Ezekiel 35 - O Debleskro Lab 2024 (Sinte-Manouche)O them Edom vell i moulo them 1 Oun o baro Devel penas ap mande: 2 Tou, mensho, dik kote, kay i berga Seir hi, oun pen glan-vi, hoy pral o them Edom vella! 3 Pen leske: Kava penell o baro Devel, maro ray: Kanna sikrau les touke, tou berga Seir. Oun djau zoryah ap toute pre, oun krau toutar te vess i moulo oun mouklo them. 4 Tire foryendar ačell či har barra pral. O tselo them vell i moulo them. Palle dikeh oun hayveh, te hom me o baro Devel. 5 O tselo tsiro hals ap čingepen oun marepen vin kol Israelentsa. Oun tou phoukral len oun dal len an i vasta kolendar, kay maran len, an ko tsiro har bari bibarht pral lende vas, oun me lenge lengri phagi dom. 6 Doleske dau man sovel pash miro djipen, me o baro Devel, t'maro ray: Tou lal rateskri doosh ap toute, doleske vess tou ninna maredo. Me moukau tout te marell, oun tou nay nasheh touke gar. 7 Oun me krau i berga Seir, te vell li i moulo oun mouklo them. Oun moukau kekes djido, kay kote dren oder vin djal. 8 Oun me krau tire berge, te venn le pherdo kolentsa, kay maredo van an o kourepen. Ap i tikne berge, oun an i tale, oun an i tikne panya hi kolla čiddo, kay o rhareha moulo dino van. 9 Hako tsireske vess i moulo them. An tire forya djivell bouder kek. Palle dikenn oun hayvenn t'mer, te hom me o baro Devel. 10 T'mer penan: “Kol douy themma Israel oun Youda pengre menshentsa hounte venn maro. Las len menge dren!” T'mer bistran, te hi kova miro them, kay me, o baro Devel, djivau. 11 Doleske dau man sovel pash miro djipen, penell o baro Devel, maro ray: Me krau t'mentsa har t'mer kran ap i Israelitarya. Kova, hoy ap lende kran an t'mari rholi, har hans čilačo oun zilveran ap lende, kova moukau pale te perell ap t'mare sherya. Yaake vell miri rholi pral t'mende, oun me sikrau mire menshende, koon me hom. 12 Palle dikenn oun hayvenn t'mer, te shounom me o baro Devel, ko tselo djoungelo koova, hoy t'mer pral i berge Israel rakran, har t'mer penan: I berge Israel hi vi-meredo koy čiddo. Kanna hi le menge koy. 13 Yaake phourdan t'men pre, oun t'maro baro mouyeha hadan t'men pral mande. Me shounom halauter. 14 Kava penell o baro Devel, maro ray: Tou, berga Seir, me krau toutar, te vess i moulo them. Oun ap i tseli phoub venn menshe barhtelo koy pral. 15 Tou hals barhtelo, har vas o Israelengro them i moulo them. Doleske krau, te djal touke yaake har lenge djas. I berga Seir khetne o tselo them Edom vell i moulo them. Palle dikenn oun hayvenn i menshe, te hom me o baro Devel. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.