t'men pale-čiddo. Ko tselo čilačepen, hoy ap t'mende anan, har mangan i rhorhene deblen an, thovau t'mendar tele.

²⁶ Me dau t'men i nevo dji, oun čivau i nevo dourho an t'mende, oun lau ko dji dran bar dran t'mende vin, oun dau t'men i dji dran mass.

²⁷ Me dau miro dourho an t'mende, oun me krau save menshe t'mendar, kay krenn, hoy t'mendar kamau, oun djivenn pal mire čačepaskre laba, oun rikrenn len dren.

²⁸ Oun t'mer djivenn an kava them, hoy dom t'mare phourende, oun han mire menshe, oun me hom t'maro Devel.

²⁹ Oun me lau t'men vin dran ko tselo koova, hoy kras t'men pale-čiddo. Oun o djob moukau pale bares oun boud te vell, oun moukau bouder kek bok pral t'mende te vell.

³⁰ Me krau, te anenn i rouka boud roukengre. Oun kova hoy ap i phoub pre djal, vell boud oun boudeder. I menshe dran vavar themma nay san bouder gar pral t'mende, doleske, kay hi t'men či te rhal.

³¹ Oun palle vell t'menge an o shero, har čilačo kova his, hoy kran oun har djivan. Oun ko tselo čilačo koova, hoy kran, oun har i rhorhene deblen an-mangan, vell t'menge čadepaske.

³² Me o baro Devel, t'maro ray penau t'menge: Hi gar t'menge, kay me krau kava lačo koova. Ma bistrenn kova! T'mer dran o kheer Israel, ladjenn t'men oun avenn lolo i ladjatar pral kova, hoy kran!

³³ Kava penell o baro Devel, maro ray: An ko tsiro, kay me t'mari doosh t'mendar tele thovom, moukau t'men pale an t'mare forya te djivell. Palle nay krenn t'mer i forya pale neves, kolendar kanna či har barra pral hi.

³⁴ Oun ap t'maro them boudrenn pale i harhe. Palle hi ko them bouder gar moulo oun mouklo čiddo glan i yaka halauterendar, kay kote djan.

³⁵ Palle penenn le: Kava them his mouklo oun divyo. Kanna hi lo har i baar Eden. Oun kal forya his paash-dino, tele-phagedo oun vi-meredo. Kanna hi le zoreles koy tardo, oun menshe djivenn pale dren.

³⁶ Oun kol menshe an i vavar themma troul t'mende, kay djido ačan, kolla dikenn oun hayvenn, te krom me, o baro Devel, kova neves, hoy tele-phagedo his, oun moukom zenlepen oun djob bares te vell kote, kay či bares vas. Me, o baro Devel, penom kova glan-vi, oun me krau kova ninna yaake.

³⁷ Kava penell o baro Devel, maro ray: Ninna kova krau i menshenge dran o kheer Israel: Te mangenn le mandar, moukau lendar yaake boud te vell, har hi len bakre.

³⁸ An kol forya, kolendar kanna či har barra koy hi, djivenn palle yaake boud menshe, har his bakre an o foro Yerusalem an kol bare divessa, har kol bakre o baro Debleske maredo oun rhačedo van. Oun yon dikenn oun hayvenn palle, te hom me o baro Devel.