Ezekiel 31 - O Debleskro Lab 2024 (Sinte-Manouche)

O Farao hi har i tele-dino rouk

¹ An o 11. (deesh-te-yekto) bersh an o triinto čon ap o yekto dives an ko čon penas o baro Devel ap mande:

² Tou, mensho, pen ap o Farao, ko baro rayeste pral o them Egiptia oun ap leskre tsele menshende: Kek hi yaake baro har tou!

³ Tou hal har o them Assour his – har i baro cedertikro rouk ap i berga Libanon shoukar bourhle zenele kashtentsa, kay nay khatrenn le pen tel lende glan o kham. Oun yob his yaake baro, te djas lo doureder pral har i vavar rouka an o veesh.

⁴ Les his boud pani. O pani tel i phoub kras, te vas lo baro. Ko panyestar tel i phoub djan lengste panya vin oun nashenn troul koy platsa, kay o cedertikro rouk tardo hi. Oun tikne panya nashenn doureder pash kol tsele vavar rouka an o veesh.

⁵ Doleske vas lo bareder har kol vavar rouka an o veesh. Oun les van boud lengste zenele kashta. Yaake vas ko rouk bourhlo dran ko boud pani.

⁶ Hake čirkle kran pengre khera an leste. Oun i vesheskre firhe anan pengre čaven tel leste ap i phoub. Oun menshe dran hako baro them djivan tel leste, te khatrenn le pen glan o kham.

⁷ Shoukar his ko rouk, har lo yaake baro oun bourhlo his! Leskre draba his doha pani.

⁸ Oun kek vavar cedertikro rouk an o Debleskri bar his yaake shoukar har yob. I cipresstikre rouka oun i platantikre rouka, len his gar yaake shoukar zenele kashta har les his. Kek rouk an o Debleskri bar his yaake shoukar har yob.

⁹ Me krom les shoukar oun dom les boud bourhle zenele kashta. Oun i tsele rouka an i bar Eden, hoy hi o Debleskri bar, zilveran ap leste.

¹⁰ Doleske penell o baro Devel, maro ray: Ko rouk vas yaake baro, bareder har i vavar rouka, oun leskro dji phourdas pes pre dran leskro barepen.

¹¹ Doleske dom me les an o vast o zorleder i tsele rayendar, te djal kova leha yaake trouyel, te krell lo leha pal leskro čilačepen. Me vitsrom les mandar.

¹² Lourde dran vavar themma, kolen kek dji leske hi, van oun dan les trouyel, oun moukan les čiddo. Ap i berge oun an i tale peran leskre kashta. Ninna pash i tsele tikne panya an o them his lauter phagede kashta lestar čiddo. Oun i tsele menshe dran vavar themma, kay nay khatran pen bouder gar glan o kham tel leste, moukan les čiddo oun djan penge.

¹³ Oun i tsele čirkle hi beshdo ap ko tele dino kotar rouk, hoy gomme ap i phoub čiddo hi, oun i divye firhe čivenn pen tele ap leskre kashta.

¹⁴ An ko tsiro, hoy vella, vell bouder kek rouk yaake baro – bareder har i tsele vavar – te nay phourdell lo pes pre, ninna te hi lo pash o pani tardo. Kek rouk nay hadell pes pral i vavarende. Kol tsele rouka hounte merenn, oun djan tele an o moulengro them, pash i vavar menshende, kay meran.

¹⁵ Kava penell o baro Devel, maro ray: Ap ko dives, har ko cedertikro rouk an o moulengro them djas, krom, te rovas o baro pani tel i phoub pral leste. I lengste panya nashan bouder gar, oun i bare panya ačan tardo. I berga Libanon čakras pes an o kalepen. Oun i tsele rouka an o veesh meran tele.

¹⁶ Har i menshe an i vavar themma shounan, te peras ko baro rouk, oun kay vitsrom me les tele pash i moulende an o moulengro them, trissan le i daryatar. Oun i tsele rouka dran i bar Eden oun kol shoukeder oun feteder rouka i bergatar Libanon, halauter kay pash o pani tardo his, oun kanna tel i phoub hi, lenge his kova mishto, te djas ko baro roukeske yaake har lenge ninna djas.

¹⁷ Kolla dran vavar themma, kay ap leskri rig his, oun pral kolende yob peskro vast rikras, ninna yon hounte djan leha khetne tele pash i moulende, pash kolende, kay van o rhareha moulo dino.

¹⁸ Kek hi yaake baro oun raylo har tou, Farao – kek mank i tsele rouka an i bar Eden! Ninna tou hounte djas an i telstouni phoub, khetne kol roukentsa dran Eden, oun hounte vess čiddo pash kolende, kay hi gar činlo ap pengro mass, oun kay van maredo o rhareha. Yaake djal o Faraeske oun leskre pre-phourde menshenge. Kava penell o baro Devel, maro ray.