Ezekiel 34 - O Debleskro Lab 2024 (Sinte-Manouche)

I čilače bakrengre

¹ O baro Devel penas ap mande:

² Tou, mensho, pen i pralstunenge pral Israel glan-vi, hoy pral lende vella! Pen lenge: Kava penell o baro Devel, maro ray: Djungeles djal t'menge! T'mer han i bakrengre mire menshenge, oun hounte anans i Israelitaryen har bakre kote, kay hatsenn le lačo zenlepen. Kova krenn t'mer gar. T'mer dikenn kokres ap t'mende, te djal t'menge mishto.

³ O thulepen kol bakrendar rhan t'mer, lengre ballendar krenn t'maro an-ripen. Oun i thoulle bakre marenn t'mer. Ap i bakre denn t'mer gar yak.

⁴ Kolenge, kay len kek zoor bouder his, van t'mer gar ap i rig, te venn le pale zoreles. Oun kolla, kay nasselo his, kran t'mer gar sasto. Oun kolla, kay phagan pen i heri, lenge čivan kek diklo troul koy doukedi heri. Oun kolla, kay nashran pen, anan t'mer gar pale. Oun kolla, kay nashedo his, rodan t'mer gar. Oun čilače zoryah hans i raya pral lende.

⁵ Oun har his mire bakren kek bakrengro, nashan le penge kate te kote, oun van o rhapen i divye firhendar.

⁶ Yon nashan trouyel ap i tsele tikne oun bare berge, oun hi bouder gar khetne. Kate te kote an o tselo them hi le. Oun kek hi koy, kay pal lende poučell oun len rodell.

⁷ Doleske shounenn, t'mer bakrengre, hoy o baro Devel t'menge penell!

⁸ Pash miro djipen dau man sovel, penell o baro Devel, maro ray: Mange hi doha te dikap, har venn mire bakre khetne dandedo oun rhalo i divye firhendar. Len hi kek bakrengro, kay ap lende yak dell. Mire bakrengre dikenn kokres ap pende, te djal lenge mishto, oun poučenn gar pal mire bakre. Mire bakren anenn le gar kote, kay lačo zenlepen hi.

⁹ Doleske shounenn, t'mer bakrengre, hoy o baro Devel penell:

¹⁰ Kava penell o baro Devel, maro ray: Me djau ap i bakrengre, oun kamau mire bakren dran lengro vast pale. Oun me krau, te ačenn le bouder gar bakrengre, te dikenn le bouder gar ap pende kokres, te djal lenge mishto. Oun me lau mire bakren dran lengre mouya vin, te venn le lenge bouder gar rhapaske.

O lačo bakrengro

¹¹ Kava penell o baro Devel, maro ray: Me hom kay, oun me dikau kanna pal mire bakren oun rodau len.

¹² Yaake har i bakrengro, kay pash peskre bakre hi, kolen rodell, kay nashran pen, yaake rodau me mire bakren, oun lau len pale dran haki platsa, kay le tradedo van ap ko djoungelo kalo dives.

¹³ Oun me anau len vin dran vavar themma oun vavar menshendar. Oun anau len pale khetne an lengro them. Oun me hom lenge koy ap i berge an o them Israel, oun pash i panya, oun ap hake platse, kay i menshe djivenn an o them.

¹⁴ Kote, kay lačo zenlepen hi, anau len. Ap lače platse pral ap i berge an Israel nay čivenn le pen tele oun rhan pen čalo.

¹⁵ Me kokres hom lengro bakrengro, oun anau len kote, kay le pen tele nay čivenn kek daryah. Kava penell o baro Devel, maro ray.

¹⁶ Kolla, kay nashedo hi, rodau me. Oun kolla, kay nashran pen, anau me pale. Oun kolla, kay pen doukran, pandau i diklo trouyel. Oun kolla, kay nasselo hi, krau zoreles. Oun i thoullen oun zorelen lau an i yak. Me dau yak ap lende har mishto hi.

¹⁷ T'menge, mire bakre, penau: Me, o baro Devel, t'maro ray, krau o čačepen vin mashkral yek bakro oun o vavar bakro. T'mer morshkane bakre oun morshkane bouzya,

¹⁸ hi gar doha, te rhan o lačeder zenlepen? Hoske stakrenn o vavar zenlepen t'mare heryentsa khetne? Hi gar doha, te piyenn o djoudjo pani? Hoske stakrenn koy dren oun krenn les čiklo?

¹⁹ Oun mire bakre hounte rhan kova, hoy t'mare herya khetne stakran, oun hounte piyenn, hoy t'mare herya čiklo kran!

²⁰ Doleske penau me, o baro Devel, t'maro ray ap t'mende: Me hom kova, kay krell o čačepen vin mashkral kol thoulle bakre oun kol vi-bokede bakre.

²¹ T'mer zorele, t'mer dan i spildini kolenge, kay len kek zoor hi, oun dan t'mare shingentsa an lende dren, yaake rah bis te tradan len vin t'mendar.

²² Kanna vau lenge ap i rig, te venn le bouder gar rhalo. Oun me krau o čačepen vin mashkral ko yek bakro oun ko vavar bakro.

²³ Oun me moukau yek bakrengro lenge pre te stell, kay dell yak ap lende. Kova vell dran i familya o Davidestar, oun hi har o David miro boudepaskro. Yob vell lengro bakrengro oun dell yak ap lende.

²⁴ Oun me, o baro Devel, vau lengro Devel. Oun ko morsh, kay hi har miro boudepaskro, o David, vell o ray mank lende. Kava penau me, o baro Devel.

²⁵ Oun me pandau miro dji ap lende, oun krau lentsa vin, te nay djivenn le an o lačepen. Hake divye firhen tradau krik dran o them. Oun an o moulo them nay djivenn le kek daryah. Oun an i vesha sovenn le.

²⁶ Oun me čivau miri barht ap lende oun ap o tselo them, hoy troul miri berga hi. Oun dau brishin an o čačo tsiro. Kava lačo brishin krell,

²⁷ te hidjrenn i rouka lače roukengre, oun te vell boud djob bares ap i harhetikri phoub. Oun mire menshe djivenn an pengro them kek daryah. Me phagau kol shelle, kolentsa yon pandlo his. Oun lau len vin dran i vasta kolendar, kolenge yon hounte boudran. Palle dikenn oun hayvenn le, te hom me o baro Devel.

²⁸ Oun i menshe dran vavar themma randenn len bouder gar vin. Oun i divye firhe rhan len bouder gar. Yon nay djivenn kek daryah. Oun kek krell lenge bouder traash.

²⁹ Me krau lengro them, te vell lo i shoukar baar, hoy hi prindjedo ko lačepaske, hoy kote baro vell. Kek lendar hounte bokell bouder gar. Oun i menshenge an vavar themma hi le bouder gar sapaske.

³⁰ Palle dikenn oun hayvenn le, te hom me, o baro Devel, lengro Devel, kova, kay lentsa hi, oun te hi yon dran o kheer Israel mire menshe. Kava penell o baro Devel, maro ray.

³¹ Ava, t'mer mire menshe, han mire bakre, ap kolende yak dau. Oun me hom t'maro Devel. Kava penell o baro Devel, maro ray.